WAFILIPI 2 - Biblia Ilagho Jiboie Kwa Wandu Wose

Kukusera kwa Kristo na kujoswa kwake

¹ Kwa huwo, ikakaia koko kuhoreshwa ngolo kungi andenyi ya Kristo, ikakaia iko ngolo ingi ya lukundo, ikakaia ghoko wungara ghungi ghwa Roho, ikakaia koko kurirana kungi kwa lukundo na wughoma;

² katishenyi kuboilwa kwapo, kwa kukaia na nia imweri, muko na luja lukundo loni, na kuwadana putu; muko na maghesho ghamweri.

³ Msakebonya ilagho jingi kwa kukukunda mmbeni, angu kukunda wubaa ghwa duu; ela kwa kukusera, muwitale wambenyu kukaia wafwane kumchumba inyo.

⁴ Mndungi usaketala maza rake reni, ela utale na ra wazima wori.

⁵ Kaienyi na nia iyo cheni erekoghe andenyi ya Kristo:

⁶ Uo hata ngera orekoghe na fwana ya Mlungu, nderetalieghe kuja kukaia karakara na Mlungu wei ni kilambo chekakadia anduangi.

⁷ Ela orelekerieghe rose ukawusa fwana ya mzumba, ukavalwa na fwana ya mdamu.

⁸ Nao ukiwoneka na fwana ya mdamu, orekuserieghe moni, ukakaia msikiri hata kufwa; hata icho kifwa cha msalaba.

⁹ Kwa huwu Mlungu wamjosere ighu na ndighi, ukamneka irina ibaa kuchumba marina ghose;

¹⁰ eri kula ngokoro idungo kwa irina ja Jesu, ya awo wiko mlungunyi, na aha ndoenyi, na aisi ya ndoenyi;

¹¹ na wandu wose wimghore Jesu Kristo kukaia ni Bwana, kwa wubaa ghwa Mlungu Aba.

Kung'ala-ng'ala sa miengere wurumwengunyi

¹² Kwa huwu wakundwa, sa iji koni msikiragha ngelo rose, kaienyi huwo koni hata idana; si iji niko aeni anduangi, ela kuchumba, hata ingelo niseko wori. Katishenyi kukia konyu mmbeni, kwa kuobua na kusughusika;

¹³ angu Mlungu wawuyabonya kazi andenyi konyu, ukimneka nia ekunda na kubonya iro rawuyam'boia uo.

¹⁴ Bonyenyi maza rose kuseko na mazughunuko hata nganyi ringi,

¹⁵ mpate kukaia wandu mseghorwagha kiwiwi, hata kukaia na ikosa jingi anduangi; wana wa Mlungu msewadie iboli jingi, aghadi ya kivalwa chinonekie na cha kaung'a; mking'ala-ng'ala aghadi kwawo sa miengere wurumwengunyi.

¹⁶ Mkijiwadia nandighi ilagho ja irangi, eri nidime kukukasa ijo Ituku ja Kristo, kukaia serekimbirieghe, angu kubonya kazi duu anduangi.

¹⁷ Hata ngera niafunywa sa kizongona cha kunywa, na kudilwa aighu ya kizongona cha irumirio jenyu, nichaboilwa na kuzuma andwamweri nenyo mmbose.

¹⁸ Huwo koni inyo wori, yamfwana m'boilo na kuzuma andwamweri nani.

Timotheo na Epafrodito

¹⁹ Nasuwiria kumduma Timotheo konyu kafwani Bwana Jesu ukakunda; nani nipate kuhoreshwa ngolo kwa malagho ghenyu.

²⁰ Siwadie mndungi uko sa uo, uko na ngolo eritala maza renyu nicha.

²¹ Wazima wose wiatala maza rawo reni, ndewitalagha iro ra Jesu Kristo anduangi.

²² Ela inyo mwamwichi Timotheo kukaia wafwane, nenyo mwamanya seji derejidumikieghe ijo Ilagho Jiboie sa mwana na ndee.

²³ Kwa huwu nasuwiria kumduma shwa-shwa, nyuma ya kumanya seji malagho ghapo ghichaakaia;

²⁴ nani wokoni narumiria Bwana ukakunda nichacha wori.

²⁵ Nawona ni suti nimdumie mwanidu Epafrodito, mngara wa kazi na asikari andwamweri nani; ni mdumwa onyu, na mdumiki wa maza rapo.

²⁶ Angu orekoghe na bea emmbona inyo mmbose, ela orekoghe ukisumbuka kwa kukaia seji msikire, orekoghe mkongo.

²⁷ Na loli orekoghe mkongo na ndighi, kaavui na kufwa. Ela Mlungu oremfueghe wughoma, na si uo moni uekeri anduangi, ela hata na ini wori; nisechengia wasinyi aighu ya wasi.

²⁸ Kwa huwu neko na bea mbaa emduma, eri mpate kuboilwa kubaa kwa kummbona sena, na wasi ghwapo ghupunguo.

²⁹ Kwa huwu mmbusenyi andenyi ya Bwana kwa kuboilwa kose; nenyo muwibonyere ishima wandu wifwane huwu.

³⁰ Angu orekoghe kaavui na kufwa kwa wundu ghwa kazi ya Kristo, nao ukakungira ndengonyi eri ukatishe ugho wudumiki ghonyu kwapo.