WALAWI 2 - Biblia Ilagho Jiboie Kwa Wandu Wose

Mafunyo gha viro

¹ “Mndungi ukakafunya ifunyo ja viro kwa BWANA, uchasha ivo viro viwuye mufu ghudendere; nao uchaghudunga mavuda na kuwikiria vilungo,

² ima ughurede kwa wakohani, wana wa Haruni. Niko mkohani uchabegha ngonde ichue ya ugho mufu ghudendere na mavuda, chiaimweri na vilungo varo vose; nao uchaghukora sa ifungu jekumbuka kukaia mufu ghose ghwameria kukorwa aighu ya madhabahu, ghukaie kizongona chekora; irumba ja vindo ivo jamnukiagha BWANA nicha na ndighi.

³ Mufu ghose ghwasigharika, ghuchawuya ghwa Haruni na wana wake; ghwakaia ghwa wueli loli loli, angu ghwafuma kwa ifunyo jifunyiro kwa BWANA.

⁴ “Ikakaia ifunyo ja viro ni mkate ghuochelo irikonyi, suti ghubonyo ghusewadie chachu ingi, ghwa mufu ghuboie ghuranganyiro na mavuda, ikaiagha ni mkate m'baa angu skozi.

⁵ Na ikakaia ifunyo jako ja viro ni mkate msuse ghokangwa na kikango, ghuchakaia ghwa mufu ghuboie, ghusewadie chachu, ghuranganyiro na mavuda.

⁶ Kughudumbuo vipande vipande, nao kudunge mavuda aighu yaro; ghukaie kizongona cha viro.

⁷ Na ikakaia ifunyo jako ja viro ni mkate ghudekelo na mavuda andenyi sufurienyi, ghuchabonywa ghudendere.

⁸ Niko kuchareda ijo ifunyo ja viro kwa BWANA, jibonyero na ivo vilambo; hata iji ghwanekwa mkohani, uchaghureda madhabahunyi.

⁹ Na uo mkohani uchawusa katini ka ijo ifunyo ja viro, na kukora sa ifungu jekumbuka kukaia mkate ghose ghwameria kukorwa aighu ya madhabahu, ghukaie kizongona chekora; irumba ja vindo ivo jamnukiagha BWANA nicha na ndighi.

¹⁰ Icho chose chasigharika cha ifunyo ja viro chichawuya cha Haruni na wana wake; jakaia jieleshero na ndighi loli loli, angu ugho mkate ghwafuma kwa ifunyo jifunyiro kwa BWANA.

¹¹ “Ifunyo jingi ja viro jifunywagha kwa BWANA jisebonyo na chachu, angu chachu na wuki ndevichaakorwa kizongona kwa BWANA anduangi.

¹² Mafunyo gha mavalo gha imbiri gha viro va kula mwaka, ghicharedwa kwa BWANA; ela ndeghichaakorwa aighu ya madhabahu kukaia marumba mecha.

¹³ Kudunge chumbi kwa mafunyo ghako ghose gha viro, kwa kukaia chumbi chiawonyera ilaghano jibonyero aghadi yako na Mlungu wako. Suti kudunge chumbi kwa mafunyo ghako ghose.

¹⁴ Iji kwakafunya mavalo gha imbiri gha viro kwa BWANA, kuchafunya kizongona cha mavalo gha imbiri gha viro vako viwishi vichanilo nyuma ya kuochwa kwa modo.

¹⁵ Kuvidunge mavuda na vilungo; vikaie kizongona cha viro;

¹⁶ na mkohani uchawusa ifungu itini ja viro viwishi vichanilo na mavuda na vilungo varo, uvikore sa ifungu jekumbuka kukaia viro vose vamerie kukorwa aighu ya madhabahu vikaie kizongona chekora kwa BWANA.