WALAWI 12 - Biblia Ilagho Jiboie Kwa Wandu Wose

Kukuelesha kwa waka nyuma ya kukufungua

¹ BWANA ukamzera Musa,

² “Kuwizere wandu wa Israeli huwu, Iji muka wapata kifu, na kukufungua mwana wa womi, uchakaia useelie kwa matuku mfungade seji ukaiagha useelie ngelo yake ya meri.

³ Ituku ja wunyanya, uo mwana uchashamishwa.

⁴ Niko uo muka uchakaia matuku ghamu mirongo idadu na adadu, ukiweseria kuela kufuma kwa iro bagha rake; ndechaawada kilambo chingi chieleshero, hata kusoghoda kaavui na Andu kwa Wueli, hata matuku ghake gha kukuelesha ghakatia.

⁵ Ela iji wakufungua mwana wa waka, uchakaia useelie kwa matuku ikumi na ana, seji ukaiagha ngelo yake ya meri; niko uchakaia matuku ghamu mirongo irandadu na arandadu ukikuweseria kueleshwa kwake.

⁶ “Matuku gha kukuelesha kwake ghikakatia, ikaiagha ni gha mwana wa womi angu wa waka, uchareda mwana wa ng'ondi wa mwaka ghumweri kwa mkohani, mnyangonyi ghwa Hema ekwania kwa wundu ghwa kizongona chekora, na chana cha mbughi angu iringo, ikaie kizongona kwa wundu ghwa kaung'a.

⁷ Na mkohani uchaifunya imbiri ya BWANA, upate kubonya mapatano kwa uo muka, nao uchaeleshwa kufuma kwa uko kufumwa ni bagha kwake. Ihi niyo Sharia kwa muka uo ose uchaakufungua mwana wa womi angu wa waka.

⁸ Iji usedimagha kupata mwana wa ng'ondi, uchareda vana viwi va mbughi angu va maringo; imu kwa wundu ghwa kizongona chekora, na imu ichakaia kizongona kwa wundu ghwa kaung'a; na mkohani uchabonya mapatano kwa wundu ghwa uo muka, nao uchaeleshwa.”