MIKA 3 - Biblia Ilagho Jiboie Kwa Wandu Wose

Mika kutanya vilongozi va Israeli

¹ Sikirenyi inyo wabaa wa Israeli! Welee, si inyo msuwirilwagha kuitala hachi?

² Ela inyo mwadazamilwa ni ijo jiko icha, na kuchikunda icho chiko kiwiwi. Mwawisicha wandu wapo wiko wimoo sa mchinji na kukonua nyama maindinyi kwawo.

³ Mwakonua mrongo na kuja nyama ya wandu wapo sa nyamandu ya isakenyi, na kuchikanya maindi ghawo, mkighidumbua sa nyama sufurienyi, angu nyungunyi.

⁴ Ngelo yaawuyacha; nenyo mchamkemia BWANA ela ndechaamtumbulia. Ndechaasikira malombi ghenyu angu m'bonyere kiwiwi.

⁵ Wandu wapo waawuyalaghashwa ni walodi wiwilaghiragha sere ingelo walipwa kindo chimu, na kuwiredia wuda awo wisewinekie kindo chingi. BWANA waghora huwu kwa awo walodi,

⁶ “Ituku jenyu jasia inyo walodi; iruwa janeng'ena konyu. Ndemchaaloda ilagho jingi.”

⁷ Wandu wilodagha malagho ghichagha wichafwa waya iji ghakaia ghisekatie. Wichaserwa angu Mlungu usewitumbuliagha.

⁸ Ela ini neechulwa ni Roho na kudima kwa BWANA, nao wadanineka maghesho gha hachi, na ndighi rewighoria wandu wa Israeli kaung'a rawo.

⁹ Nisikirenyi inyo wabonyi nguma wa Israeli, mzamilwagha ni kubonya hachi na kughalua loli iwuye tee.

¹⁰ Mwaawuyaagha Jerusalemu muzi ghwa Mlungu aighu ya msingi ghobwagha na kusowa hachi.

¹¹ Wabaa wa muzi wiatanya kwa kuhongwa; wakohani waro wiafundisha sharia kwa malipo; walodi waro wiafunya mawono wipate pesa; na ichia wiaghamba wei BWANA oko chiaimweri nawo wikighamba, “Ndediwonagha ilagho jingi, BWANA oko andwamweri nesi.”

¹² Kwa huwo Sioni ichalimwa sa mbuwa, na Jerusalemu ichawuya kitungasi, na mghondi ghwa Hekalu ghuwuye msidu.