WALAWI 16 - Biblia Ilagho Jiboie Kwa Wandu Wose

Ituku ja kupatanishwa

¹ BWANA ukaghora na Musa nyuma ya kifwa cha wana wa Haruni, awo werefuyeghe angu weremfunyireghe BWANA modo ghuseelie;

² ukamzera, “Kumzere mwanyinyu Haruni usecheghe kula ngelo andenyi ya Andu kwa Wueli Kuchumbie nandenyi ya pazia; andu aho Kifumbi cha Wughoma chiko aighu ya Sanduku ya Ilaghano, uchefwa; kwa kukaia nichawoneka andenyi ya iwingu aighu ya Kifumbi cha Wughoma.

³ Haruni uchakaia ukicha andenyi ya Andu kwa Wueli Kuchumbie huwu: Uchawada mwana wa njau ofunya kizongona kwa wundu ghwa kaung'a, na bauru kwa wundu ghwa kizongona chekora.

⁴ Imbiri usengirie andenyi ya Andu kwa Wueli Kuchumbie, suti ukuoghoshe moni kwa machi, ima uro ijoho ja kitani ja wueli, na mwadeghu wa kitani, na mkowa ghwa kitani, na kiremba cha kitani. Agho ni marwao gha wueli.

⁵ Sena uchawusa fwandi iwi kufuma kwa wandu wa Israeli, rikaie kizongona kwa wundu ghwa kaung'a, na bauru imweri kwa wundu ghwa kizongona chekora.

⁶ Haruni uchafunya iyo njau kizongona kwa wundu ghwa kaung'a rake moni, na ra wandu wa nyumbenyi kwake.

⁷ Niko uchawada iro fwandi iwi na kuriwika imbiri ya BWANA mnyangonyi ghwa Hema ekwania;

⁸ nao ucharikabia kura iro fwandi iwi, imu ikaie kwa wundu ghwa BWANA, na imu ikaie kwa wundu ghwa Azazeli.

⁹ Niko Haruni uchawada iyo fwandi yawonyerwa ni kura ikaie kwa wundu ghwa BWANA, nao uchaifunya kizongona kwa wundu ghwa kaung'a;

¹⁰ ela iyo fwandi yawonyerwa ni kura kukaia ya Azazeli, ichafunywa iko moyo kwa BWANA ipate kubonya mapatano; kwa kuilekeria ighende noko cha kireti kwa Azazeli, ikidwa kaung'a ra wandu.

¹¹ “Haruni uchafunya ija njau ikaie kizongona kwa wundu ghwa kaung'a rake, nao uchabonya mapatano kwa wundu ghwake na kwa wundu ghwa wandu wa nyumbenyi kwake. Uchaibwagha ija njau ikaie kizongona kwa wundu ghwa kaung'a rake.

¹² Uchadwa modo ghwa maka na luwigha kufuma madhabahunyi imbiri ya BWANA, na ngonde iwi richue ra marumba mecha ghichanilo-chanilo; nao uchangia navo andenyi ya Andu Kwa Wueli Kuchumbie.

¹³ Na aho ukikaia imbiri ya BWANA, uchakumba agho marumba modonyi, eri mosi ghwa agho marumba ghupate kufinikira icho Kifumbi cha Wughoma chifinikire Sanduku ya Ilaghano, Haruni usechechiwona uchefwa.

¹⁴ Niko aho uchawada bagha imu ya njau na chala chake, na kuimichira naimbiri ya icho Kifumbi cha Wughoma, sena uchamichira bagha imu kwa chala chake mando mfungade naimbiri ya Sanduku ya Ilaghano.

¹⁵ “Niko uchabwagha ija fwandi ipate kukaia kizongona kwa wundu ghwa kaung'a ra wandu, nao uchareda bagha yake andenyi ya pazia. Na sa iji koni ubonyereghe na bagha ya njau, uchabonya woruwo koni kwa kumichira bagha naimbiri ya Kifumbi cha Wughoma, na naimbiri ya Sanduku ya Ilaghano.

¹⁶ Kwa chia iyo, uchaelesha aja Andu kwa Wueli Kuchumbie kufumanya na kulua kwa wandu wa Israeli, makosa ghawo, na kaung'a rawo rose. Uchabonya huwo koni kwa wundu ghwa iyo Hema ekwania ikaiagha ghadi na ghadi ya Waisraeli wiseelie.

