NEHEMIA 4 - Biblia Ilagho Jiboie Kwa Wandu Wose

Nehemia kusima watangali wa kazi yake

¹ Nao iji Sanbalati wasikira kukaia isi Wayahudi daawuyaagha wurigha, ukazamilwa nandighi, na kudiseka kwa lumenyo.

² Ukaghora imbiri ya wangara wake na ijeshi ja Samaria, “Awa Wayahudi wanyonge wibonyaki aha? Loli wiagha muzi ghwawo? Wiaghesha wikafunya kizongona wimeria kughuagha kwa ituku jimweri? Wadima kughiwusira magho ghikorelo ghikawuya vitungu va wuchafu?”

³ Tobia Muamoni orekwanyenye nao ukaghamba, “Ni wurighaki ughu wawuyaghuagha? Hata mzozo ghukejoka aighu ghuawuduka!”

⁴ Ngalomba ngighamba, “Sikira seji widimenyagha ee Mlungu, lumenyo lwawo luwiwurie weni. Kuwibonye wisoko vilambo vawo, sena widwalo wunyika.

⁵ Kusewifuye wughoma mawiwi waghibonya, hata kusakeliwa kaung'a rawo, angu wadidukana isi dawuyaagha.”

⁶ Niko dikaagha wurigha ghukadungana; ghukavika nusu ya wuighu ghwaro; angu wandu werekoghe na ngolo ya kazi.

⁷ Ela iji weke Sanbalati na Tobia, na wandu wa Arabia, Amoni, na Ashdodi weresikireghe wei kazi eboisa wurigha ghwa Jerusalemu yaawuyaghenda imbiri na malanga ghaawuyariwa, wikazamilwa nandighi.

⁸ Wikabonya njama echa kulwa na Jerusalemu na kungira fujo andenyi.

⁹ Ela isi dikalomba Mlungu odu, na kuwika walindiri wewitangala kio na dime.

¹⁰ Wandu wa Juda wikabora lumbo lunughagha, “Wandu weduka mizigo wasilwa ni ndighi, na wuchafu ni mungi; ndedidimagha kubonya kazi wurighenyi.”

¹¹ Wamaiza wedu weregheshereghe, wei ndewiwonagha angu kumanya agho wichaabonya hata wadingiria na kudibwagha na kuighiria iyo kazi.

¹² Wayahudi werekoghe wikikaia aghadi ya wamaiza wedu werekoghe wikidimanyisha mipango ya wamaiza wawuyadibonyera edikaba.

¹³ Niko ngawika wandu kunughana na nyumba rawo; wiko na chufu, na mafumu, na ndana rawo, wikaie nanyuma ya ugho wurigha ghusesirie.

¹⁴ Nerewonieghe kukaia wandu wakaia na wowa. Ngawuka na kuwizera vilongozi, na wabaa, na wandu wazima wose, “Msakewiobua wamaiza wedu. Kumbukenyi seji BWANA uko m'baa, oobosha, muwilue wanyinyu na wana wenyu wa womi, na wa waka, waka wenyu na mizi yenyu.”

¹⁵ Wamaiza wedu wikasikira kukaia daimenyere mipango yawo; wikatambua kukaia Mlungu wamerie kuinona mipango yawo. Niko dikawuya diwose kuagha wurigha sena.

¹⁶ Kufuma ngelo iyo, wandu wapo wamu wikakaia wikibonya kazi na nusu imu wikakaia wikilindia wiko na marwao gha wuda; mafumu na ngao, na ndana. Vilongozi vedu vose vikakufunya kutesiana na wandu

¹⁷ awo werekoghe wikiagha wurigha. Waja werekoghe na kazi eduka vilambo veagha weredukieghe kwa mkonu ghumu, na kwa mkonu ghumu kula umu ukadwa iswagha jake.

¹⁸ Kula mundu orekoghe ukiagha orekufungieghe lufu kiwonunyi kwake. Mundu okaba tarumbeta ukakaianya nani.

¹⁹ Ngawizera vilongozi na wabaa na wandu wose, “Kazi yashabuka, nayo yadisasara awurighenyi na kuditanya kula mundu na mmbao.

²⁰ Mkasikira tarumbeta yakabwa, munikwanyikie. Mlungu odu uchadiluya.”

²¹ Kwa huwo derekoghe dikibonya kazi, na nusu ya wandu wamu werekoghe wikilindia kufuma ndoe kuela, hata nyerinyeri ribuke luma lwa kenyi.

²² Ngelo iyo ngawizera wandu kukaia kula mundu na mdumiki wake wilale andenyi ya Jerusalemu, eri dilindie muzi nakio, na kubonya kazi nadime.

²³ Serefunyireghe nguwo nakio, hata wambedu, hata wadumiki wapo, hata walindiri ndekuwadie mndungi orerueghe nguwo rake kula mundu orewadieghe iswagha jake mkonunyi.