WAFILIPI 4 - Biblia Ilagho Jiboie Kwa Wandu Wose

Mawonyero

¹ Kwa huwu wanidu nimkunde, muniriragha, kuboilwa kwapo na kirumbu chapo, mangenyi huwo koni andenyi ya Bwana wakundwa.

² Nawivoya Euodia na Suntike wipatane sa wanidu kwa Bwana.

³ Nani nakulomba oho wori mngara wa kazi wa loli, kuwitesie awo waka; angu wabonyere kazi mbaa andwamweri nani edumikia ijo Ilagho Jiboie, dikwanye na Klementi na wangara wapo wa kazi wazima; awo marina ghawo ghiko andenyi ya chuo cha irangi.

⁴ Boilonyi andenyi ya Bwana matuku ghose; naghamba sena, Boilonyi.

⁵ Wumboa ghonyu ghumanyike kwa wandu wose. Bwana oko kaavui.

⁶ Msakeja wasi kwa ilagho jingi, ela mummanyishe Mlungu maza renyu rose mkunde kwa malombi, na kuvoya, na kufunya chawucha.

⁷ Na sere ya Mlungu ichumbagha kutambua kose, ichamlindia ngolo renyu na nia renyu andenyi ya Kristo Jesu.

⁸ Kutua wanidu, maza iro rose riko ra loli, iro rose riko ra ishima, iro rose riko ra hachi, iro rose rielie, iro rose riboie; ikakaia riko ringi ra sare ndicha, ikakaia ghuko wucha ghungi, ikakaia chiko kilambo chingi chifwanagha kukaswa; ririkanyenyi aighu ya maza iro.

⁹ Iro maza rose mkufundishire, mkariwusa, mkirisikira na kuriwona kwapo, ribonyenyi; na Mlungu wa sere uchakaia andwamweri nenyo.

Kufunya chawucha kwa manosi

¹⁰ Ini naboilwa nandighi andenyi ya Bwana, kwa kuwona seji nyuma ya matuku mengi, mwazoya sena kulola chia renitesia; loli morekoghe na maghesho aighu yapo, ela modesowa wulalo.

¹¹ Si angu wei naawuyakunda kindo chingi anduangi, angu nakufundishire kukatwa ni maza rose seji koni niko.

¹² Naichi kupungukilwa, sena naichi kuchua. Nakufundishire chia ekaia na vingi, na kukaia na njala; kukaia na wungi, na kusowa.

¹³ Nadima kubonya maza rose kwa uo unidimishagha.

¹⁴ Ela sena mwabonyere nicha nandighi kunitesia wasi ghwapo.

¹⁵ Inyo mmbeni Wafilipi mwamanya ingelo Ilagho Jiboie jerezoyagha, iji nerefumieghe Makedonia, ndekorekoghe na ikanisa jingi jerekoghe na wungara nani aighu ya kufunya na kuwusa, ela inyo muekeri;

¹⁶ angu hata iji nerekoghe Thesalonike, morekoghe mkiniredia wutesia kalazi koni.

¹⁷ Si angu wei naawuyalola agho manosi, ela naawuyalola itunda jichuriagha mtalo ghonyu.

¹⁸ Napatire manosi ghose, hata na kuchumba seji nerekundieghe, ngakatwa; nyuma ya kupata agho nereredeloghe ni Epafrodito. Nagho ni kizongona cha marumba mecha, chirumirikiagha na kum'boia Mlungu.

¹⁹ Na Mlungu wapo, uchamneka icho chose mchaakunda, karakara na wungi ghwa mali ra wubaa ghwake andenyi ya Kristo Jesu.

²⁰ Kwa Mlungu Aba odu, ndeghukaie wubaa kwa kala na kala. Amen.

Voro ra kutua

²¹ Mroghuo kula mweli uko andenyi ya Kristo Jesu. Awa wanidu dikwanye wamroghua.

²² Mwarogholwa ni waeli wose, kuchumba awa wa nyumba ya Kaisari.

²³ Mvono ghwa Bwana Jesu Kristo, ndeghukaie andwamweri na roho renyu.