NEHEMIA 2 - Biblia Ilagho Jiboie Kwa Wandu Wose

Nehemia kughenda Jerusalemu

¹ Mori ghwa Nisani, mwaka ghwa mirongo iwi ghwa kubonya nguma kwa Mzuri Artashasta nerewadieghe divei ngamneka mzuri. Nani jingi sewoneka niko na wasi imbiri kwake sa ijo ituku.

² Kwa huwo mzuri ukanikotia, “Welee kwawonaki kwakaia na wasi huwu kuseko mkongo ghungi? Kwaawuyawoneka koko na wasi ngolonyi.” Nao ngaobua nandighi.

³ Ngamtumbulia mzuri, “Mzuri ndeduo moyo kwa kala! Nisowa wasi ingelo muzi aho weke wawa wirikilo ghuchikanyiro na mbenge raro kukorwa?”

⁴ Niko mzuri ukanikotia, “Da kwakunde wada?” Nao ngamlomba Mlungu wa mlungunyi,

⁵ ngamzera mzuri, “Kukawona nicha ee mzuri, na ini mdumiki wako ngarumirikia mesonyi kwako, kunineke rusa nighende isanga ja Juda, ugho muzi niendeghuagha.”

⁶ Mzuri, malkia ukikaia kidombo na mbai kwake, ukarumiria ilombi japo. Ukanikotia, “Charo chako chidwa ngelo ing'ane wada na ni lii kuwuyagha?” Mzuri ukarumiria kunineka rusa, nani ngawika ngelo.

⁷ Niko ngamlomba unineke barua nighende naro kwa wabaa wa isanga jiko magharibi ya Moda ghwa Eufrate eri wipate kunibaria niide hata nivike Juda.

⁸ Wokoni ngalomba barua kwa Asafu mlindiri wa msidu ghwa mzuri; eri unineke midi ebonya misumbati ya mbenge reghenda cha Hekalunyi, na reagha wurigha ghwa muzi, na nyumba iyo nichaakaia. Mzuri ukanineka malombi ghapo, angu Mlungu orekoghe chiaimweri nani.

⁹ Niko ngaghenda na kuvika kwa wabaa wa isanga jiko kimonu cha Moda ghwa Eufrate, nikwanye na wabaa wa majeshi gheredumiloghe ni mzuri andwamweri na wajoki farasi; ngawineka barua ra mzuri.

¹⁰ Ela iji Sanbalati mundu wa Beth-Horoni wasikira na Tobia m'baa wa isanga ja Amoni, wikazamilwa nandighi kuwona mndumu wachalola kuwitesia wandu wa Israeli.

¹¹ Ngaghenda Jerusalemu, na kwa matuku adadu,

¹² seremghorieghe mndungi agho Mlungu ungirie ngolonyi kwapo gheibonyera Jerusalemu. Ngawuka nakio nawandu wamu watinieri ngafuma. Seredwaeghe ela uja punda moni neremjokieghe.

¹³ Ngafuma nakio na kuidia Mbenge ya Vololonyi, chia ya magharibi; ngaida Kiriwa cha Choka cha kusinyi, hata kuvika Mbenge ya Wuchafu. Ngalawua seji wurigha ghuchikanyiro na mbenge kukorwa.

¹⁴ Niko ngaghenda cha kaskazinyi hata Mbenge ya Ndoria na kuvika Kiriwa cha Mzuri; ela iyo nyamandu nereijokieghe ikalemwa ni kuida.

¹⁵ Niko ngasea kuidia Vololo ya Kidroni, ngajoka ngizighana wurigha; ngawuria ija chia nicheghe nayo, na kuidiria Mbenge ya Vololo, ngaghala.

¹⁶ Mndungi wa awo wabaa nderemanyireghe andu naghenda hata agho nerebonyagha, kwa kukaia serekoghe nawighoria Wayahudi wa kedu wakohani, na vilongozi, na wabaa, hata mndungi mzima orekoghe uibonye iyo kazi.

¹⁷ Niko ngawizera, “Mwawona wasi diko nagho, seji Jerusalemu ivuchukie, na mbenge raro rikorelo! Nndokonyi dighuaghe wurigha ghwa Jerusalemu diseduo na ughu waya.”

¹⁸ Ngawighoria seji Mlungu wapo orekoghe andwamweri nani ukanitesia, na agho nizerelo ni mzuri. Nawo wikarumiria wikighamba, “Ndedizoye kuagha.” Wikakaia tayari kuzoya kazi.

¹⁹ Ela iji Sanbalati Mhoroni, na Tobia m'baa wa isanga ja Amoni, na Muarabu uwangwaghwa Geshemu wiendasikira huwo, wikadiseka na kudimenya wikighamba, “Niki ichi mwawuyabonya? Mwawuyamlegha mzuri?”

²⁰ Niko ngawitumbulia, “U Mlungu wa mlungunyi uchadisimisha. Isi de wadumiki wake, nesi dichawuka diaghe sena; ela inyo ndemne hachi ya kilambo chingi Jerusalemu, hata ndemmbwadie ifungu jingi ja mawiko ghake.”