WALAWI 27 - Biblia Ilagho Jiboie Kwa Wandu Wose

Sharia aighu ya manosi ghifunywaghwa kwa Bwana

¹ BWANA ukamzera Musa,

² “Wizere wandu wa Israeli kukaia mundu ukafunywa kwa BWANA kwa wundu ghwa kukatisha ighemi jimu, wadima kulekerelwa kwa malipo gha isabu ja pesa jinughagha:

³ Bei ya mundu wa womi wa miaka mirongo iwi hata miaka mirongo irandadu ni vibelele va feza mirongo misanu kunughana na vipimo viwikilo.

⁴ Ikakaia ni muka isabu jaro jichakaia vibelele va feza mirongo idadu.

⁵ Ikakaia ni mndwawomi wa miaka misanu hata mirongo iwi, isabu jaro jichakaia vibelele va feza mirongo iwi; ikakaia ni muka jichakaia vibelele va feza ikumi.

⁶ Ikakaia ni mundu wa mori ghumweri hata miaka misanu, isabu jaro jichakaia vibelele va feza visanu kwa mndwawomi, na vibelele va feza vidadu kwa muka.

⁷ Mundu wa miaka mirongo irandadu na kuchumba, isabu jaro jichakaia vibelele va feza ikumi na visanu kwa mndwawomi na vibelele va feza ikumi kwa muka.

⁸ Uo mundu ubonyere ighemi, ukakaia mkiwa putu usedimagha kulipa ijo isabu, uchareda uja mundu kwa mkohani, nao uchampima ighuri jake kunughana na ndighi ya uja mundu ubonyere ighemi.

⁹ “Ikakaia ighemi jedebonywa kufunya nyamandu iyo irumirikie kufunywa kwa BWANA, mafunyo ghose ghichakaia ghieleshero.

¹⁰ Uo mundu orebonyereghe ighemi ndechaaindanishira angu kuighalusa nyamandu iboie kwa izamie angu izamie kwa iboie; ukabonya huwo, nyamandu rose rafunywa richawuya ra BWANA.

¹¹ Ikakaia nyamandu yafunywa ndeielie, uja mundu waifunya uchaighenja kwa mkohani;

¹² nao uchabonywa ighuri kunughana na kuwoneka kwake, ikaiagha iboie angu izamie; na ighuri jawikwa ni mkohani jichakaia ja kutua.

¹³ Uo mundu ukakunda kuikombua nyamandu yake, uchalipa ijo ighuri jawikwa sena uchurie mirongo iwi kwa ighana ya iyo bei.

¹⁴ “Mndungi ukafunya nyumba yake kwa BWANA, mkohani uchaidema bei kunughana na kuboa angu kuzama kwaro; na bei yawikwa ni mkohani ichakaia ya kutua.

¹⁵ Uo mundu ukakunda kuikombua nyumba yake, uchalipa iyo bei yawikwa, sena uchurie mirongo iwi kwa ighana ya iyo bei.

¹⁶ “Mndungi ukamfunyira BWANA ifungu ja mbuwa ya ifwa jake, bei yaro ichadumbulwa kunughana na mtalo ghwa mbeu ridimagha kuwalwa andenyi ya ija mbuwa. Pishi ya shairi ichakaia na bei ya vibelele va feza mirongo misanu.

¹⁷ Ikakaia waaifunya ngelo ija cheni ya mwaka ghwa jubili, bei yaro ichakaia ija cheni, isepunguzo;

¹⁸ ela ukaifunya ija mbuwa nyuma ya Mwaka ghwa Jubili, mkohani uchapima bei yaro kunughana na miaka yasigharika kuvikia mwaka mzima ghwa jubili, nao uchapunguza bei yaro kufuma kwa ija bei cheni erewikiloghe.

¹⁹ Uo mundu oreifunyireghe ukakunda kuikombua iwuye yake uchalipa ijo ighuri, sena uchurie mirongo iwi kwa ighana ya ijo ighuri.

²⁰ Ukauzira mundu mzima imbiri useighue moni kufuma kwa BWANA, uchalaghasha ija hachi yake ya kuikombua.

²¹ Mwaka ghwa Jubili ghunughagha, iyo mbuwa ichawuya ya BWANA putu; nayo ichawuya ifungu ja wakohani.

²² “Mundu ukamfunyira BWANA mbuwa oreighueghe iseko ya ifwa,

²³ mkohani uchapima ighuri jaro kunughana na mtalo ghwa miaka kuvikia Mwaka ghwa Jubili; na uo mundu uchalipa ijo ituku jeni, na pesa richakaia ra BWANA.

²⁴ Mwaka ghwa Jubili, iyo mbuwa ichawunjwa kwa mundu waro angu kwa kivalwa chake.

²⁵ Kula ighuri jichawikwa kunughana na mawiko gha Andu Kwa Wueli.

²⁶ “Wavalwa wa imbiri wa nyamandu, ikaiagha ni ng'ombe, angu ng'ondi, ni wa BWANA, mndungi usewifunye kukaia inosi kwa BWANA.

²⁷ Ikakaia ni nyamandu iseelie, uo mundu uchaighua kwa ighuri jiwikilo, sena uchurie mirongo iwi kwa ighana ya iyo bei. Iji yakaia isekombolo, ichauzwa kwa ijo ighemi jiwikilo.

²⁸ “Ela kilambo chingi cha mundu ukachifunya kwa BWANA putu, ikaiagha ni mdamu, nyamandu, angu mbuwa; ndeichaauzwa hata kukombolwa; icho ni cha BWANA putu.

²⁹ Mndungi ufunyiro aghadi ya wandu upate kutoteshwa ndechaakombolwa jingi ela uchabwaghwa.

³⁰ “Ifungu ja ikumi ja vindo va mbuwenyi ikaiagha ni viro angu matunda, ni va BWANA.

³¹ Mndungi ukakunda kuvikombua, uchachuria mirongo iwi kwa ighana aighu yaro.

³² Ifungu ja ikumi ja mfugho rose, na ja nyamandu riko aisi ya mlisha, ni ja BWANA.

³³ Mundu usebonye mpango ghosaghua-saghua nyamandu aghadi ya riboie na rizamie; hata usebadilishe ingi; angu ukabonya huwo, iro nyamandu rose iwi richawuya ra BWANA; naro nderichaakombolwa jingi.”

³⁴ Ihi niyo memu BWANA oremnekieghe Musa kwa wundu ghwa wandu wa Israeli, aighu ya Mghondi ghwa Sinai.