WAROMA 16 - Biblia Ilagho Jiboie Kwa Wandu Wose

Voro kwa umu umu

¹ Nammanyisha mwanidu Fibi konyu, mdumiki wa ikanisa ja Kenkrea.

² Mmbusenyi kwa wundu ghwa Bwana, sa iji koni iwifwane waeli; mumtesie kwa ijo jose uchaakunda konyu, angu nao moni wawiteserie wandu wengi hata ini moni wori.

³ Wiroghuonyi Prisila na Akula, wabonyi kazi andwamweri nani andenyi ya Kristo Jesu;

⁴ awo werekungirieghe ndengonyi ya kufwa kwa wundu ghwapo; nani nawifunyira chawucha, hata si ini moni niekeri anduangi, ela na makanisa ghose gha wandu wa mbari zima ghafunya chawucha.

⁵ Mujiroghuo wori ijo ikanisa jiko nyumbenyi kwawo. Mroghuonyi mkundwa wapo Epaineto, uo orekoghe wa imbiri kumghalukia Kristo isanga ja Asia.

⁶ Mroghuonyi Maria uo orebonyereghe kazi kwa kufunga ndighi aghadi konyu.

⁷ Wiroghuonyi Androniko na Junia, wandu wa mbari yapo na wafungwa andwamweri nani; ni wandu wimanyikie kwa wadumi, nawo werezoeghe kumghalukia Kristo imbiri niseghalukie.

⁸ Mroghuonyi Ampiliato, mkundwa wapo kwa Bwana.

⁹ Mroghuonyi Urubano, m'bonyi kazi andwamweri nesi kwa kazi ya Kristo, na mkundwa wapo Staku.

¹⁰ Mroghuonyi Apele, uo urumirikie kwa Kristo. Wiroghuonyi wandu wa nyumba ya Arstobulo.

¹¹ Mroghuonyi Herodioni, mundu wa mbari yapo. Wiroghuonyi wandu wa nyumba ya Narkso awo wiko andenyi ya Bwana.

¹² Wiroghuonyi Trufene na Trufosa, waja wabonyi kazi andenyi ya Bwana. Mroghuonyi mkundwa Perisi, uo orebonyereghe kazi ya Bwana kwa kufunga ndighi.

¹³ Mroghuonyi Rufo, uo umanyikie andenyi ya Bwana, na mae, nao ni mao wori.

¹⁴ Wiroghuonyi Asinikrito, Filigona, Herme, Patroba, Herma, na wanidu awa wikwanye.

¹⁵ Wiroghuonyi Filologo, Julia, Nerea, na mruna wa waka, na Olimpa, na waeli wose wikwanye.

¹⁶ Roghuanenyi mmbeni na mmbeni kwa msusugho ghuelie; makanisa ghose gha Kristo ghamroghua.

Mawonyero gha kutua

¹⁷ Namvoya wanidu, mukumanye na awo wiredagha mawaghanyiko na wasi, kwa kulwa na mafundisho agho morefundishiroghe; mkutanye nawo.

¹⁸ Angu wandu sa awo ndewimdumikiagha Bwana odu Jesu Kristo, ela wadadumikia vifu vawo veni; na kwa malagho ghidendere ghesesea-sesea, wawikalia wandu wisemanyagha.

¹⁹ Wandu wose waichi inyo ni wandu msikiragha, nani naboilwa kwa wundu ghonyu; ela nakunde mmanye ijo jiko icha jisewadie wukalo, na ijo jiko iwiwi wori.

²⁰ Na Mlungu uo uredagha sere uchamfasha Shetani aisi ya maghu ghenyu kafwani. Mvono ghwa Bwana Jesu Kristo ndeghukaie andwamweri nenyo.

²¹ Timotheo, m'bonyi kazi andwamweri nani, wamroghua; na Lukio, na Jasoni, na Sosipatro, wandu wa mbari yapo.

²² Ini Tertio, muandiki wa barua ihi, namroghua andenyi ya Bwana.

²³ Gayo, uhu unikaribishire, na ikanisa jose, wamroghua. Erasto, mmbiki pesa wa muzi, na mwanidu Kuarito, wamroghua. [

²⁴ Mvono ghwa Bwana odu Jesu Kristo ndeghukaie andwamweri nenyo mmbose. Amen]

Malombi na makaso ghemeria

²⁵ Idana kwa Mlungu uo udimagha kummangisha andenyi ya irumirio jenyu, karakara na ijo Ilagho Jiboie nawuyajichila ja Jesu Kristo, na karakara na wufunuo ghwa ija ngasu, iyo erevisikieghe kwa ngelo ndacha iidie;

²⁶ ela idana yamerie kufunukulwa worinyi kwa chia ya maandiko gha walodi, na kumanyishwa kwa mbari rose, karakara na momu ghwa Mlungu wa kala na kala, ghoreda uko kusikira kwa chia ya irumirio;

²⁷ kwake uo Mlungu wa hikima uekeri, ndeghukaie wubaa kwa kala na kala, kwa Jesu Kristo! Amen.