¹⁷ Haruni uchakaia uekeri andenyi ya iyo Hema ekwania, ingelo uchaakaia ukifunya vizongona andenyi ya Andu kwa Wueli Kuchumbie, ukibonya mapatano kwa wundu ghwake na kwa wandu wa nyumbenyi kwake na kwa wandu wose wa Israeli; ima uchefuma.

¹⁸ Niko uchaghenda madhabahunyi iko imbiri ya BWANA, kuielesha. Aho uchawada bagha imu ya njau, na imu ya mburi, na kuimichira mbembe rose ra madhabahu.

¹⁹ Bagha imu uchaimichira na chala chake aighu ya madhabahu mando mfungade, upate kuielesha kufumanya na kulua kwa wandu wa Israeli.

Mburi elekeria

²⁰ “Haruni ukameria ugho wudumiki ghoelesha Andu kwa Wueli Kuchumbie, Hema ekwania, na madhabahu, uchaifunya ija mburi iko moyo;

²¹ nao uchawikiria mikonu yake aighu ya chongo cha ija mburi, na kurumiria mawiwi ghose gha wandu wa Israeli, na makosa ghawo ghose na kaung'a rawo rose. Na kwa chia iyo, uchawikiria iro kaung'a aighu ya chongo cha ija mburi, na kuighenja noko cha kireti kwa mkonu ghwa mndumu wasaghulwa, nao uchailekeria noko cha kireti.

²² Na ija mburi ichaduka kaung'a rawo noko cha isanga jisekailwagha ni wandu.

²³ Niko Haruni uchangia Hemenyi ekwania, na kuinja ghaja marwao ghwa wukohani urwaeghe ngelo orengiagha andenyi ya Andu kwa Wueli, na kughisigha aho.

²⁴ Nao uchakuoghosha mumbi ghwake kwa machi andenyi ya Andu kwa Wueli na kurwa nguwo rake reni. Niko uchafuma na kufunya kizongona chake chekora, na kizongona chekora kwa wundu ghwa wandu, upate kubonya mapatano kwa wundu gwake na kwa wundu ghwa wandu.

²⁵ Agho mavuda gha kizongona kwa wundu ghwa kaung'a uchaghikora aighu ya madhabahu.

²⁶ Uo mundu ughenjere mburi kwa Azazeli, uchaoghosha nguwo rake, na kukuoghosha uo moni na machi; ima uchengia kambinyi.

²⁷ Gharia ya njau na mburi rerefunyiroghe kizongona kwa wundu ghwa kaung'a, na bagha raro kuredwa andenyi ya Andu kwa Wueli kwa wundu ghwa kuinja kaung'a, ichafunywa shighadi ya kambi, na kukorwa. Mrongo, nyama, vifu na mawula gharo; vose vichakorwa.

²⁸ Mundu uchaavikora suti uoghoshe nguwo rake nyuma ya kuvikora, na kukuoghosha uo moni na machi, ima ungie kambinyi.

Kujitala Ituku ja Mapatano

²⁹ “Ihi niyo sharia enugha matuku ghenyu ghose ghichagha: Ituku ja ikumi ja mori ghwa mfungade, Waisraeli wose, na waghenyi wose mkwanye, mchafunga tumu; ndemchaabonya kazi ingi.

³⁰ Angu ituku iji mapatano ghichabonywa kwa wundu ghonyu; mpate kueleshwa kufuma kwa kaung'a renyu rose, nenyo mchakaia muelie imbiri ya BWANA.

³¹ Ituku ijo jichakaia jielie na ndighi konyu, nenyo mchafunga tumu na kuhora; msebonye kazi ingi. Sharia ihi ichanughwa matuku ghose ghichagha.

³² Mkohani M'baa ushingilo mavuda, na kuwikwa wakfu upate kughuwada wudumiki ghwa ndee, nuo uchaabonya mapatano nyuma ya kurwa nguwo ra wukohani riboie ra kitani;

³³ nao uchabonya mapatano kwa wundu ghwa kuelesha Andu kwa Wueli Kuchumbie, Hema ekwania, na madhabahu. Uchabonya mapatano kwa wundu ghwa wakohani na ikwanyiko jose ja wandu.

³⁴ Ihi ichakaia sharia ya kala na kala kwa wundu ghonyu, eri mapatano ghipate kubonywa kwa wundu ghwa wandu wa Israeli kula mwaka; kwa wundu ghwa kaung'a rawo.” Musa ukabonya sa iji koni BWANA oremlaghirieghe.