TITO 2 - Biblia Ilagho Jiboie Kwa Wandu Wose

Mafundisho gha loli

¹ Ela oho, fundisha agho malagho ghiko gha loli.

² Kuwilaghire waghosi wikaie wa kukumazira, wiko na wuloli, wiko na suku, na irumirio jikatie, na lukundo, na kumanga.

³ Kuwilaghire wakeku wokoni wikaie na tabia ra ishima; wisakekaia wazighirii, angu wazumba wa chofi. Wifundishe agho ghiko mecha,

⁴ na kwa iyo chia, wiwifundishe waka wa irika kuwikunda womi wawo, na wana wawo;

⁵ wikaie na akili, wielie, wezighana kazi ra nyumbenyi, wikaie wecha, wekusera kwa womi wawo; eri ilagho ja Mlungu jisepate kumenywa.

⁶ Huwo koni kuwishashire wadawana wikaie wekumazira weni.

⁷ Kukuwonyere kumoni kukaia mfwano ghwa mabonyo mecha kwa kula chia, na kwa mafundisho ghako kukuwonyere kumoni kukaia kwaghiichi sena kwawuyaghitala,

⁸ kwa madedo gha loli ghisedimagha kufunywa makosa; eri mtangali upate kufushwa waya, kwa kusowa ilagho jingi iwiwi jeghora.

⁹ Kuwilaghire wazumba wikusere kwa weke bwana wawo, na kuwikatishira maza rawo rose; wisekaie wandu wa nganyi,

¹⁰ hata kuiwa-iwa, ela wiwonyere seji wiko waloli putu, eri wipate kwa maza rose kughirudia ishima mafundisho gha Mlungu Mkiri odu.

¹¹ Angu mvono ghwa Mlungu ghwamerie kuwoneka kwa wundu ghwa kukia kwa wandu wose,

¹² nagho ghwadifundisha kulegha mawiwi, na bea ra wurumwengu, dipate kudua moyo diko na akili ndicha, waloli, na irangi jiko na kuobua kwa Mlungu andenyi ya wurumwengu ughu;

¹³ dikijiwesera kwa isuwirio ijo Ituku jirasimilwagha, ja uko kuwoneka kwa wubaa ghwa Mlungu odu m'baa, na Mkiri Jesu Kristo.

¹⁴ Uo orekufunyireghe moni kwa wundu ghodu, upate kudikombua kufuma kwa makosa ghose, na kukueleshera moni wandu wake, awo wifungagha ndighi kwa mabonyo mecha.

¹⁵ Ghora maza iri, shashira na kukania kwa nguma rose; mndungi usakekumenya.