WUFUNUO 3 - Biblia Ilagho Jiboie Kwa Wandu Wose

Ilagho kwa wundu ghwa ikanisa ja Saridi

¹ “Na uo malaika wa ikanisa ja Saridi kumuandikie huwu: ‘Agha ni malagho gha uo uko na iro roho mfungade ra Mlungu, na nyerinyeri mfungade. Narimanya kazi rako; koko na irina jedua moyo, ela kwafue.

² Idana wuka kurifungishe ndighi iro maza risigharikie, riko kaavui na kufwa; angu siwonie wei iro kazi rako rakate imbiri ya Mlungu wapo anduangi.

³ Idana kumbuka seji korefundishiroghe na seji koresikireghe, kuwadie na kuhea. Kukalegha kuwuka, nichacha sa kitoi, na oho ndekuchaamanya ingelo nikucheagha nayo.

⁴ Elaima, koko na marina matinieri andenyi ya Saridi gha wandu wiserilushire nguwo rawo, nawo wichaselanya nani wirwae nguwo ra chokwa, angu awo wafwana.

⁵ Uo usimagha, ucharushwa nguwo ra chokwa woruwo, nani sichaajivuta irina jake andenyi ya icho chuo cha irangi anduangi; ela nichajirumiria imbiri ya Aba na imbiri ya weke malaika wake.

⁶ Uo uko na kudu, ndesikire agho malagho Roho ughighoriagha makanisa.’

Ilagho kwa wundu ghwa Ikanisa ja Filadelfia

⁷ “Na uo malaika wa ikanisa ja Filadelfia kumuandikie huwu: ‘Agha ni malagho gha uo Mweli, uo mloli, uo uko na ugho mfunguo ghwa Daudi; uo ukarughua, mndungi ndedimagha kurugha; ukarugha, mndungi ndedimagha kurughua anduangi.

⁸ Narimanya kazi rako. Ola nakuwikia mnyango ghuari, ugho mndungi usedimagha kughurugha anduangi; namanya ndighi rako ni ndini, ela sena kwajilindirie ilagho japo, hata ndekujikanie irina japo anduangi.

⁹ Ola awo wandu wa sunagogi ya Shetani, wikuwangagha weni Wayahudi nawo wiseko Wayahudi wangi, ela wiakalia, nichawibonya wiche na kughoghoma andonyi maghunyi kwako, wipate kumanya angu ini nakukunde.

¹⁰ Kwa kukaia kwajiwadie ijo ilagho ja kurumaghia luma kwapo, nani nichakulindia ngelo iyo ighucheagha wurumwengu ghose kuwitima awo wikaiagha ndoenyi.

¹¹ Niacha shwa-shwa, maziria icho kuko nacho, mndungi usechekusoka kirumbu chako.

¹² Uo usimagha, nicham'bonya ukaie nguro andenyi ya iyo hekalu ya Mlungu wapo, hata najingi ndechaafuma aho anduangi. Nichajiandika irina ja Mlungu wapo aighu kwake, na irina ja muzi ghwa Mlungu wapo, ugho Jerusalemu mmbishi ghuseagha kufuma mlungunyi kwa Mlungu wapo, na irina japo jeni iwishi nichajiandika wori.

¹³ Uo uko na kudu, ndesikire agho malagho Roho ughighoriagha agho makanisa.’”

Ilagho kwa wundu ghwa ikanisa ja Laodikea

¹⁴ “Na uo malaika wa ikanisa ja Laodikea, kumuandikie huwu:” “Agha ni malagho gha uo Amen, uo mloli, na mshahidi wa loli, uko kuzoya kwa kuumba kwa Mlungu.

¹⁵ Narimanya kazi rako, kukaia ndekuko wa mbeo hata wa modo anduangi. Kumangu kwakaiagha wa mbeo angu wa modo.

¹⁶ Idana kwa kukaia oho kooka wa ibuku, kuseko wa mbeo hata wa modo, nichakudaika kufume momunyi kwapo.

¹⁷ Angu oho kwaghamba, ‘Ini nawadie mali, nachurikie hata sine haja na kilambo chingi;’ kusemanyagha kukaia oho ko mundu wa wasi, owasira wughoma, mkiwa, kitungure, na kuko duu.

¹⁸ Kwa huwo, nakuneka njama kughuo kwapo dhahabu ieleshero kwa modo, eri kukaie na mali, na nguwo ya chokwa kupate kurwa kuinja waya ghwa wuduu ghwako ghusewoneke; na wughanga ghoshinga meso ghako, eri kupate kuwona.

¹⁹ Awo niwikunde nadawikaba na kuwikania; kwa wundu ugho kufunge ndighi, nao kuhee.

²⁰ Ola nakaia kimusi mnyangonyi naawuyakongoda, ngera mndungi wasikira lwaka lwapo na kurughua mnyango, nichangia andenyi kwake na kuja andwamweri nao, nao uchaja andwamweri nani.

²¹ Uo usimagha, nichamrumiria kusea kidombo andwamweri nani kwa kifumbi chapo cha nguma seji koni ini neresimieghe na kusea kidombo andwamweri na Aba kwa kifumbi chake cha nguma.

²² Uo uko na kudu, ndesikire agho malagho Roho ughighoriagha agho makanisa.”