WUFUNUO 18 - Biblia Ilagho Jiboie Kwa Wandu Wose

Kughwa kwa Babuloni

¹ Nyuma ya agho, nerewonieghe malaika ukisea kufuma mlungunyi, uko na nguma mbaa; na ndoenyi kukalangalishirwa mwengere ni wubaa ghwake.

² Ukaghora kwa lwaka lubaa nandighi ukighamba, “Ghwaghue, ghwaghue, ugho Babuloni m'baa! Ghwawurie malalo gha pepo, andu kwa kula roho mbiwi, na wulalo ghwa kula nyonyi mbiwi, izamie;

³ angu mbari rose ramerie kunywa iyo divei ya bea rake riseelie, na wazuri wa ndoenyi wabonyere wulaki nao, na washami wa ndoenyi wapatire mali kwa wumalaya ghwake.”

⁴ Niko ngasikira lwaka luzima kufuma mlungunyi lukighamba, “Fumenyi kwake wandu wapo, msecheka ngara na kaung'a rake, mchekabwa sa uo moni;

⁵ angu kaung'a rake rachua, rajoka ighu, rikakatana na mlungunyi; na Mlungu waghikumbuka mawiwi ghake.

⁶ M'bonyerenyi sa iji koni uo orebonyereghe, na kumlipa mando awi kwa wundu ghwa mabonyo ghake; mranganyirenyi ngwaro yake, irudie mando awi, kuchumba seji orebonyereghe.

⁷ Sa iji koni orekukasireghe moni ukibonya wumalaya, huwo koni mnekenyi icho kipimo cheni cha matiriro na wasi. Na kwa kukaia waawuyaghamba ngolonyi kwake, ‘Ini ne malkia niko kidombo, siko mka mkiwa ungi, hata sichaawona wasi jingi;’

⁸ kwa huwo makabo ghake ghichacha kwa ituku jimweri; wukongo, wasi, na njala. Nao uchakorwa na modo, angu uo Bwana Mlungu umtanyagha, wawadie ndighi nyingi.”

⁹ Na awo wazuri wa ndoenyi werekoghe wikilaka na kubonya wumalaya nao, wichamlilia na kukema mchungu iji waghuwona mosi ghwa modo ghumkoragha;

¹⁰ nawo wichakaia kimusi kokula, wikiobua agho matiriro ghake na kughamba, “Weei! wee ngai muzi m'baa! Oho muzi m'baa Babuloni! Kutanywa kwako kwaacha kwa saa imweri woruwu.”

¹¹ Na washami wa ndoenyi walila na kukema mchungu, kwa kukaia mndungi ndewueghua vilambo vawo;

¹² ivo vilambo dhahabu, feza, almasi, na lulu; nguwo ra kitani ndicha, ra zambarau, ra hariri na ritinikie; kula kichuku cha mudi ghwa marashi, vombo vose vibonyero kwa mbembe ra chovu, na vombo vose vibonyero kwa mbau ra zoghori mbaa; shaba, chuma, na magho ghighokie;

¹³ mdalasini, vilungo, marumba, manemane, ubani, divei, mavuda, mufu ghwa ngano, na ngano; ng'ombe, ng'ondi, farasi, na magare gha chuma, na wazumba, nawo ni wandu.

¹⁴ Na awo washami waghamba, “Fwaida yose korekoghe na bea nayo, yakuinjikia; manori ghako ghose na wubaa ghwako, vakulagharia; na jingi ndekuchaaviwona sena!”

¹⁵ Awo washami werepatireghe mali kufuma kwa uo muka, wichakaia kimusi kokula kwa kuobua matiriro ghake, wikilila na kukema mchungu m'baa,

¹⁶ “Ai, wee ngai muzi m'baa ghwa Babuloni! Ugho ghorerushiroghe nguwo ra kitani ndicha, zambarau, na iro ritinikie; muzi ghorepambiloghe kwa dhahabu, almasi, na lulu!

¹⁷ Mali yose ihi yaalaghaya kwa sa imweri.” Na vilongozi va meli vose, na wandu wikaiagha baharinyi, na awo wibonyagha kazi melinyi, na awo wose wishamagha baharinyi wikakaia kimusi kokula,

¹⁸ wikakema wikizighanira ugho mosi ghwa kukorwa kwake wikighamba, “Ni muzi ghuao ghudimagha kufwanana na ugho muzi m'baa ghwa Babuloni?”

¹⁹ Hata iji werekoghe wikilila na kukema mchungu, wikakudunga teri vongonyi kwawo wikighamba, “Weei! Wee ngai Babuloni ghuja muzi m'baa! Andu wandu wose werekoghe na meli baharinyi, wereshamieghe kwa mali rake! Na kwa saa imweri ghwameria kusia putu!

²⁰ Boilonyi aighu yake inyo mlungunyi, inyo waeli, wadumi na walodi; angu Mlungu wamtanya kwa wundu ghonyu.”

²¹ Niko malaika uwadie ndighi ukawada igho sa igho ibaa jesha, ukajikumba baharinyi ukighamba, “Huwo niko ugho muzi ghwa Babuloni ghuchaaghushwa kwa ndighi; nagho ndeghuchaawoneka sena anduangi.

²² Na chwaka ra wandu wikabagha ngoma, firimbi na awo wikabagha tarumbeta, nderichaasikirika andenyi kwako; na mafundi gha wufundi ugho ghose ndeghichaawoneka andenyi kwako, hata lwaka lwa igho jesha, ndeluchaasikirika andenyi kwako,

²³ na mwengere ghwa taa, ndeghuchaang'ala-ng'ala andenyi kwako, hata lwaka lwa mmbusi muka na uo ulowolwagha, ndeluchaasikirika andenyi kwako sena anduangi. Angu washami wako werekoghe wandu wabaa wa ndoenyi, na wandu wa mbari rose werekaliloghe kwa wusawi ghwako.

²⁴ Na bagha ya walodi, na waeli, na awo wose werebwaghiloghe ndoenyi, erewonekieghe andenyi kwako.”