WAEBRANIA 11 - Biblia Ilagho Jiboie Kwa Wandu Wose

Irumirio

¹ Idana irumirio ni kukaia na wuloli ghwa maza rawuyasuwirilwa, ni kukaia na loli putu na maza risewonekie.

² Irumirio jerewibonyereghe wandu wa kala wikarumirikia kwa Mlungu.

³ Kwa irumirio datambua kukaia wurumwengu ghoreumbiloghe kwa ilagho ja Mlungu, hata na vilambo viwonekagha verebonyeroghe kwa vilambo visewonekagha.

⁴ Kwa irumirio, Abeli oremfunyireghe Mlungu kizongona chirumirikie kuchumba cha Kaini, nacho chikam'bonya urumirilo kukaia na hachi, Mlungu ukimshuhudia kwa kurumiria manosi ghake. Wafue loli, ela kwa chia ya irumirio jake, waduagha ukideda.

⁵ Kwa irumirio, Enoko oredwaloghe nokoighu usewone kifwa, nao nderewonekieghe anduangi, angu Mlungu oremdwaeghe. Elaima imbiri usedwalo, oreshuhudiloghe kukaia mundu um'boiagha Mlungu.

⁶ Na kuseko na irumirio, ndeidimikagha kum'boia Mlungu anduangi. Angu mundu uo ose umsoghoderagha Mlungu, ni suti urumirie kukaia oko; nao wawikatishiragha awo wimlolagha uo.

⁷ Kwa irumirio, Nuhu uendawonyerwa ni Mlungu ndengwa ya maza richagha, risewonekie kande, ukasikira; nao ukaagha safina ewikira wandu wa nyumba yake. Kwa chia ihi, ukaghutanya wurumwengu, nao ukawuya mundu wa ifwa ja hachi ipatikagha kwa irumirio.

⁸ Kwa irumirio, Abrahamu uendawangwa ni Mlungu ughende andu kuchaakaia ifwa jake, oosikira; ukaafuma usemanyagha andu ughendagha.

⁹ Kwa irumirio, ukakaia ukimara-mara andenyi ya isanga ja ilaghiro sa isanga ja kighenyi, ukikaia hemenyi chiaimweri na Isaaka, na Jakobo; awo wandu wa ifwa andwamweri nao ja ijo ilaghiro jeni.

¹⁰ Angu Abrahamu orekoghe ukighuwesera muzi ghuko na misingi, ghuaghilo na kubonywa ni Mlungu.

¹¹ Kwa irumirio, hata Sara moni orepatireghe ndighi repata kifu, hata ngera orekoghe waida irika jaro, kwa kukaia oremtalieghe Mlungu kukaia mloli, uo oremlaghirieghe.

¹² Kwa huwo, kufumanya na mundu umweri, Abrahamu, uo orekoghe sa ufue wori, cherevaloghe kivalwa kingi na ndighi, sa nyerinyeri ra mlungunyi, na sa msangagha ghusetalikagha, ghuko mbai-mbai ya bahari.

¹³ Awo wose werefueghe andenyi ya irumirio wisepatire agho werelaghiriloghe, ela wereghiwonieghe kwa kula wikaboilwanya nagho; wikirumiria angu werekoghe waghenyi, na wandu wiidagha aha ndoenyi.

¹⁴ Angu wandu widedagha huwo wadawonyera worinyi kukaia waawuyalola isanga ja mzawo.

¹⁵ Ngera wedeeka wikijiririkanya ijo isanga werejifumieghe, weredimagha kupata wulalo ghowuya.

¹⁶ Ela seji iko, weekunda isanga jiboie kuchumba, najo ni ja mlungunyi. Kwa huwo, Mlungu ndewonagha waya ghungi iji wakammbanga Mlungu wawo, angu wawiboisire muzi.

¹⁷ Kwa irumirio, Abrahamu uendatimwa ni Mlungu, oremfunyireghe Isaaka ukaie kizongona; hata ngera orekoghe wapata agho malaghiro, ela ukakaia tayari kumfunya mwana wake wa ititi;

¹⁸ umoni Mlungu oreghorieghe aighu yake huwu, “Kuchapata kivalwa kwa chia ya Isaaka.”

