WAEBRANIA 5 - Biblia Ilagho Jiboie Kwa Wandu Wose

¹ Angu kula Mkohani M'baa usaghulo aghadi ya wandu, oowikwa umdumikie Mlungu wulalo ghwa wandu, upate kufunya mafunyo na vizongona kwa wundu ghwa kaung'a.

² Kwa kukaia uo moni ni mnyonge, wadima kurumaghianya na wandu wisemanyagha, na awo wikosagha.

³ Kwa wundu ugho, yamfwana uo ufunye kizongona kwa wundu ghwa kaung'a rake moni, na kwa wundu ghwa iro ra wandu.

⁴ Na mundu sa uo, ndejiwusagha ijo ishima ela wadawangwa ni Mlungu sa iji koni Haruni orewangiloghe.

⁵ Huwo koni, Kristo nderewusireghe ijo ishima jebonywa Mkohani M'baa kwa kukujosa moni anduangi, ela orewikiloghe ni Mlungu uo oremzerieghe, “Oho ko Mwana wapo nakuva idime.”

⁶ Sa iji koni wawuyaghora andu kumu wori, “Oho ko Mkohani wa kala na kala, kwa kunughishira wukohani ghwa Melkizedeki.”

⁷ Matuku gha Jesu ukikaia mumbinyi, oremlombieghe Mlungu uo udimagha kumkira na kifwa, kwa lwaka lubaa lwa kuvoya na kudikwa ni mbori, nao ukasikirwa angu orekoghe na kuja kuobua kwa Mlungu.

⁸ Hata ngera orekoghe Mwana wa Mlungu, ela orekufundishireghe kusikira kwa chia ya matiriro gherempatireghe;

⁹ nao umeria kukatishwa, ukawuya kuzoya kwaro kuja kukia kwa kala na kala, kwa awo wose wimsikiragha;

¹⁰ nao ukawikwa ni Mlungu ukaie Mkohani M'baa kwa kunughishira wukohani ghwa Melkizedeki.

Kukulindia aighu ya kujisigha ijo irumirio

¹¹ Deko na malagho mengi gheghora aighu ya ilagho iji, ela gheekua kumghoria angu moochaka msedimagha kutambukilwa shwa-shwa.

¹² Angu hata ngera ngelo ihi yafwaneghe mkaie walimu, ela mwaduagha mkikunda mndumu umfundishe sena mafundisho gha imbiri gha ilagho ja Mlungu. Wulalo ghwa vindo vikurie, inyo mwaduagha mkikunda mariwa.

¹³ Angu kula mundu unywagha mariwa gheni, waduagha mwana, nao ndemanyagha agho ghiko gha hachi kwa wundenyi.

¹⁴ Ela vindo vikurie, ni va wandu wabaa, awo wikufundishire kwa kurizaisira akili rawo ridime kumanya mecha na mawiwi.