WAEBRANIA 3 - Biblia Ilagho Jiboie Kwa Wandu Wose

Jesu kukaia m'baa kuchumba Musa

¹ Kwa huwu wanidu waeli, wangara wa uko kuwangwa kwa mlungunyi, mririkanyenyi Jesu, uo mdumi na Mkohani M'baa wa kurumiria kodu.

² Uo orekoghe mloli kwa uo oremmbikieghe, sa iji koni Musa orekoghe mloli andenyi ya nyumba ya Mlungu.

³ Ela sena, Jesu watalilo kukaia wa wubaa mungi nandighi kuchumba Musa, sa iji koni mundu uaghie nyumba unekwagha ishima kuchumba iyo nyumba.

⁴ (Angu kula nyumba eaghwa ni mndumu, ela uo uaghie vilambo vose ni Mlungu).

⁵ Na Musa orekoghe mloli andenyi ya nyumba yose ya Mlungu sa mdumiki, upate kushuhudia maza rechaadedwa konyuma ni Mlungu.

⁶ Ela Kristo, orekoghe mloli aighu ya nyumba ya Mlungu sa Mwana. Nesi de nyumba yake, ikakaia daghumazira wuwana ghodu, na kumanga andenyi ya isuwirio jedu.

Kuhora kwa wana wa Mlungu

⁷ Kwa huwo, seji Roho Mweli ughambagha, “Idime, ngera mwalusikira lwaka lwake,

⁸ msakekurisha ngolo renyu kwa kumlegha Mlungu, seji werebonyereghe weke wawa wenyu jija ituku ja kutimwa kireti;

⁹ iji weke wawa wenyu werenitimieghe, hata ngera wereriwonieghe kazi rapo kwa miaka mirongo ina.

¹⁰ Kwa huwo wandu wa kivalwa chija, werenivavirieghe ngolo nani ngaghamba, ‘Awo wadalaghaya toe ngolonyi kwawo na chia rapo ndewirimanyire anduangi.’

¹¹ Nani ngajokwa ni machu ngaghema, ‘Najingi ndewichaangia kuhorenyi kwapo anduangi.’”

¹² Mkulindie wanidu, mndungi onyu usechekaia na ngolo mbiwi iserumiriagha, imshekeriagha kumlegha Mlungu uko moyo.

¹³ Ela mshashirane mmbeni na mmbeni kula ituku jiwangwagha “Idime”, eri mndungi onyu usekechakaia ughilikie kwa wukalo ghwa kaung'a.

¹⁴ Angu deko wangara wa Kristo, ikakaia damazira hata kutua kuja kurumiria kodu kwa imbiri, ingelo ighorwagha,

¹⁵ “Idime ngera mwalusikira lwaka lwake, msakekurisha ngolo renyu kwa kumlegha Mlungu seji weke ndeyo werebonyereghe.”

¹⁶ Ni weke ani awo weresikireghe ima wikawuya wikamlegha Mlungu? Wele si waja weni werefumieghe Misri kwa wulongozi ghwa Musa?

¹⁷ Na awo weremvavirieghe Mlungu ngolo miaka mirongo ina ni weke ani? Wele si waja werebonyereghe kaung'a, wikafwa kireti?

¹⁸ Na awo orewighemiagha kukaia ndewichaangia kuhorenyi kwake ni wiao, iseeka ni waja weni werekoghe wisesikiragha?

¹⁹ Kwa wundu ugho, dawona angu werelemeloghe ni kungia kwa kusowa irumirio.