¹⁹ Abrahamu oretalieghe kukaia Mlungu wadima hata kurukisha wandu kufuma kwa wafu, na huwo ni sa kughamba kwa mfwano, odemmbusa kufuma kwa wafu.

²⁰ Kwa irumirio, Isaaka orewirasimieghe Jakobo na Esau hata kwa maza ndicha richagha.

²¹ Kwa irumirio, ngelo Jakobo walighisa kufwa, orewirasimieghe kula umu wa wana wa Josefu ukaghoghoma aighu ya mzata ghwake na kutasa.

²² Kwa irumirio, iji Josefu walighisa kufwa, orejieghe malagho gha kufuma kwa Waisraeli isanga ja Misri; nao ukafunya malaghiro aighu ya mariko ghake.

²³ Kwa irumirio, Musa uendavalwa, orevisiroghe meri idadu ni wavi wake, angu werewonieghe seji uo mwana ughokie, hata ndewicheobua momu ghwa mzuri anduangi.

²⁴ Kwa irumirio, Musa uendazoghua, oreleghieghe kuwangwa mwana wa mwai wa Farao;

²⁵ ukasaghua kupata wasi chiaimweri na wandu wa Mlungu, kuchumba maseko gha kaung'a ghiidagha.

²⁶ Ukawona angu kusholelwa kwa wundu ghwa Kristo, ni mali mbaa kuchumba mali rose ra Misri; angu orekoghe ukisuwiria mafungu ghichagha.

²⁷ Kwa irumirio, Musa orefumieghe Misri useobuagha machu gha mzuri, angu orekoghe ukirumaghia seji uammbona Mlungu uo usewonekagha.

²⁸ Kwa irumirio, orewikieghe Pasaka, ukamichira bagha vizingitinyi va minyango eri uo Malaika Mtoteshi wa wavalwa wa imbiri usekewiadada.

²⁹ Kwa irumirio, Waisraeli wereruwukieghe Bahari ya Shamu sa ndoe iomie; ela Wamisri wiendatima kubonya huwo, wikamilwa ni machi.

³⁰ Kwa irumirio, mawurigha gha Jeriko ghereghueghe andonyi nyuma ya kumarwa mbai-mbai kwa matuku mfungade.

³¹ Kwa irumirio, Rahabu jija ilaya, ndejeretotereghe chiaimweri na awo wereleghieghe, angu orewikaribishireghe waja washeki sa waghenyi wake.

³² Nighore ghiao sena? Angu ngelo ndeinikatagha eghora malagho gha Gideoni, Baraki, Samsoni, Jefuta; gha Daudi, Samueli, na walodi;

³³ wandu awo kwa irumirio, weresimieghe mawuzuri, wikawika hachi, wikapata malaghiro, wikafunga memu ya shimba,

³⁴ wikarimisha medo ibirie, wikafufunuka wisebwagho kwa lufu, wikapata ndighi nyuma ya kusilwa kwawo, wikawuya mang'oni wudenyi, wikawinga majeshi gha kighenyi.

³⁵ Waka werepatireghe kurukishirwa wafu wawo. Wamu wereleghieghe kufungulwa, wikafwa kwa matiriro, eri wipate kurukia irangi jiboie kuchumba.

³⁶ Wazima weresekeloghe na kukabwa na viboko, hata kufungwa na minyororo, na kungirwa kifungonyi.

³⁷ Werelasiroghe na magho, weredumbuloghe na misumeno, werebwaghiloghe kwa lufu, werekoghe wikimara-mara wikirwa mirongo ya ng'ondi na ya mburi; werekoghe wakiwa, wandu wa wasi, wikorongelo.

³⁸ Ni wandu wurumwengu ghuserefwaneghe kukaia nawo anduangi; wadamara-mara kireti, na mighondinyi; wadalala mbangenyi, na mirumenyi ya ndoenyi.

³⁹ Wandu awo wose, hata ngera werekumiloghe kwa wundu ghwa irumirio jawo, ndewerepatireghe agho gherelaghiriloghe anduangi.

⁴⁰ Kwa kukaia Mlungu orezoeghe ukawona kilambo chimu chiboie kuchumba kwa wundu ghodu, kukaia kuseko na isi, awo wisekatisho anduangi.