WUKUMBUSO 32 - Biblia Ilagho Jiboie Kwa Wandu Wose

¹ “Degha kudu ee mlungunyi nani nichaghora; na ndoenyi ndeisikirie madedo ghapo.

² Mafundisho ghapo ndeghitonye-tonye sa vua, na madedo ghapo ghisee sa mami; sa vua inyagha mboa-mboa aighu ya mghina, na sa mshushure aighu ya nyasi mbishi.

³ Nichajikasa irina ja BWANA, na wandu wake wichaeresha wubaa ghwake.

⁴ “BWANA ni mlindiri onyu uwadie ndighi, chia rake rose ni ra hachi; Mlungu onyu ni mloli na mhachi wadabonya agho ghiko gha loli na hachi.

⁵ Ela inyo mo wandu mseko waloli, msefwane kuwangwa wandu wake; mbari ya kaung'a ichue mikalo.

⁶ Huwo niko mumlipagha BWANA inyo wakelu msewadie akili? Uo ni ndeyo na Muumbi onyu, wam'bonyere mkawuya mbari.

⁷ “Kumbukenyi matuku gha kala, iro ngelo riidie; kotia ndeyo ukughorie agho gherekoghe, kotia waghosi nawo wichakughoria agho gherebonyekieghe.

⁸ Iji Uo-Uko-Aighu-Nandighi orewinekieghe iro mbari ifwa jawo, orewikieghe mano ya wandu andu wichaakaia. Ukawikia kula mbari mlungu ghwawo,

⁹ ela kivalwa cha Jakobo orechisaghueghe, chikaie ifwa jake moni.

¹⁰ “Orewikueghe isanga ja kireti, andu kwa kireti kuomeshero ni mbeo ya kiremba. Ukawirighia na kuwilindia, ukadammbona sa mundu wa iriso jake.

¹¹ Seji indu ifundishagha vanga vake kuburuka, ukiwiwadia nicha amawawenyi ghake ghaghorolwa, ni huwo koni BWANA uimaziriagha Israeli isegho.

¹² BWANA uekeri oremghenjereghe, kuseko kuteselwa ni mlungu ghungi ghwa kighenyi.

¹³ “Orewisighieghe wibonye nguma masanga ghiko ighu, wikaja vindo va mbuwenyi. Werepatireghe wuki amaghonyi, na mizeituni ikazoghua nicha andoenyi ra magho.

¹⁴ Ng'ombe na mburi rawo rerefunyireghe mariwa kwa wungi; werekoghe na ng'ondi riboie, mburi na ng'ombe, mufu ghwa ngano ghudendere, na divei ndicha.

¹⁵ “Wandu wa BWANA werewurieghe wazuri wa mali, ela waleghi; werejieghe vindo wikabanda na kusisina. Weremsighieghe Mlungu Muumbi wawo, na kumlegha mkiri wawo uwadie ndighi.

¹⁶ Kutasa milimu kwawo korem'bonyereghe kuwadwa ni iriso, mabonyo ghawo ghizamie ghikamjosa machu.

¹⁷ Wereifunyireghe milungu ya tee vizongona, milungu ya kighenyi weke wawae wisereimanyireghe jingi, iyo Israeli wisereisikireghe jingi.

¹⁸ Weremliwieghe Mlungu wawo, uo Mkiri uwadie ndighi, uo uwinekagha irangi.

¹⁹ “BWANA uendawona agho ukakaia na machu; ukawisigha wana wake wa womi na wa waka.

²⁰ Nao ukaghamba, ‘Nichawisigha niwone ngera kutua kwawo kuchakaia wada; ni kivalwa chilagharie, ni wana wisewadie wuloli andenyi kwawo.

²¹ Waniredie machu kwa wundu ghwa milungu yawo, wanibonyere nikaie na iriso kwa iyo milungu iseko milungu ingi loli. Kwa huwo nichawibonya wiwawo ni ngolo kwa kutumia mbari imu; nichawibonya wiwado ni iriso kwa kutumia mbari ya makelu.

²² Nichajokwa ni machu sa lumu lwa modo nani nichakora kula kilambo ndoenyi. Ghuchasea hata Andu kwa Wafu, na kumeria miri ya mghondi.

²³ “‘Nichawiredia wasi ghusesiagha, na kumeria mawanu ghapo ghose aighu yawo.

²⁴ Wichafwa kwa njala na homa; wichamerelwa ni makongo ghizamie. Nichawidumia nyamandu ra isakenyi riwibwaghe, na choka riko na wusungu riwilume.

²⁵ Wuda ghuchareda kifwa achienyi, na nyumbenyi kuchakaia na kiture, wadawana na wai wichafwa, ndewichaafuya wughoma mwana uongagha chiaimweri na mghosi.

