WALAWI 4 - Biblia Ilagho Jiboie Kwa Wandu Wose

Mafunyo kwa wundu ghwa kaung'a riseko ra kidali

¹ BWANA ukamzera Musa,

² “Mndungi ukachumbwa na kubonya kaung'a aighu ya jimu ja agho ghose Mlungu ulaghirie ghisakebonywa,

³ ikakaia ni Mkohani M'baa ubonyere kaung'a, na kushekeria wandu kutalwa kukaia wakosi, uchafunya mwana wa njau useko na itiko, upate kukaia kizongona kwa BWANA kwa wundu ghwa iyo kaung'a uibonyere.

⁴ Uchaireda iyo njau imbiri ya BWANA mnyangonyi ghwa Hema ekwania, na kuwikiria mkonu ghwake aighu ya chongo cha iyo njau; niko uchaibwagha imbiri ya BWANA.

⁵ Na uo Mkohani M'baa uchawada imu ya bagha ya iyo njau, na kuidwa nokondenyi cha Hemenyi ekwania;

⁶ nao uchangira chala chake baghenyi, na kuishinga naimbiri ya pazia ya Andu kwa Wueli mando mfungade imbiri ya BWANA.

⁷ Sena uja Mkohani M'baa uchadunga bagha imu kwa iro mbembe inya ra madhabahu efukiria marumba imbiri ya BWANA, iko andenyi ya iyo Hema ekwania. Iyo bagha yasigharika, uchaidia nandonyi ya madhabahu ya vizongona vekora iko mnyangonyi ghwa Hema ekwania.

⁸ Nao uchafunya mavuda ghose gha iyo njau ifunyiro kwa wundu ghwa kaung'a; ilala jose ja mavuda gha vifu, na agho mavuda ga vindo va ndenyi,

⁹ na figho iwi chiaimweri na mavuda gharo kufuma kiwonunyi, na kipande chiboie cha idima.

¹⁰ Uo mkohani uchawada agho mavuda, na kughikora aighu ya madhabahu ekoria vizongona, sa iji koni ubonyagha kwa mafunyo gha vizongona va mapatano.

¹¹ Ela mrongo ghwa iyo njau, na nyama rake rose, chongo chake, na maghu ghake, vindo vake va ndenyi na mawula ghake;

¹² uchavifunya vose shighadi ya kambi, andu kueleshero kwa wundu ghodia ivu, na kuvikora kwa mbande, ahoeni ivu jidirilwagha.

¹³ “Ikakaia ni izungu jose ja Israeli jabonya kaung'a wisemanyire, na kughinona agho malaghiro gherefunyiroghe ni BWANA; na ilagho ijo jikaie jisemanyikie izungunyi hata wikaie wakosi;

¹⁴ ingelo wachamanya angu wabonyere kaung'a, wichafunya mwana wa njau ukaie kizongona kwa wundu ghwa kaung'a; nawo wichamreda imbiri ya Hema,

¹⁵ na waghosi wa wandu wichawikiria mikonu yawo aighu ya chongo cha ija njau imbiri ya BWANA, nayo ichabwaghwa.

¹⁶ Niko Mkohani M'baa uchawada imu ya bagha ya iyo njau na kuidwa nokondenyi cha Hemenyi ekwania;

¹⁷ nao uchangira chala chake baghenyi, na kuishinga naimbiri ya iyo pazia mando mfungade imbiri ya BWANA.

¹⁸ Sena uja Mkohani M'baa uchashinga bagha imu kwa iro mbembe inya ra madhabahu iko andenyi ya Hema ekwania imbiri ya BWANA, na bagha yasigharika uchaidia nandonyi ya madhabahu ya vizongona vekora iko mnyangonyi ghwa Hema ekwania.

¹⁹ Na mavuda ghake ghose uchaghiwada na kughikora aighu ya madhabahu.

