WAROMA 9 - Biblia Ilagho Jiboie Kwa Wandu Wose

Mlungu na wandu wake

¹ Naawuyaghora loli andenyi ya Kristo siwueghora tee anduangi; nia yapo wori ikibonyerwa nguma ni Roho Mweli yawuyanishuhudia;

² kukaia neko na wasi m'baa na ndighi, na kuwawa kusesiagha ngolonyi kwapo.

³ Angu niawona kumangu ini moni nawasirwa njowe na kutanywa na Kristo kwa wundu ghwa wanidu, wandu wa mbari yapo cheni.

⁴ Awo ni Waisraeli, na uko kubonywa kukaia wana wa Mlungu ni kwawo, na wubaa ni ghwawo, na ilaghano ni jawo, na uko kunekwa Sharia ni kwawo, na wutasi ni ghwawo, na malaghiro ni ghawo;

⁵ na awo weke wawa ni wawo, na kufuma kwawo orevaloghe Kristo kwa chia ya mumbi. Mlungu uo uko aighu ya vose ndekaso kwa kala na kala. Amen.

⁶ Si angu wei ilagho ja Mlungu jeelemwa, ela ni angu awo wose wiko wa kivalwa cha Israeli si wose wiko Waisraeli anduangi;

⁷ hata si wose wiko wa kivalwa cha Abrahamu wiko wana wake wa loli anduangi, ela Mlungu odemzera, “Kivalwa chako chichawangwa kwa Isaaka.”

⁸ Huwu ni kughamba, si wana wivalo kwa chia ya mumbi wikaiagha wana wa Mlungu, ela wana wa ilaghiro niwo witalikagha kukaia kivalwa.

⁹ Angu ilaghiro jiaghamba huwu, “Nichawuya ngelo sa ihi cheni, na Sara uchapata mwana.”

¹⁰ Hata si huwo koni kuekeri anduangi, ela wokoni Rebeka, iji orepatireghe kifu cha masa na mndwawomi umweri wawa odu Isaaka,

¹¹ hata ngera saki wana ndewerevaloghe, na kubonya ilagho jingi icha angu iwiwi, eri mpango ghwa Mlungu ghosaghua ghuende imbiri, si kwa wundu ghwa mabonyo, ela kwa wundu ghwa kuwangwa kwake;

¹² Rebeka orezereloghe, “M'baa uchamdumikia uo mtini.”

¹³ Sa iji koni iandikilo, “Neremkundieghe Jakobo ela Esau ukanizamia.”

¹⁴ Da dighora wada? Dighambe Mlungu ndena hachi? Hata kutini.

¹⁵ Angu oremzerieghe Musa, “Nichamfuya wughoma uo nikunde kumfuya wughoma, na kummbonia wughoma uo nikunde kummbonia wughoma.”

¹⁶ Kwa huwo maza nderikaiagha kwa kukunda angu kwa kufunga ndighi kwa mdamu, ela ni kwa wughoma ghwa Mlungu.

¹⁷ Angu Maandiko ghaghora huwu kwa Farao, “Nakuwikie kukaie m'baa, kwa wundu ghwa kuriwonyera ndighi rapo kwako; eri irina japo jieresho ndoenyi kose.”

¹⁸ Niko huwu Mlungu wadamfuya wughoma uo ose seji ukundagha, na kumkurisha ngolo uo ose seji ukundagha.

Machu gha Mlungu na wughoma ghwake

¹⁹ Idana oho kwadima kunizera, “Welee, kwaki Mlungu uduagha kidifunya makosa? Angu, nani udimagha kutangala lukundo lwa Mlungu?”

²⁰ Oho nani ee mdamu kudimagha kumtumbulia Mlungu? Nyungu ya wongo yadima kumkotia uo uivimbie, “Kwaki kunivimbie wa huwu?”

²¹ Welee, mvimbi ndeko na nguma aighu ya wongo kubonya kilambo chimu chighokie, na chimu chiseghokie kufumanya na jija idonge jeni jimweri ja wongo anguwada?

²² Ni huwo koni ikaie kwa Mlungu. Odekunda kuwonyera machu ghake, na kubonya ndighi rake rimanyike. Ela orekoghe na irumaghio ibaa, ukirumaghianya na waja werewikiloghe kwa wundu ghwa machu ghake; awo weretanyiroghe wipate kutoteshwa.

²³ Na wokoni orekundeghe kuwonyera wungi ghwa wubaa ghwake, ugho ghorediriloghe aighu yedu isi derewikiloghe kwa wundu ghwa wughoma ghwake; wandu dibonyero tayari kufuma koimbiri, kughuwusa wubaa ghwake.

²⁴ Angu isi de awo wandu orediwangieghe, si kufuma kwa Wayahudi weni wiekeri, ela hata na kufuma kwa awo wandu wa mbari zima wori.

²⁵ Sa iji koni waghamba chuonyi kwa Hosea, “Awo wiserekoghe wandu wapo, nichawiwanga ‘Wandu wapo’, na uo userekoghe mkundwa, nichammbanga ‘Mkundwa wapo.’

²⁶ Na aja koni ighorelo, ‘Inyo ndemko wandu wapo’, wichawangwa ‘Wana wa Mlungu uko moyo.’”

²⁷ Isaya nao waghora kwa lwaka lubaa aighu ya Israeli ukighamba, “Hata ngera mtalo ghwa wana wa Israeli ni sa msangagha ghwa baharinyi, ela ni awo watini tu wichaasigharika niwo wichaakia.

²⁸ Angu Bwana uchakukatisha kutanya kwake aighu ya wurumwengu ghose shwa wori.”

²⁹ Ni sa iji koni Isaya orezoeghe ukaghora, “Ngera Bwana wa majeshi useredisigharieghe kivalwa, kumangu daakaia sa Sodoma na kubonywa sa Gomora.”

Waisraeli na Ilagho Jiboie

³⁰ Da dighora wada? Diaghora, wandu wa mbari zima awo wisereilolieghe hachi, waipatire; uko kutalwa kukaia na hachi kupatikagha kwa chia ya irumirio.

³¹ Ela Waisraeli awo wereilolieghe hachi kwa chia ya Sharia, walemelo ni kukatisha iyo Sharia.

³² Kwaki? Ni angu wereilolieghe kwa chia ya mabonyo wulalo ghoilola kwa chia ya irumirio. Kwa huwo wikaakuwa aighu ya ijo igho jekuwisha

³³ seji iandikilo, “Ola niawika igho Sioni, ijo jichaawikuwara wandu; lwala ulo luchaawighusha, na uhu urumiriagha kwake, ndechaafushwa waya anduangi.”