²⁶ Kumangu nawitotesha putu, hata mndungi usewikumbuke.

²⁷ Ela seredimagha kuwisigha wamaiza wawo wikukase, wei wawisima wandu wapo, na ni ini moni niwifashire.’

²⁸ “Israeli ni mbari isena akili; ndewiwadie hikima hata kutini.

²⁹ Walemwa ni kutambua kwaki wisimilo; ndewidimagha kutambua niki chibonyekie.

³⁰ Kwaki wandu elfu weresimwagha ni mundu umweri, na elfu ikumi kusimwa ni wawi tu? BWANA, Mlungu wawo, wawisighie; Mlungu wawo uwadie ndighi oowilekeria.

³¹ Wamaiza wawo waichi kukaia milungu yawo cheni ndeiwadie ndighi; ndeiko na ndighi sa Mlungu wa Israeli.

³² Wamaiza wawo, winonekie sa Sodoma na Gomora, weeka sa mzabibu ghuvagha zabibu ra sumu riwawie,

³³ sa divei ibonyero na wusungu ghwa choka.

³⁴ “BWANA wawuyakumbuka agho ghibonyero ni wamaiza; waawuyaweseria uwikabe kwa kimu charo.

³⁵ BWANA uchalipia na kuwikaba; ngelo ichavika nawo wichaghwa; ngelo ya mashaka ghawo eko kaavui.

³⁶ BWANA uchawivuvua wandu wake, ukawona wameria kusirilwa ni ndighi putu. Uchakaia na wughoma kwa awo wawuyamdumikia.

³⁷ Niko BWANA uchawikotia wandu wake, ‘Iyo milungu iwadie ndighi moreirumirieghe eko hao?

³⁸ Moreijishireghe mavuda gha vizongona venyu, mkaifunyira divei ipate kunywa. Ndeiche idana imtesie; ndeikimbie ichemvuvua.

³⁹ “‘Ni ini, ini moni niko Mlungu; ndekuwadie mlungu ungi mzima wa loli. Nadabwagha na kukaisha moyo. Nadashoghonua na kuboisa; ndekuwadie mndungi udimagha kutangala agho nibonyagha.

⁴⁰ Loli sa iji koni ini niko Mlungu uko moyo, naghorua mkonu ghwapo na kughema,

⁴¹ kukaia, nichanoa lufu lwapo lung'alaa-ng'ala na kuwona kukaia hachi yawuyabonywa. Nichalipia kisasi kwa wamaiza wapo, na kuwikaba awo wizamilwagha ni ini.

⁴² Mawanu ghapo ghicharogha bagha yawo, na lufu lwapo luchabwagha wose winitangalagha. Sichaasigha mndungi ulwagha nani; hata awo wishoghonokie na wafungwa wichafwa.’

⁴³ “Suti muwikume wandu wa BWANA inyo mbari, wadawikaba awo wose wiwibwaghagha. Wadalipa kisasi kwa wamaiza wake na kuleka kaung'a ra wandu wake.”

⁴⁴ Musa na Joshua mwana wa Nuni, wikacha wikaghighora malagho ghose gha lumbo ulu, eri wandu wa Israeli wisikire.

Malaghiro gha Musa gha kutua

⁴⁵ Musa umeria kuwineka wandu mafundisho gha Mlungu,

⁴⁶ ukaghamba, “Lindienyi kurisikira Sharia iri rose namneka idime. Mmburie kurifundisha wana wenyu eri wipate kughisikira mafundisho ghose gha Mlungu.

⁴⁷ Mafundisho agha si gha duu anduangi; ela ni irangi jenyu. Mughisikire nenyo mchadua moyo luma isangenyi iji mruwukagha Jordani kujiwusa.”

⁴⁸ Ituku ijo jeni, BWANA ukamzera Musa,

⁴⁹ “Joka mighondi ya Abarimu iko isanga ja Moabu kulangaya muzi ghwa Jeriko; kujoke Mghondi ghwa Nebo nao kuzighane isanga ja Kanaani ijo niwinekagha wandu wa Israeli wijiwuse.

⁵⁰ Kuchafwa aighu mghondinyi seji mwanyinyu Haruni orefueghe aighu ya Mghondi ghwa Hori,

⁵¹ kwa kukaia ndemorekoghe waloli kwapo aghadi ya wandu wa Israeli. Iji morekoghe machinyi gha Meriba, kaavui na muzi ghwa Kadeshi kireti cha Sini, ndemoreninekieghe ishima imbiri ya wandu.

⁵² Kuchazighana isanga kwa kula, ela ndekuchaangia ijo isanga niwinekagha wandu wa Israeli.”