²⁰ Huwo niko uchaabonya na iyo njau; sa iji koni orebonyereghe kwa njau ifunyiro kukaia kizongona kwa wundu ghwa kaung'a; na mkohani uchabonya mapatano kwa wundu ghwa kaung'a rawo; nawo wichafuilwa wughoma.

²¹ Nao uchaighenja ija njau shighadi ya kambi, na kuikora sa iji koni orekorieghe njau ya imbiri kwa kaung'a rake moni. Ni kizongona kwa wundu ghwa kuinja kaung'a ya Ikwanyiko.

²² “Ikakaia m'bonyi nguma wabonya kaung'a usemanyire, na kunona malaghiro ghamu BWANA Mlungu wake orelaghirieghe ghisakebonywa, nao ukaie mkosi,

²³ ukameria kuwonyerwa kaung'a yake, uchareda ifunyo ja fwandi iseko na itiko;

²⁴ nao uchawikiria mkonu ghwake aighu ya iyo fwandi, na kuibwagha imbiri ya BWANA andu aho vizongona vekorwa vibwaghilwaghwa. Ni kizongona kwa wundu ghwa kaung'a.

²⁵ Niko mkohani uchawada bagha imu ya kizongona kwa wundu ghwa kaung'a na chala chake, na kuishinga aighu ya mbembe ra madhabahu ekoria vizongona; na bagha yasigharika uchaidia nandonyi ya madhabahu ghekoria vizongona.

²⁶ Na mavuda ghake ghose uchaghikora aighu ya madhabahu, sa iji koni orebonyereghe kwa vizongona va mapatano. Uchabonya wupatanisho kwa wundu ghwake, nao uchafuilwa wughoma.

²⁷ “Ikakaia muisanga ungi wa kawaida wabonya kaung'a usemanyire, na kunona ghamu gha malaghiro agho BWANA orelaghirieghe ghisakebonywa, nao wakaia mkosi;

²⁸ ukameria kuwonyerwa kaung'a yake, uchareda ifunyo ja mburi ya waka iseko na itiko kwa wundu ghwa iyo kaung'a yake oreibonyereghe.

²⁹ Nao uchawikiria mkonu ghwake aighu ya chongo cha iyo mburi ya kizongona kwa wundu ghwa kaung'a, na kuibwaghia andu vizongona vekora vibwaghilwagha.

³⁰ Na mkohani uchawada imu ya bagha yake na chala chake na kuishinga aighu ya iro mbembe ra madhabahu ekoria vizongona na bagha yasigharika uchaidia nandonyi ya madhabahu.

³¹ Nao uchainja mavuda ghake ghose, sa iji koni mavuda ghiinjwagha kufuma kwa vizongona va mapatano; na kughikora aighu ya madhabahu ghikaie marumba mecha kwa BWANA. Kwa chia ihi, mkohani uchabonya mapatano kwa wundu ghwa kaung'a ra uo mundu, nao uchafuilwa wughoma.

³² “Ikakaia uo mundu wareda mwana wa ng'ondi ukaie kizongona chake kwa wundu ghwa kaung'a, uchareda wa waka useko na itiko;

³³ nao uchawikiria mkonu ghwake aighu ya chongo cha uo mwana wa ng'ondi wa kizongona kwa wundu ghwa kaung'a, na kum'bwagha andu aho wibwaghiagha vizongona vekora.

³⁴ Na mkohani uchawada imu ya iyo bagha ya kizongona kwa wundu ghwa kaung'a na chala chake, na kuishinga aighu ya mbembe ra madhabahu ya vizongona vekora; na iyo yasigharika, uchaidia nandonyi ya madhabahu.

³⁵ Nao uchainja mavuda ghake ghose sa iji koni mavuda gha mwana wa ng'ondi ghiinjwagha kufuma kwa kizongona cha mapatano; na mkohani uchaghikora aighu ya madhabahu kwa BWANA; upate kubonya mapatano kwa wundu ghwa kaung'a rake oreribonyereghe, nao uchafuilwa wughoma.