NAHUMU 3 - Biblia Ilagho Jiboie Kwa Wandu Wose

¹ Ni bugha kwa muzi ghubwaghagha wandu, ghuchue tee na mali resoka.

² Sikira mchapo ghwa kiboko, na mlilo ghwa magurudumu gha magare, na farasi rikimbiagha, na magare ghighendagha.

³ Wajoki farasi wiarijoka; chufu riakaaka na mafumu kung'alishwa; majeshi ghabwaghwa! Kitungu cha gharia na mimbi ifue isene mtalo; wandu wiakuwarwa ni mimbi ifue.

⁴ Nineve uchakabwa kwa wundu ghwa wumalaya ghwake. Waghokie, uchue mbingu rebwagha; waloghie iro mbari na kuribonya wazumba wake.

⁵ BWANA Uwadie Ndighi Rose waghamba, “Nichakukaba oho Nineve! Nichakufunukua nguwo rako na kuwonyera wuduu ghwako kwa iro mbari, na waya ghwako ghose.

⁶ Nichakumichira wuchafu kumenyeke, na kukubonya kukaie kilambo chezighanwa kwa lumenyo.

⁷ Na awo wose wichaakuzighana wichakukimbia na kughamba, ‘Nineve yanonekie, nani uchaaghulilia? Niwonia hao wandu weihoresha ngolo?’”

⁸ Kwani oho kwachumba Thebesi naki, ugho muzi m'baa ghwa Misri? Ghwamarilo ni machi chia rose; Moda ghwa Naili ghorekoghe kituwiro chake, na bahari ikakaia mwano ghwake.

⁹ Ethiopia na Misri redeeka ndighi yake mbaa; Libya erekoghe ikimtesia.

¹⁰ Ela sena wandu wa Thebesi wikadwalwa wunyika; wana wake watini werekoghe wikikabwa na kubwaghwa kutuonyi kwa kona ya kula chia. Wandu wake wikumikie wa ishima werefungiloghe na minyororo, wikawaghwa kwa kukabilwa kura ni awo wandu werewidwaeghe wunyika.

¹¹ Na oho Nineve wori kuchawongia kulaghalo ni akili, kuchakimbia cha kivisonyi kwendelola andu kokimbiria kwa m'maiza wako.

¹² Ngome rako rose reeka sa mtini ghuko na tini ra imbiri riwurue; ghukasughuswa, richapotokia momunyi kwa uo ujagha.

¹³ Masikari ghenyu gheeka sa waka, na isanga jenyu ndejiwadie wulindiri imbiri ya wamaiza wenyu; luvuna lonyu lookorwa ni modo.

¹⁴ Dayenyi machi mkuwike tayari ngelo emarwa ni wamaiza; mangishenyi ngome renyu. Kotenyi nganda muiruwe; mkabe matofali.

¹⁵ Chia imweri na agho ghose, mchakorwa na modo, angu kubwaghwa wudenyi. Mchamerelwa sa vindo vajighwa ni zighe. Kuchurienyi mmbeni mkaie sa zighe, churikienyi mkaie sa weke mwapazi.

¹⁶ Mwachurie washami wenyu kuchumba nyerinyeri ra mawingunyi, ela idana ndewiko, wainjika sa zighe raburuka noko.

¹⁷ Wabaa wenyu wa isanga weeka sa izungu ja zighe japakia awurighenyi ngelo ya mbeo; ela iji iruwa jabuka, raburuka noko, hata mndungi ndemanyagha andu raghenda.

¹⁸ Ee mzuri wa Ashuru, wabonyi nguma wako wafwa; wandu wako wa ishima wameria kufwa. Wandu wako wasaghisika aighu mighondinyi; wasowa mndungi owitumbanya.

¹⁹ Kushoghonoka kwako ndekurighitikagha, vonda varo ndeviboagha. Wandu wisikiragha malagho ghako, wichakaba chui kwa kuboilwa. Nani useichi kinyanya chako chisene kutua?