WALAWI 7 - Biblia Ilagho Jiboie Kwa Wandu Wose

Vizongona kwa wundu ghwa makosa

¹ “Ihi niyo sharia ya vizongona kwa wundu ghwa makosa, ni sharia ya wueli loli loli.

² Iyo nyamandu ifunywaghwa kwa wundu ghwa kizongona cha malipo, ichabwaghilwa andu nyamandu rifunyiro kukaia vizongona vekorwa ribwaghilwaghwa; na bagha yaro ichadungwa chuwarunyi rose ra madhabahu.

³ Mavuda gharo ghose ghichainjwa na kufunywa madhabahunyi. Munda, ilala ja mavuda ghifinikire vifu,

⁴ figho iwi na mavuda gharo kufuma kiwonunyi, na kipande chiboie cha idima.

⁵ Mkohani uchavikora aighu madhabahunyi, vikaie kizongona chekora kwa BWANA; ni kizongona cha malipo.

⁶ Kula mundu wa womi uko aghadi ya wakohani wadima kuja iro nyama; richajilwa andu kueleshero, kwa kukaia ni vindo vieleshero loli loli.

⁷ “Sharia ya kizongona kwa wundu ghwa kaung'a na kizongona kwa wundu ghwa makosa ni imweri. Nyama raro richakaia ni ra uo mkohani udumikagha.

⁸ Mrongo ghwa nyamandu ifunyiro ikaie kizongona chekorwa ghuchawuya ghwa mkohani uo wawuyachifunya.

⁹ Kizongona icho chose cha viro viochelo irikonyi, angu kudekwa na sufuria, angu vikangilo na kikango vichawuya va mkohani uo wachifunga kwa BWANA.

¹⁰ Na kula kizongona cha viro chifunyiro chikaiagha chiranganyiro na mavuda angu viseranganyiro, vichawuya va wana wa Haruni, nawo wichawagha wukatane.

Mafunyo gha mapatano

¹¹ “Ihi niyo sharia ya mafunyo gha mapatano ghifunywagha kwa BWANA.

¹² Iji mundu wakafunya kizongona chemfunyira BWANA chawucha, iyo nyamandu ya kizongona uchaifunyanya na mkate ghusewadie chachu ghuranganyiro na mavuda; angu skozi risewadie chachu rishingilo mavuda, angu mikate mitini iboisiro na mufu ghudendere ghuranganyiro nicha na mavuda.

¹³ Na wokoni, chia imweri na icho kizongona chake cha mapatano, uchafunya mkate ghuboisiro na chachu.

¹⁴ Uchafunya mkate ghumweri kwa kula ifunyo, ghukaie ifunyo kwa BWANA; nagho ghuchawuya ifungu ja mkohani uo udungagha bagha ya icho kizongona madhabahunyi.

¹⁵ Na nyama ya icho kizongona chake cha mapatano kwa wundu ghofunya chawucha, ichajighwa ituku jija jeni jefunywa kizongona; nyama ingi iselale hata nakesho.

¹⁶ “Ela ikakaia ifunyo ja kizongona chake ni kwa wundu ghwa ighemi jake, angu kukunda kwake koni, nyama ya icho kizongona yadima kujighwa hata ituku ja kawi;

¹⁷ ela ikasigharika hata ituku ja kadadu, ichakorwa.

¹⁸ Nyama ingi ya icho kizongona cha mapatano isigharikie hata ituku ja kadadu ikajighwa, kizongona cha uo mundu ndechichaarumirilwa hata kutalwa anduangi, chichawuya wuchafu. Na uo ujagha uchawuya mkosi.

¹⁹ Nyama iyo ikaadadana na kilambo chingi chiseelie isejigho, ela ikoro. Awo wose wielie wadima kuja iyo nyama;

²⁰ ela mndungi useelie ukaja iyo nyama ya kizongona cha mapatano chifunyiro kwa BWANA, ndechaatalwa kukaia umu wa wandu wa Mlungu anduangi.

²¹ Na mndungi ukaadada kilambo chingi chiseelie, ikaiagha ni mundu angu nyamandu angu wuchafu ugho ghose, nao uje nyama ya kizongona cha mapatano chifunyiro kwa BWANA, uchatanywa na wandu wake.”

²² BWANA ukamzera Musa,

²³ “Kuwizere wandu wa Israeli huwu, Msakeja mavuda gha ng'ombe, ng'ondi, angu mburi.

²⁴ Mavuda gha nyamandu yafwa cheni, angu yabwaghwa ni nyamandu ya isakenyi, mseje putu; ela mavuda gharo ghadima kutumilwa kwa kazi zima.

²⁵ Uo ose uchaaja mavuda gha nyamandu yafunywa ikaie kizongona chekora kwa BWANA, uchatanywa na wandu wake.

²⁶ Wokoni, andu kose mchaakaia mseje bagha ya nyonyi hata ya nyamandu anduangi.

²⁷ Uo ose uchaaja bagha, uchatanywa na wandu wake.”

²⁸ BWANA ukamzera Musa,

²⁹ “Kuwizere wandu wa Israeli huwu: uo ose ufunyagha kizongona cha mapatano, uchamfunyira BWANA kizongona icho;

³⁰ uchareda mavuda na kidari cha iyo nyamandu kwa mikonu yake moni, na kuvifunya vikaie mafunyo gha kizongona chekora kwa BWANA, eri kidari chipate kusughuswa chiwuye mafunyo kwa BWANA.

³¹ Mkohani uchakora agho mavuda aighu ya madhabahu, ela kidari chichawuya cha Haruni na wana wake.

³² Na nyama ya bara ya mkonu ghwa kiwomi kuchaineka mkohani, ipate kukaia ifunyo jifumagha kwa kizongona cha mapatano.

³³ Umu wa wana wa Haruni, uo ufunyagha bagha na mavuda gha kizongona cha mapatano, nuo uko na hachi enekwa iyo bara ya mkonu ghwa kiwomi.

³⁴ Icho kidari chisughuswagha, na iyo bara ifunywagha neeviwusa kufuma kwa vizongona va mapatano va wandu wa Israeli, na kumneka Haruni uo mkohani na wana wake, vikaie mafungu ghawo gha kari kose kufuma kwa Waisraeli.

³⁵ Ijo ni ifungu ja Haruni na wana wake jifunyiro kufuma kwa mafunyo gha vizongona vekorwa kwa BWANA, jikawikwa kukaia jawo kufuma ituku werewikiloghe wakfu wikaie wakohani wa BWANA.

³⁶ BWANA orelaghirieghe winekoghe vindo ivi ni wandu wa Israeli, kufuma ituku jija werewikiloghe wakfu kwa kushingwa mavuda, vikaie mafungu ghawo gha kari kose kufuma kwa wandu wa Israeli vivalwa vichagha.”

³⁷ Ihi niyo sharia ya kizongona chekora, kizongona cha viro, kizongona kwa wundu ghwa kaung'a, kizongona kwa wundu ghwa makosa, kizongona chewika wakfu, na kizongona cha mapatano;

³⁸ iyo BWANA oremnekieghe Musa aighu ya Mghondi ghwa Sinai, jija ituku orewilaghirieghe wandu wa Israeli wiredeghe mafunyo ghawo kwa BWANA, aho kireti cha Sinai.