WAROMA 1 - Biblia Ilagho Jiboie Kwa Wandu Wose

¹ Ini Paulo, mdumiki wa Jesu Kristo, niwangilo nikaie mdumi na kuwikwa kwa wundu ghojichila Ilagho Jiboie ja Mlungu.

² Ijo orejilaghirieghe koimbiri kwa chia ya walodi wake andenyi ya Maandiko Ghielie.

³ Ijo Ilagho Jiboie ja Mwana wake, uo orevaloghe wa mbari ya Daudi kwa chia ya mumbi;

⁴ na kwa chia ya wueli ghwake ghwa wulungu, orewonyeroghe kukaia Mwana wa Mlungu kwa ndighi mbaa, kwa uko kurukishwa kwake kufuma kwa wafu, uo Jesu Kristo Bwana odu.

⁵ Kwa chia yake uo, isi dapatire mvono na wudumi ghowibonya wandu wa mbari rose wipate kusikira kwa uko kurumiria kwa wundu ghwa irina jake;

⁶ chiaimweri na inyo mmbeni mmbangilo mkaie wandu wa Jesu Kristo.

⁷ Namuandikia inyo wakundwa wose wa Mlungu muko Roma, muwangilo mkaie waeli. Mvono ndeghukaie konyu na sere ifumagha kwa Mlungu Aba odu na kwa Bwana Jesu Kristo.

Malombi ghefunya chawucha

⁸ Ilagho ja imbiri, namfunyira Mlungu wapo chawucha kwa chia ya Jesu Kristo kwa wundu ghonyu inyo mmbose; angu irumirio jenyu jaghorwa wurumwengunyi kose.

⁹ Mlungu, uo nimdumikiagha kwa ngolo yapo yose ngijichila ijo Ilagho Jiboie ja Mwana wake, nuo mshahidi wapo kukaia, nadamkumbuka inyo matuku ghose kwa malombi ghapo;

¹⁰ ngilomba ikadimika kwa chia ingi, niche konyu Mlungu ukakunda.

¹¹ Neko na bea mbaa emmbona, eri nipate kummbaghia inosi jingi ja kiroho jemmangisha;

¹² huwo ni kughamba, dipate kukummbana ngolo diweni na diweni kwa irumirio jenyu na japo.

¹³ Wanidu, nakundeghe mmanye angu kalazi koni nerekundieghe kucha konyu, (ela ikalemeka) eri nipate warumirii wamu aghadi konyu seji koni nipatire wamu wa mbari zima wori.

¹⁴ Nakaia msile odumikia Wagriki, na wasezi; wandu wa hikima, na awo wisene hikima.

¹⁵ Kwa huwo nakunde kujichila Ilagho Jiboie konyu inyo muko Roma wori.

Ndighi ra Ilagho Jiboie

¹⁶ Angu ini sijiwoniagha waya Ilagho Jiboie, kwa kukaia ni ndighi ra Mlungu remkira mundu uo ose urumiriagha; kwa Myahudi kande, na kwa Mgriki wori.

¹⁷ Angu hachi ya Mlungu yafunukulwa andenyi yaro kwa chia ya irumirio kuvikia irumirio; sa iji koni iandikilo, “Uo utalwagha kukaia na hachi kwa chia ya irumirio, uchakaia moyo.”

Ikosa ja Mdamu

¹⁸ Angu machu gha Mlungu ghafunukulwa kufuma mlungunyi aighu ya kumlegha Mlungu kose, na wuwiwi ghwa wandu awo wiifinikiragha loli kwa wuwiwi ghwawo.

¹⁹ Angu maza rose ridimagha kumanyika aighu ya Mlungu reko worinyi kwawo, kwa kukaia Mlungu wamerie kuwiwonyera.

²⁰ Kufuma Mlungu waumba wurumwengu, ndighi rake ra kala na kala na wulungu ghwake ghusewonekagha, vamerie kuwoneka worinyi kwa chia ya ivo vilambo vibonyero. Kwa huwu, awo wandu ndewiwadie jekudederia anduangi;

²¹ kwa kukaia hata ngera weremmanyireghe Mlungu, ndeweremnekieghe ishima sa Mlungu, hata kumfunyira chawucha anduangi; ela werekoghe na maririkanyo gha duu, na akili rawo ra wukelu rikachulwa nikira.

²² Nawo wikighamba wei wawadie suku, wikawuya wakelu;

²³ na kughuindanisha wubaa ghwa Mlungu usewadie kuwoa kungi, na milimu iko na fwana sa ya wadamu wiwoagha, angu nyonyi, angu nyamandu, angu shimandu riavuagha.

²⁴ Kwa huwu Mlungu ukawisighanya na bea ra ngolo rawo wipate kubonya maza ra wuchafu, hata kuvikia kusowiana ishima kwa mimbi yawo weni na weni.

²⁵ Wikaghalua wuloli aighu ya Mlungu, na kughuwunja tee kwa kutasa na kudumikia kindo chiumbilo wulalo ghwa Muumbi; nao nuo ukaswagha kwa kala na kala! Amen.

²⁶ Kwa wundu ughu, Mlungu ukawisighanya na bea ra waya. Waka wawo wikaghalusa matumio ghawo gha asili kwa matumio ghiseko gha asili.

²⁷ Na wokoni womi wikasigha matumio gha waka gha asili, wikaakiana modo kwa bea weni na weni. Womi wikabonya maza ra waya, womi kwa womi, wikikuredia weni ikabo kwa wundu ghwa mawiwi ghawo.

²⁸ Na kwa kukaia wereleghieghe kumtala Mlungu, Mlungu nao orewisighanyeghe na akili ra kisha na maza risefwane.

²⁹ Wikachulwa ni kula mbari ya wuwiwi; lubando, choyo, na kukita. Wachue iriso, kubwagha, kurashana, wukalo, kuzamiana; na kudedana.

³⁰ Ni wandu wizighirianagha, wizamilwagha ni Mlungu, wishughunukie, wikujosagha, na kukukasa. Wandu wichue sheshe, wisesikiragha wavi,

³¹ wikelie, wiserumirikiagha, wang'eti, wichue kinyanya.

³² Hata ngera waichi wori Mlungu walaghirie kukaia awo wibonyagha maza iro yawifwana kufwa, ndewiwuyeribonya tu, ela warumiriana na awo wiribonyagha wori.