WATANYI 3 - Biblia Ilagho Jiboie Kwa Wandu Wose

Iro mbari reresigharikieghe isangenyi

¹ Idana, iri niro mbari BWANA orerisighieghe, eri upate kuwitima Waisraeli awo wiserewonieghe wuda ghungi ghwa Kanaani.

² BWANA orebonyereghe huwo, eri upate kufundisha kula kivalwa cha wandu wa Israeli wimanye kulwa wuda, kuchumba na ndighi awo jingi wiserewonieghe wuda.

³ Iro mbari reresigharikieghe isangenyi ni wabaa wasanu wa Wafilisti, Wakanaani wose, Wasidoni, na Wahivi awo werekoghe wikikaia mighondi ya Lebanoni, kufuma Mghondi ghwa Baal-herimoni, hata Mbenge ya Hamathi.

⁴ Wandu awo weresighiloghe kwa kuwitima Israeli ngera loli wichasikira Sharia ra BWANA iro orewinekieghe weke ndee kwa chia ya Musa.

⁵ Kwa huwo wandu wa Israeli wikadua aghadi ya Wakanaani, Wahiti, Waamori, Waperizi, Wahivi, na Wajebusi.

⁶ Wikaloworana na kutasa milungu yawo.

Othinieli

⁷ Wandu wa Israeli wikamliwa BWANA Mlungu wawo, wikam'bonyera kaung'a kwa kutasa weke Baali na Maashtorethi.

⁸ Kwa huwo BWANA ukajokwa ni machu aighu ya Waisraeli, ukawifunya wikabo na kusimwa ni mzuri Kushani-rishathaimu wa Mesopotamia; ukawibonyera nguma kwa miaka wunyanya.

⁹ Niko Waisraeli wikamkemia BWANA, nao ukawineka mundu owikira, nao ni Othinieli mwana wa Kenazi mruna mtini wa Kalebu.

¹⁰ Roho wa BWANA ukamchea aighu yake, nao ukawuya mtanyi wa Waisraeli; ukaghenda wudenyi, na BWANA ukamneka wusimi aighu ya mzuri wa Mesopotamia.

¹¹ Isanga jikakaia na sere kwa miaka mirongo ina; niko Othinieli ukafwa.

Ehudi

¹² Wandu wa Israeli wikam'bonyera Mlungu kaung'a sena; na kwa wundu ugho, BWANA ukam'bonya mzuri Egloni wa Moabu ukaie na ndighi kuwichumba awo.

¹³ Egloni ukawadana na Waamoni na Waamaleki, wikawisima Waisraeli na kuwada ugho muzi ghwa mitende.

¹⁴ Waisraeli wikabonyerwa nguma ni Egloni kwa miaka ikumi na wunyanya.

¹⁵ Niko Waisraeli wikamkemia BWANA, nao ukawineka mundu owikira, Ehudi, mundu wa mkonu ghwa kimoso, mwana wa Gera, kufuma mbari ya Benjamini. Wandu wa Israeli wikamduma ughenje manosi ghawo kwa Egloni mzuri wa Moabu.

¹⁶ Ehudi orekoghe wakubonyera moni lufu lukalie chia rose luko na wulacha ghwa sentimeta mirongo misanu ukalufunganya na marwao ghake barenyi ya mkonu ghwa kiwomi.

¹⁷ Ukafunya agho manosi kwa Egloni mzuri wa Moabu. Egloni orekoghe mundu ubandie na ndighi.

¹⁸ Hata iji Ehudi wameria kufunya agho manosi, ukawisigha awo wandu wereghidukieghe agho manosi wighende chia rawo.

¹⁹ Ela Ehudi moni uendavika andu magho ghiwachwagha aja Gilgali, ukawuya nanyuma; ukacha kwa Egloni ukamzera, “Neko na ilagho ja siri kwako ee mzuri.” Nao mzuri ukafunya momu, “Nyamenyi kima mdineke wulalo.” Na wadumiki wake wose wikafuma na kumsigha uekeri.

²⁰ Niko Ehudi ukamchea uko kidombo uekeri andenyi ya chumba chake cha mbeo, ukamzera, “Neko na malagho ghafuma kwa Mlungu kwa wundu ghwako.” Nao mzuri ukawuka kimusi.

²¹ Nao Ehudi ukamsoghodera, na kwa mkonu ghwake ghwa kiwaka ukalukua luja lufu oreluvisireghe barenyi kwake ya mkonu ghwa kiwomi, ukamdunga mzuri kifunyi kwake.

²² Lufu lose lukangia nokondenyi chiaimweri na mbela yaro; na ghaja masunya ghikafindika jija ilanga, kwa kukaia Ehudi nderelukueghe ulo lufu, nalo lukafuma nanyuma.

²³ Niko Ehudi ukafuma, ukarugha mnyango na kufuli;

²⁴ ukaghenda. Awo wadumiki wikacha, hata iji wawona mnyango ghwa icho chumba ghurughilo, wikaririkanya, “Kewada mzuri waawuyakuhoresha andenyi ya chumba chake cha mbeo.”

²⁵ Wikaweseria wei urughua mnyango hata wikafwa ngolo; nao iji wawona angu nderughuagha mnyango, wikashoa mfunguo na kughurughua; wikammbona bwana wawo andonyi wameria kufwa.

²⁶ Ehudi ukakimbia ngelo yose werekoghe wikiweseria, ukaghenda hata ukaidia ghaja magho ghiwachilo, ukafufunuka kwa kukimbiria Seira.

²⁷ Hata iji orevikieghe isanga ja mighondinyi ja Efraimu, ukakaba tarumbeta kuwiwanga wandu wa Israeli kwa wuda; ukawighenja nokoisi kufuma mighondinyi.

²⁸ Ukawizera, “Ninughenyi! BWANA wameria kumneka wusimi aighu ya wamaiza wenyu awo Wamoabu.” Niko wikamnugha, wikasea mghondinyi na kuwada ijo iruwuko ja Jordani, hata ndeweremsighieghe mndungi uruwuke anduangi.

²⁹ Ituku ijo wikabwagha masikari ghiko mang'oni gha Wamoabu sa elfu ikumi, hata ungi wa awo masikari nderefufunukieghe anduangi.

³⁰ Ituku ijo Waisraeli wikawisima Wamoabu, na isanga jikakaia na sere kwa miaka mirongo wunyanya.

Shamgari

³¹ Nyuma ya Ehudi, ukacha Shamgari mwana wa Anathi. Nao moni orewikirieghe Waisraeli kwa kuwibwagha Wafilisti maghana arandadu kwa zobo elisha ng'ombe. Nao moni wori orewikirieghe Waisraeli.