NEHEMIA 5 - Biblia Ilagho Jiboie Kwa Wandu Wose

Kuwonelwa kwa wakiwa

¹ Konyuma wandu wengi wa womi na waka wikazoya kuwizughunukia wambao Wayahudi.

² Wamu wikaghamba, “Isi deko na familia mbaa; dineke viro vekata dipate kukaia moyo.”

³ Wamu wikaghamba, “Dawikie mbuwa redu wufunga, na mbuwa ra mizabibu, na nyumba redu, eri dipate viro disebwagho ni njala.”

⁴ Wamu nawo wikaghamba, “Dakopie pesa relipa kodi ya serikali kwa wundu ghwa mbuwa redu na iro ra mizabibu.

⁵ Idana isi deeka karakara na wambedu Wayahudi, na wana wedu weeka sa wana wawo; ela sena daawuyawifungisha ndighi wana wedu wa womi na wa waka kuwuya wazumba, na wai wamu wedu wamerie kubonywa wazumba; ela isi ndediwadie ndighi retesia ilagho iji, kwa kukaia mbuwa redu na mbuwa redu ra mizabibu ramerie kuwuswa.”

⁶ Niendasikira mazughunuko ghawo, nerewawiloghe nandighi;

⁷ ngakata shauri ebonya ilagho. Ngawirasha vilongozi na wabaa wa wandu ngighamba, “Inyo mwaawuyawikoronga wanyinyu.” Ngaghamba mwandu ghwa wandu wose ghuzighane agho malagho

⁸ ngighamba, “Isi datimie seji didimagha kuwighua wanidu Wayahudi wikuuzire weni kwa iro mbari ra wandu. Ela inyo mwaawuyawibonya wanyinyu wikuuze weni konyu inyo waruna Wayahudi.” Wabaa wikanyama kima wikasowa jeghora.

⁹ Niko ngaghamba, “Agho malagho mwawuyabonya ndeghiboie! Yafwane kughenda kwa kum'bonyera Mlungu ishima, eri mghirie wandu wa iro mbari zima, awo wiko wamaiza wedu wisediseke.

¹⁰ Nawirumirie wandu wikope pesa na viro kufuma kwapo. Wangara wapo na wadumiki wapo wadabonya woruwo. Sighenyi uku kuvara fwaida.

¹¹ Vutenyi sile rose morewilawiagha, ikaiagha pesa angu viro angu divei angu mavuda. Wiwunjirenyi mbuwa rawo, na mbuwa rawo ra mizabibu na mizeituni, na nyumba rawo shwa-shwa!”

¹² Vilongozi vikatumbulia, “Dichabonya sa iji kwaghora. Dichawunja vilambo vawo, nesi ndedichaawilawia anduangi.” Ngawiwanga wakohani, ngawibonya vilongozi wibonye ighemi imbiri kwawo kukaia wichabonya sa iji koni walaghira.

¹³ Nanimoni wori ngaghughudua mkowa ghwapo ngaghamba, “Huwo niko Mlungu uchaamghughudua kula umu onyu usemaziraa ilaghiro jake. Mlungu uchawusa nyumba renyu na vilambo vose muko navo umsighe duu.” Na ikwanyiko jose jikadika, “Amen;” wikamkasa Mlungu. Vilongozi wikabonya seji werelaghirieghe.

Ishima ja Nehemia

¹⁴ Andenyi ya miaka yose ikumi na iwi, ngikaia m'baa wa isanga ja Juda, kufuma mwaka ghwa mirongo iwi ghwa kubonya nguma kwa Mzuri Artashasta hata mwaka ghwake ghwa mirongo idadu na iwi, ini hata kichuku chapo ndederewusireghe malipo gha vindo ivo veredifwaneghe, hasa ini sa m'baa wa isanga.

¹⁵ Kula m'baa wa awo werekoghe imbiri yapo, werewidukishireghe wandu misigo ilemere, nawo werekoghe wikiwusa kufuma kwa wandu vindo na divei, kula na vibelele va feza mirongo ina. Hata wadumiki wawo werekoghe wikiwikoronga wandu. Ela ini serebonyagha huwo angu neremuobueghe Mlungu.

¹⁶ Nerekufunyireghe kwa ndighi rapo rose kughuagha wurigha sena; serelombieghe kilambo chingi. Kula mundu orebonyereghe kazi kwapo orengirieghe kazi eagha wurigha.

¹⁷ Nerekoghe ngiwijisha Wayahudi ighana na mirongo misanu mezenyi kwapo ngelo kwa ngelo chiaimweri na vilongozi vawo, kula na wandu werekoghe wikicha kwapo kufuma kwa mbari widimarie chia rose.

¹⁸ Vindo veredekwagha va ituku jimweri verekoghe ng'ombe imweri, na ng'ondi irandadu risaghulo, na nguku nyingi rereboisiroghe kwa wundu ghwapo. Kula matuku ikumi, nerewinekieghe wandu divei mbishi kwa wungi; ela chiaimweri na ivi vose, serelombieghe pesa ra vindo rifwane rineko m'baa wa isanga, kwa kukaia awa weredukishiroghe msigo ghulemere.

¹⁹ Kukumbuke wucha nibonyere kwa awa wandu ee Mlungu.