RUTHU 3 - Biblia Ilagho Jiboie Kwa Wandu Wose

Ruthu kupata mndwawomi

¹ Konyuma Naomi ukamzera Ruthu, “Ni nicha nikulolie muzi nga mao eri kuwone kaia nicha.

² Nechi Boazi, umundu wai wake moresindanyagha, ni mundu odu wa ifwa. Ola linu uchakaia ukiela shairi nakio aja lwala lochania viro.

³ Kwa huwu kukuoghoshe, kukushinge mavuda, na kurwa nguwo rako riboie, nao kusee cha lwalenyi lochanira viro; ela kusekumanyishe kwake, hata umerie kuja na kunywa.

⁴ Ela ukameria kulala, kuzighane andu walalia, hata ukameria kuwadwa ni dilo, kwende kufunukuo nguwo wakufinikira cha maghunyi, nao kulale maghunyi kwake. Uchakughoria ilagho jebonya.”

⁵ Ruthu ukamtumbulia, “Nichabonya kula ilagho kwanizera nibonye.”

⁶ Nao Ruthu ukasea cha lwalenyi lochania viro ukabonya sa iji koni uzereloghe ni mkekwake.

⁷ Hata iji Boazi wameria kuja na kunywa, na ngolo yake kusikira nicha, ukaghenda konenyi andu mabunda gha shairi gheretumbanyiroghe, ukalala aho. Niko Ruthu ukacha mboa-mboa kwa kiviso ukamfunukua Boazi nguwo wakufinikira cha maghunyi; ukalala aho maghunyi.

⁸ Kio ghadi, Boazi ukaturukia, ukaghaluka luwaru, ukashinika kuwona muka walala maghunyi kwake.

⁹ Ukakotia “Nani oho?” Ukatumbulia, “Ni ini Ruthu; nakulomba kunifinikire nguwo, kwa kukaia ni oho mundu odu wa ifwa.”

¹⁰ Nao ukamzera, “BWANA ndekurasimie mwai wapo, kwa kukaia wucha kwaghuwonyera idana, ghwachumba ghuja ghwa imbiri kughubonyere kwa mkekwako; angu kusewinughie wandu wa irika, wikaiagha wiko na mali angu wisene mali.

¹¹ Idana mwai wapo kuseobuo, nichakubonyera kula ilagho kwajilomba, kwa kukaia kula mundu uko andenyi ya ughu muzi waichi angu ko muka kuboie.

¹² Loli ini ne mundu wa kichuku chako, ela koko mundu uko wa kichuku cha kaavui kunichumba ini.

¹³ Wesera ndoe iele; kesho dichakotia ngera ucharumiria kukuwusa; ukarumiria ni nicha, ela iji walegha kukuwusa, naghema kwa Mlungu uko moyo, ini nichakuwusa. Oho lala hata ndoe iele.”

¹⁴ Niko ukalala aho kwake hata nakesho, ela ukawuka kokio, imbiri ya ngelo mndungi usedimagha kummanya mmbao; na Boazi ukamzera, “Lindia mndungi usemanye wei muka wachee lwala lochania viro.”

¹⁵ Boazi ukamzera, “Rua shuka yako kuiale aha.” Nao ukaiala, na Boazi ukamdungia kilo mirongo iwi ra shairi, ukamdukishira; nao ukaghenda cha mzinyi.

¹⁶ Hata iji wavika mzinyi, mkekwake ukamkotia, “Malagho ghakaie wada mwai wapo?” Ukamghoria ghose ghibonyero ni uja mundu.

¹⁷ Ukachuria kumzera, “Na iri kilo mirongo iwi nuo moni wanineka, ukanizera niseche kwako mikonu miduu.”

¹⁸ Nao ukamzera, “Wesera mao hata kwamanya seji iri maza righendagha; kwa kukaia umundu ndechaahora hata wameria kukatisha maza rose idime.”