WAROMA 12 - Biblia Ilagho Jiboie Kwa Wandu Wose

Irangi andenyi ya wudumiki ghwa Mlungu

¹ Kwa huwu wanidu, namvoya kwa wundu ghwa wughoma mungi ghwa Mlungu, muifunye mimbi yenyu ikaie sa kizongona chiko moyo; chielie, chirumirilwagha ni Mlungu; nako niko kutasa konyu kwa loli.

² Msakekufwananisha mmbeni na wurumwengu ughu, ela mghalulo kwa chia ya akili renyu kubonywa mbishi; mpate kumanya lukundo lwa Mlungu; niki chiboie, chirumirikiagha, na chiko chikatie.

³ Angu kwa ugho mvono ninekelo, namzera kula mundu uko aghadi konyu, usakekujosa uo moni kuchumba seji imfwanagha; ela ukutale karakara na seji Mlungu umnekie ijo irumirio.

⁴ Angu sa iji koni mumbi ghuko na via vilazi, na via vose ndevibonyagha kazi rifwanane,

⁵ niko koni na isi; hata ngera deko wengi, ela de mumbi ghumweri andenyi ya Kristo, na via chimu chimu kula mundu na mmbao.

⁶ Nesi dikikaia na manosi ghisefwanane, karakara na ugho mvono dinekelo, ndedighitumie; ngera ni wulodi, dibonye karakara na irumirio jedu;

⁷ ngera ni wudumiki, ndedidumike; uo ufundishagha, ndefundishe;

⁸ uo ukumbagha ngolo, ndekumbe ngolo; uo ufunyagha, ndefunye kwa wungi; uo utesiagha, ndetesie kwa ngolo, uo ubonyagha nguma, ndebonye kwa kufunga ndighi; na uo uko na wughoma, ndefuye wughoma kwa kuboilwa.

⁹ Lukundo lusekaie loja kuwi; mzamilo ni kiwiwi, mmaziriane na icho chiko chiboie.

¹⁰ Kundanenyi mmbeni na mmbeni kwa lukundo lwa ngolonyi; kula mundu ndemtale mmbao kukaia wa imbiri kwa ishima.

¹¹ Mfunge ndighi, msewuye nyuma jingi, mkiaka modo ghwa Roho na kumdumikia Bwana.

¹² Boilonyi andenyi ya isuwirio jenyu, rumaghienyi wasi, lombenyi Mlungu tulituli.

¹³ Funyenyi manosi kwa wundu ghwa waeli, mkulisishe kukaribisha waghenyi.

¹⁴ Rasimienyi awo wimtiriragha; rasimienyi hata msakewasira njowe.

¹⁵ Boilonyi andwamweri na awo wiboilwagha, lilenyi andwamweri na awo wililagha.

¹⁶ Kaienyi na kuchinana mmbeni na mmbeni; msakekukasa, ela muwibonyere nicha awo wiko wanyonge; jingi msebando ni chongo.

¹⁷ Msakemlipa mndungi kiwiwi kwa kiwiwi, ela mririkanye iro riko ndicha imbiri ya wandu wose.

¹⁸ Timenyi seji mdimagha kukaia na sere na wandu wose.

¹⁹ Wakundwa, jingi mselipie ngenga, ela msighie machu gha Mlungu wulalo; angu yaandikilo, “Ngenga ni yapo, ini nichalipa; waghamba Bwana.”

²⁰ Wulalo ghwaro, seji Maandiko ghighambagha, “M'maiza wako ukazughwa, mneke vindo; ngera waoma, mneke machi; angu kwa kubonya huwo, uchawona waya m'baa sa maka gha modo chongonyi kwake.”

²¹ Msesimo ni kiwiwi ela mchisime kiwiwi kwa wucha.