NEHEMIA 3 - Biblia Ilagho Jiboie Kwa Wandu Wose

Kuagha wurigha ghwa Jerusalemu sena

¹ Huwu niko wurigha ghwa muzi ghoreaghiloghe sena. Mkohani m'baa Eliashibu orewukieghe chiaimweri na wakohani wambao wikaagha Mbenge ya Ng'ondi sena; wikaiwika wakfu, na kungira minyango yaro. Wikawika wakfu hata Mnara ghwa Ighana na Mnara ghwa Hananeli.

² Wandu wereaghieghe luwaru lunughie ni wa Jeriko. Zakuri mwana wa Imri ukaagha luwaru lunughie.

³ Kivalwa cha Hasenaa wereaghieghe Mbenge ya Samaki; wikabonya ighombo jaro; wikangira minyango ya mbenge na vuma varo verugha.

⁴ Meremothi mwana wa Uria, wawae Hakozi oreaghieghe luwaru lunughie. Wokoni Meshulamu mwana wa Berekia wawae Meshezabeli ukaagha luwaru lunughie. Na Zadoku mwana wa Baana ukaagha luwaru lunughie.

⁵ Wandu wa Tekoa wereaghieghe luwaru lunughie; ela vilongozi vawo wikalegha kubonya iyo kazi werenekeloghe ni wabaa.

⁶ Joida mwana wa Pasea na Meshulamu mwana wa Besodeia wereboisireghe Mbenge ya Kala; wikabonya ighombo, wikangira minyango na vuma varo verugha.

⁷ Melatia ufumie Gibeoni na Jadoni ufumie Meronothi, na wandu wifumie Gibeoni na Mispa wikaagha luwaru lunughie kuvikia andu m'baa wa isanga jiko magharibi ya Moda ghwa Eufrate ukaiagha.

⁸ Uzieli mwana wa Harhaia, mchani dhahabu oreaghieghe andu kumu. Hanania m'boisi marumba oreaghieghe andu kumu, hata kuvikia Wurigha Mshapa.

⁹ Refaia mwana wa Huri, m'bonyi nguma wa nusu ya isanga ja Jerusalemu, ukaagha andu kumu.

¹⁰ Jedaia mwana wa Harumafu oreaghieghe andu kumu kaavui na nyumba yake, na Hatushi mwana wa Hashabneia oreaghieghe andu kumu.

¹¹ Malkija mwana wa Harimu na Hashubu mwana wa Pahath-moabu wereaghieghe andu kumu chiaimweri na Mnara ghwa Mariko.

¹² Shalumu mwana wa Haloheshi m'bonyi nguma wa nusu ya isanga ja Jerusalemu oreaghieghe andu kumu, wikateselwa ni wai wake.

¹³ Hanuni na waisanga wa Zanoa wereaghieghe Mbenge ya Vololo; wikaiagha na kuingira minyango na vuma varo verugha. Wikaboisa wurigha meta maghana ana na mirongo ina hata kuvika Mbenge ya Wuchafu.

¹⁴ Malkija mwana wa Rekabu m'bonyi nguma wa isanga ja Beth-hakeremu oreiaghieghe Mbenge ya Wuchafu, na kuingiria minyango na vuma varo verugha.

¹⁵ Shalumu mwana wa Kolhoze, m'bonyi nguma wa isanga ja Mispa, oreaghieghe Mbenge ya Ndoria, ukaifinikira; ukangira minyango na vuma varo verugha. Ukaagha wurigha ghwa Kiriwa cha Shela kaavui na mbuwa ya mzuri, hata kuvikia viluwatiro viseagha kufuma Muzi ghwa Daudi.

¹⁶ Nehemia mwana wa Azibuku, m'bonyi nguma wa nusu ya isanga ja Beth-zuri, ukaagha hata kuvikia kulangaya makaburi gha Daudi, na kuvikia andu kisima chiaghilo, hata kuvikia nyumba ra majeshi.

Walawi awo widumikie wurighenyi

¹⁷ Walawi winughagha wereaghieghe sena chuwaru ndazi rinughie ra wurigha nawo ni: Rehemu mwana wa Bani oreaghieghe luwaru lunughie, Hashabia m'bonyi nguma wa nusu ya isanga ja Keila: oreaghieghe luwaru lunughie lwa isanga jake.

¹⁸ Bavai mwana wa Henadadi, m'bonyi nguma wa nusu imu ya isanga ja Keila, ukaagha luwaru lunughie.

¹⁹ Ezeri mwana wa Jeshua, m'bonyi nguma wa Mispa ukaagha luwaru lunughie naimbiri ya nyumba ya maswagha, hata andu wurigha ghughalukiagha.

²⁰ Baruku mwana wa Zabai, ukaagha luwaru lunughie hata andu kongiria nyumba ya Mkohani M'baa Eliashibu.

²¹ Meremothi mwana wa Uria wawae Hakozi ukaagha luwaru lunughie kufuma mnyangonyi ghwa nyumba ya Eliashibu hata kutua kwa nyumba.

Wakohani awo widumikie wurighenyi

²² Wakohani winughagha wereaghieghe sena andu kulazi kwa wurigha luwaru lunughie;

²³ Benjamini na Hashubu wereaghieghe luwaru lunughie kulangaya nyumba rawo. Wokoni Azaria mwana wa Maaseia, wawae Anania ukaagha luwaru lunughie naimbiri ya nyumba yake.

²⁴ Binui mwana wa Henadadi oreaghieghe luwaru lunughie kufuma nyumba ya Azaria hata mbembenyi ya wurigha.

²⁵ Palali mwana wa Uzai oreaghieghe kufuma mbembenyi ya wurigha hata mnara ghwa ngome ya lughu ya mzuri kaavui na nyumba ya walindiri.

²⁶ Pedaia mwana wa Peroshi oreaghieghe andu kumu cha mashariki kaavui na Mbenge ya Machi na mnara gholindia hekalu. (Aha ni andu kumu kwa muzi kuwangwagha Ofeli andu wadumiki wa Hekalu werekaiagha.)

Waaghi wamu

²⁷ Wandu wa Tekoa wereaghieghe luwaru lumu luzima lunughie, kufuma andu kulangayagha mnara m'baa gholindia Hekalu hata ghuja wurigha ghuko kaavui na Ofeli.

²⁸ Kipughi cha wakohani wereaghieghe andu kunughie kughenda cha kaskazinyi kufuma Mbenge ya Farasi kulangaya nyumba rawo kula umu.

²⁹ Zadoku mwana wa Imeri ukaagha andu kunughie kulangaya nyumba yake. Shemaia mwana wa Shekania, mlindiri wa Mbenge ya Mashariki oreaghieghe andu kunughie.

³⁰ Hanania mwana wa Shelemia na Hanuni mwana wa karandadu wa Salafu oreaghieghe andu kunughie kumu kwa kawi. Meshulamu mwana wa Berekia oreaghieghe andu kunughie kulangaya nyumba yake.

³¹ Malkija mchani dhahabu oreaghieghe andu kunughie hata kuvikia nyumba ya wadumiki wa Hekalu, na ya wandu wa biashara, kulangaya Mbenge Ekwanyikia hata Hekalunyi, kaavui na chumba cha ighu kona ya wurigha ghwa kaskazinyi mashariki.

³² Wachani dhahabu wa Washami nawo wikaagha wurigha ghwa kutua kufuma chumba cha ighu mbembenyi, hata Mbenge ya Ng'ondi.