WAROMA 8 - Biblia Ilagho Jiboie Kwa Wandu Wose

Kukaia moyo kwa ndighi ra Roho Mweli

¹ Kwa huwu idana, ndekuwadie kutanywa kungi kwa awo wiko andenyi ya Kristo Jesu.

² Angu ija Sharia ya Roho wa irangi jiko andenyi ya Kristo Jesu, yanibonyere nisekaie aisi ya sharia ya kaung'a na kifwa.

³ Angu agho ghiseredimikieghe kwa Sharia, kwa kukaia erekoghe isewadie ndighi kwa wundu ghwa mumbi, Mlungu kwa kumduma Mwana wake moni uko na fwana ya mumbi ghwa kaung'a, ukaie kizongona kwa wundu ghwa kaung'a, waitanyire kaung'a mumbinyi.

⁴ Mlungu oobonya huwo, eri iro maza ra hachi rikundwagha ni Sharia, ripate kukatishwa andenyi kodu isi dawuyaghenda kwa Roho hata si kwa mumbi anduangi.

⁵ Angu awo wawuyakaia moyo wikighenjwa ni mumbi, wadaririkanya ra mumbi; ela awo wawuyakaia moyo wikighenjwa ni Roho, wadaririkanya ra Roho.

⁶ Angu kuririkanya ra mumbi ni kifwa, ela kuririkanya ra Roho ni irangi na sere.

⁷ Kwa kukaia mundu uririkanyagha ra mumbi ni m'maiza wa Mlungu; angu ndeusikiragha Sharia ya Mlungu, nao loli ndeudimagha kuisikira anduangi;

⁸ na awo winughagha ra mumbi, ndewidimagha kumrira Mlungu anduangi.

⁹ Ela inyo ndemuwuenugha ra mumbi, mwaawuyanugha ra Roho; ikakaia loli Roho wa Mlungu wawuyakaia andenyi konyu. Ngera mndungi wasowa Roho wa Kristo andenyi kwake, ndeuko wake anduangi.

¹⁰ Ela ngera Kristo oko andenyi konyu, hata ngera mimbi yenyu yafue kwa wundu ghwa kaung'a, ela Roho ni irangi angu mpatanishiro na Mlungu.

¹¹ Ikakaia Roho wa Mlungu uo oremrukishireghe Jesu kufuma kwa wafu wakaiagha andenyi konyu, uo Mlungu oremrukishireghe Kristo kufuma kwa wafu, uchaikaisha moyo mimbi yenyu ifwagha kwa chia ya Roho wake uo ukaiagha andenyi konyu.

¹² Kwa huwu wanidu, deko na ilagho jebonya si kughenda seji mumbi ghukundagha,

¹³ angu mkakaia moyo mkighenda seji mumbi ghukundagha mchafwa; ela mkaghibwagha mabonyo gha mumbi kwa Roho, mchakaia moyo.

¹⁴ Angu awo wose wighenjwagha ni Roho wa Mlungu niwo wana wa Mlungu.

¹⁵ Kwa kukaia ndemorewusireghe Roho wa wuzumba sena um'bonyagha kuobua, ela morewusireghe Roho um'bonyagha kukaia wana wa Mlungu, udidimishagha kummbanga, “Abba! Aba.”

¹⁶ Uja Roho moni washuhudia andwamweri na roho redu kukaia deko wana wa Mlungu,

¹⁷ na ikakaia diko wana, de wandu wa ifwa, wandu wa ifwa wa Mlungu, na wangara wa ifwa andwamweri na Kristo; ikakaia datirirwa andwamweri nao, eri diwonekaswa andwamweri nao wori.

Ghuja wubaa ghuchagha

¹⁸ Nawona angu matiriro gha ngelo ihi ndeghidimagha kukatanishwa na ghuja wubaa ghuchaafunukulwa kodu anduangi.

¹⁹ Angu vilambo vose viumbilo vawesera kwa bea mbaa kuja kufunukulwa kwa wana wa Mlungu.

