WALAWI 3 - Biblia Ilagho Jiboie Kwa Wandu Wose

Mafunyo gha wungara

¹ “Ikakaia ifunyo ja mundu ni kizongona cha mapatano, na ikakaia waawuyafunya ng'ombe ya womi angu ya waka, iyo ng'ombe ikaie isewadie itiko imbiri ya BWANA.

² Nao uchawikiria mkonu ghwake aighu ya chongo cha iyo nyamandu, na kuibwagha aho mnyangonyi ghwa Hema ekwania; na wana wa Haruni, awo wakohani, wichaimichira madhabahu bagha chia rose.

³ Na kufuma kwa icho kizongona cha mapatano, sa kizongona chekora kwa BWANA, uchafunya agho mavuda ghiko gha ilala kifunyi na mavuda ghose gha vindo va ndenyi,

⁴ na figho iwi chiaimweri na mavuda gharo gha kiwonunyi, na kipande chiboie cha idima, vikaie kizongona chekora kwa BWANA.

⁵ Niko wana wa Haruni wichavikoranya na icho kizongona chekora chiko aighu ya mbande madhabahunyi, vikaie kizongona chekora; irumba ja vindo ivo jamnukiagha BWANA nicha na ndingi.

⁶ “Ikakaia ifunyo jake ja kizongona cha mapatano kwa BWANA ni ng'ondi angu mburi ya womi angu ya waka, ichakaia isewadie itiko jingi.

⁷ Ukafunya mwana wa ng'ondi ukaie ifunyo jake, uchaifunya imbiri ya BWANA,

⁸ ukiwikiria mkonu ghwake aighu ya chongo chake; nao uchaibwagha imbiri ya Hema ekwania, na wana wa Haruni wichamichira bagha yake chuwaru rose ra madhabahu.

⁹ Niko uchainja munda na mavuda gharo ghose kufuma kwa icho kizongona chekora cha mapatano chafunywa kwa BWANA, ela ughudumbuye kaavui na indi ja mghongo, na ilala ja mavuda ghose gha kifu cha iyo nyamandu na mavuda ghose gha vifu;

¹⁰ figho iwi na mavuda gharo kufuma kiwonunyi, na kipande cha idima.

¹¹ Na mkohani uchavikora aighu ya madhabahu vikaie vindo vifunyiro kukaia kizongona chekora kwa BWANA.

¹² “Ikakaia ifunyo jake ni mburi, uchaifunya imbiri ya BWANA,

¹³ ukiwikiria mkonu ghwake aighu ya chongo chake; nao uchaibwagha imbiri ya Hema ekwania, na wana wa Haruni wichamichira bagha yake chuwaru rose ra madhabahu.

¹⁴ Niko uchamfunyira BWANA ifunyo jake ja kizongona chekora, ilala ja mavuda gha kifu, na mavuda ghose gha vindo va ndenyi;

¹⁵ na figho iwi na mavuda gharo kufuma kiwonunyi, na kipande chiboie cha idima.

¹⁶ Mkohani uchavikora aighu ya madhabahu vikaie vindo vifunyiro kukaia kizongona chekora; irumba jinukie nicha. Mavuda ghose ni gha BWANA.

¹⁷ Ihi ichakaia ni sharia yenyu ya kala na kala vivalwa venyu vose, andu kose mchaakaia; kukaia, ndemchaaja mavuda hata bagha anduangi.”