WAFILIPI 3 - Biblia Ilagho Jiboie Kwa Wandu Wose

Iyo hachi ya loli

¹ Kutua wanidu boilonyi andenyi ya Bwana. Siwonagha wasi ghungi ngamwandikia ngiwuria ghaja malagho gheni, na inyo ghimfwana.

² Mkulindie na iro koshi, mkulindie na awo wibonyagha kiwiwi, mkulindie na awo wikudemaa-dema weni.

³ Angu isi de wakushamishwa wa loli, wandu dimtasagha Mlungu kwa Roho, na kukukasa andenyi ya Kristo Jesu, hata ndediwueritala maza ra mumbi anduangi;

⁴ hata ngera ini moni neko na sababu retala maza ra mumbi wori. Ikakaia oko mndungi uririkanyagha wadima kuritala maza ra mumbi, ini ni kuchumba.

⁵ Nereshamishiroghe ituku ja wunyanya nyuma ya kuvalwa kwapo, ne Muisraeli wa mbari ya Benjamini, na Muebrania uvalo ni Waebrania; kwa kunugha Sharia, ne Mfarisayo;

⁶ kwa kufunga ndighi, nerejikorongieghe ikanisa; kunughana na hachi ipatikagha kwa Sharia, serekoghe na ikosa jingi anduangi.

⁷ Ela iro fwaida rose nerekoghe naro, nereritalieghe kukaia hasara, kwa wundu ghwa Kristo.

⁸ Nani loli navitala vilambo vose kukaia hasara kwa wundu ghwa ijo ilagho ibaa ja kummanya Kristo Jesu Bwana wapo; kwa wundu ghwake uo, nadaghie vilambo vose ngivitala sa mavi, eri nimpate Kristo.

⁹ Nani niwoneke andenyi kwake nisewadie hachi ingi yapo nimoni, ipatikagha kwa chia ya Sharia, ela ija hachi ipatikagha kwa chia ya irumirio jiko andenyi ya Kristo. Ija hachi ifumagha kwa Mlungu, kwa chia ya irumirio;

¹⁰ niwonemmanya uo, nandighi ya kuruka kwake, nikaie mngara wa matiriro ghake, na kufwanana nao kwa kufwa kwake;

¹¹ eri ngera idimika, nivikie kuja kuruka kufuma kwa wafu.

Kukimbia na kuvikia kukatisha

¹² Si angu wei neemeria kupata, angu wei neekata, ela naawuyafunga ndighi kughenda imbiri eri nipate inosi; ijo kwa wundu ghwaro Kristo Jesu oreniwusireghe.

¹³ Wanidu, si angu wei namerie kupata anduangi, ela naawuyabonya ilagho jimweri; naawuyaliwa iro riidie, na kufunga ndighi kurinugha iro riko imbiri.

¹⁴ Nafunga ndighi kughenda imbiri, nipate kuvikia andu aho jiko ijo inosi nijiwangilo ni Mlungu, kwa chia ya Kristo Jesu.

¹⁵ Na isi diwose dizoghue kiroho, ndediririkanye woruwo; na ikakaia kwa chia ingi muko na maririkanyo mazima, Mlungu uchamfunukuya ijo najo wori.

¹⁶ Ilagho ibaa ni isi dimazire kughenda kodu sa iji koni divikie.

¹⁷ Wanidu, munisungeghee; nenyo muwimanye awo wawuyakaia na mfwano ugho ghoni mwawuyaghuwona kodu.

¹⁸ Angu namghorie kalazi koni, hata idana niamghoria kwa kudikwa ni mbori kukaia, wandu wengi wakaia wamaiza wa msalaba ghwa Kristo.

¹⁹ Kutua kwawo ni kutota, mlungu ghwawo ni vifu vawo, wakukasa kwa maza iwifwane wiriwonie waya, nawo wiaghesha maza ra ndoenyi.

²⁰ Ela isi kedu ni mlungunyi, nesi daawuyammbesera Mkiri ufumagha aho, Bwana Jesu Kristo;

²¹ uo uchaaighalusa mimbi edu ya wunyonge ifwanane na mumbi ghwake ghwa wubaa, kwa iro ndighi rimdimishagha kuvibonya vilambo vose vikaie aisi kwake.