²⁰ Angu ivo vilambo verewikiloghe vikaie visewadie ndighi ringi; si kwa kukunda kwawo koni anduangi, ela kwa kukunda kwa Mlungu, uo oreviwikieghe vikaie vesuwiriagha

²¹ kukaia, ivo vilambo veni vichafunywa andenyi ya wuzumba ghwa kuwoa, vipate wuhuru ghwa wubaa ghwa wana wa Mlungu.

²² Isi damanya angu vilambo vose viumbilo vasoria ngolo chiaimweri kwa kuwawa sa kukumba lufu kwa kuva hata idana;

²³ na si ivo vilambo viekeri anduangi, ela hata isi wori diko na mavalo gha imbiri gha uo Roho, dasoria ngolo andenyi kodu, dikiwesera kuja kubonywa kukaia wana wa Mlungu, nako niko kuja kukombolwa kwa mimbi yedu.

²⁴ Angu deekirwa kwa ijo isuwirio; ela isuwirio jiwonekagha si isuwirio jingi. Nani usuwiriagha icho wawuyachiwona?

²⁵ Ela ngera dasuwiria icho disewuechiwona, dachiweseria kwa kurumaghia.

²⁶ Huwo koni uja Roho waditesia wunyonge ghodu; angu isi ndediichi kulomba seji ifwanagha, ela uja Roho moni wadilombia kwa kusoria ngolo kubaa kuseghorekagha.

²⁷ Na Mlungu uo uzighanagha ngolo ra wandu wamanya seji Roho ukundagha, angu uo Roho wadawilombia waeli karakara na seji Mlungu ukundagha.

²⁸ Isi damanya angu kwa maza rose Mlungu wadabonya kazi chiaimweri na awa wimkundagha kwa kureda mecha; awo orewiwangieghe kunughana na kukunda kwake.

²⁹ Awo orewimanyireghe kufuma imbiri, orewisaghueghe wipate kufwanana na Mwana wake moni, eri Mwana upate kukaia wa imbiri kuvalwa aghadi ya wanidu wengi.

³⁰ Na awo Mlungu orewisaghueghe, awo ukawiwanga, ukawitala kukaia na hachi, na awo orewitalieghe kukaia na hachi, awo wori ukawineka wubaa.

Lukundo lwa Mlungu andenyi ya Kristo Jesu

³¹ Dighora wada idana aighu ya maza iri? Ikakaia Mlungu uko cha kodu nani udimagha kuditangala?

³² Uo useremmbonieghe wughoma Mwana wake moni, ela ukamfunya kwa wundu ghodu isi diwose, uchalegha wada kudineka vindo vose andwamweri nao?

³³ Nani uchaawishitakia wasaghulwa wa Mlungu? Mlungu nuo uwitalagha kukaia na hachi;

³⁴ nani uwitanyagha? Ni Kristo Jesu umoni orefueghe? Ee, umoni orerukishiroghe kufuma kwa wafu, sena uko kidombo chia ya mkonu ghwa kiwomi ghwa Mlungu ukidilombia na ndighi?

³⁵ Nani uchaaditanya na lukundo lwa Kristo? Ni matiriro, angu wasi, angu kutirirwa, angu njala, angu zuna, angu ndengwa, angu kubwaghwa?

³⁶ Sa iji iandikilo, “Ngelo rose deeka ndengonyi ebwaghwa kwa wundu ghwako; Dawoneka sa ng'ondi riendaachinjwa.”

³⁷ Hata! Ela isi dapatire wusimi m'baa nandighi aighu ya iri maza rose kwa wutesia ghwake uo oredikundieghe.

³⁸ Angu namanya loli putu, kifwa, hata irangi, hata weke malaika, hata mawubaa, hata maza riko idime, hata iro richagha,

³⁹ hata ndighi ringi zima ra mlungunyi, hata wurumwengu ghwa aighu, hata wurumwengu ghwa aisi, hata kilambo chiumbilo chingi, ndechichaadima kuditanya na lukundo lwa Mlungu, ulo luko andenyi ya Kristo Jesu Bwana odu anduangi.