RUTHU 2 - Biblia Ilagho Jiboie Kwa Wandu Wose

Ruthu kudumika mbuwenyi kwa Boazi

¹ Naomi orekoghe na mndumu wa kinyumba cha mumi, uwangwagha Boazi, mundu uko na mali, wa kichuku cha weke Elimeleki.

² Ituku jimu, Ruthu M'moabu ukamzera Naomi, “Leka niendeshoa masighariko gha vanga vawuyasighwa na nyuma ni waja wandu wawuyakuwida mbuwenyi, kewada nadima kutalika.” Naomi ukamzera, “Ghenda mao.”

³ Ruthu ukaghenda cha mbuwenyi, ukakaia ukiwinugha na nyuma awo wandu werekoghe wikikuwida, ukashoa agho masighariko gha vanga va viro werevisighieghe, na kwa bahati, iyo mbuwa erekoghe ni ya Boazi uo orekoghe wa kichuku cha weke Elimeleki.

⁴ Boazi ukacha kufuma Bethlehemu, ukawizera waja werekoghe wikikuwida, “BWANA ukaie nenyo!” Nawo wikatumbulia, “BWANA ndekurasimie.”

⁵ Boazi ukamkotia m'baa wa wadumiki wake wekuwida “Uja mwanwawaka ni wani?”

⁶ Uja m'baa wa wadumiki ukamtumbulia, “Ni uja mwanwawaka M'moabu uchanye na Naomi kufuma isanga ja Moabu.

⁷ Waanilomba nimneke rusa ushooghee masighariko gha viro nyuma yedu, nao kufuma nakesho odeeka kishoa hata idana; waahora idakoni kijunyi.”

⁸ Niko Boazi ukamzera Ruthu, “Sikira mwai wapo, kuseghende mbuwa ingi zima, kodeshoaghaa viro ahaeni aha; kukanye na awa wana wa waka wiko aha.

⁹ Kodewizighaniragha andu wiendaakuwida, nao kodewinughagha. Nawilaghira wandu wa irika wisakekusumbua. Kukasikira kau, kwende kunyo machi mtunginyi agho waghidaya.”

¹⁰ Ruthu ukaghoghoma hata chongo chake chikadunga andonyi, ukaghamba, “Yakaia wada oho kunitale nandighi huwu ini niko mghenyi?”

¹¹ Boazi ukatumbulia, “Naghorelo putu maza rose kum'bonyere mkekwako nyuma ya kifwa cha mmigho, na seji kuwisighie ndeyo na mayo na isanga jako, kukacha kwa wandu kusewiichi.

¹² BWANA ndekulipe kwa wundu ghwa agho ghose kubonyere; ukulipe malipo ghikatie kufuma kwa BWANA Mlungu wa Israeli, uo kwacha kukusaghika nao.”

¹³ Ruthu ukamtumbulia, “Kwanibonyera wucha mungi nandighi bwana wapo, kwanihoresha ngolo na ndighi kwa madedo ghako gha wughoma hata ngera ini siko umu wa wadumiki wako anduangi.”

¹⁴ Ngelo ya vindo, Boazi ukamzera Ruthu, “Choo aha kuje vindo; na mkate kushingie divei.” Ukacha ukasea kidombo mbai-mbai ya wandu wekuwida. Boazi ukaisa bisi kwake, ukaja hata ukasighara.

¹⁵ Hata iji wawuka kwendashoa viro, Boazi ukawizera wandu wake wa irika, “Msighenyi ushoo hata andu mwafunga visuke, msem'bukie.

¹⁶ Sena mumruchue vimu mwavifunga upate kushoa, msemrashe.”

¹⁷ Ruthu ukashoa viro hata luma lwa kenyi, nao uendavichana, ukawona angu wakuwida kaavui ya kilo ikumi ra shairi.

¹⁸ Ukaviduka na kuwuya mzinyi, ukammbonyera mkekwake ivo viro wavishoa; ukamneka na ghaja masighariko gha vindo uvijieghe ukasighara.

¹⁹ Mkekwake ukamzera, “Ni hao kusindeshoa viro idime? Ni mbuwa yani kusindebonyera kazi? Nderasimilo uo mundu wakuwonia wughoma.” Ruthu ukamghoria mkekwake andu usindebonya kazi; ukamzera, “Irina ja uo mundu nisinde bonya kazi kwake ni Boazi.”

²⁰ Naomi ukaghamba, “Uo mundu nderasimilo ni BWANA, uo kwa wughoma ghwake usewiliwagha awo wiko moyo na awo wifue.” Ukachuria kughora, “Uo mundu ni kichuku chedu cha kaavui, ni mundu wa ifwa.”

²¹ Niko Ruthu ukaghamba, “Chiaimweri na huwo wanizera angu nishoanyeghe viro na wadumiki wake hata wimerie kukuwida.”

²² Naomi ukamzera Ruthu mka-mwanwake, “Ni nicha mao kwendanyeghe na wai wake, wandu wa irika wisechekusumbua kwa mbuwa zima.”

²³ Kwa huwo ukanughana na wai wa Boazi, ukashoa viro hata ngelo emeria kukuwida shairi na ngano; Ruthu ukakaia kwa mkekwake.