MCHILI 9 - Biblia Ilagho Jiboie Kwa Wandu Wose

¹ Malagho agha ghose naghiririkanyire luma, ngawona kukaia Mlungu nuo wawuyaghibonyera nguma mabonyo gha mundu wa hikima na mhachi, na hata lukundo lwawo na kuzamilwa kwawo. Mndungi ndewuyemanya niki chimcheagha.

² Wandu wose wadapata ifungu jimweri. Kutua kumweri kwa mhachi na kwa mmbiwi; kwa mundu uboie na uzamie; kwa mundu uelie na useelie; kwa mundu ufunyagha vizongona na uo usefunyagha. Mundu uboie ndemchumbie mkaung'a na uo ughemagha ndemchumbie uo useghemagha.

³ Wuwiwi ghuko kwa agho ghose ghawuyabonyeka wurumwengunyi ni ughu: wandu wose kupatwa ni kutua kumweri. Aighu ya agho, ingelo wandu wiko moyo, wachulwa ni wuwiwi na isu, konyuma wafwa.

⁴ Ela uo ukwanye na wose wiko moyo, oko na isuwirio; kwa kukaia koshi iko moyo ni baa kuchumba shimba ifue.

⁵ Wandu wiko moyo waichi wori wichafwa, ela awo wifue ndewiwuemanya ilagho jingi. Ndewiwadie ifungu jingi sena; weeliwika putu.

⁶ Lukundo lwawo, na kuzamilwa kwawo, na kufunga ndighi kwawo, veesianya nawo. Ndewiwuyaakaia na wungara na malagho gha wurumwengu ughu sena.

⁷ Ghenda kuje vindo vako kukaie na kuboilwa; kunyo divei yako kukaie na iseko, angu Mlungu wakurumirie.

⁸ Kaia na iseko na kuboilwa ngelo rose.

⁹ Kuboilwanye na muka wako kumkunde, matuku ghose gha irangi jako ja duu, Mlungu ukunekie wurumwengunyi. Ijo nijo ifungu jako iranginyi kwako ja kazi kwawuyabonya wurumwengunyi.

¹⁰ Ijo jose kujibonyagha, bonya kwa kufunga ndighi; kwa kukaia ndekuwadie kazi ingi, angu ighesho jingi, angu kumanya kungi, hata hikima ingi andenyi ya wurumwengu ghwa wafu kwawuyakughendia.

¹¹ Sena nawonie andenyi ya wurumwengu ughu kukaia, wandu wa iseghe ibaa siwo wangi wisimagha misarigho ngelo rose, na mang'oni sigho ghangi wisimagha wudenyi ngelo rose. Wandu wa hikima ndewipatagha vindo ngelo rose, na wandu wa suku ndewipatagha mali ngelo rose, hata si awo wiko na wuya witalikagha kuchumba anduangi; ela kula mundu wadakwana na mzwana ghwake.

¹² Mdamu ndeichi ngelo yake. Sa iji koni samaki riwadwagha ni nyavu, na nyonyi kuwadwa ni mdegho, huwo koni wadamu wadawadwa ni malagho ghizamie shwa wori.

Maghesho aighu ya Hikima na Wukelu

¹³ Wokoni nawonie ilagho jimu jiko mfwano ghuboie ghowonyera seji hikima italwagha wurumwengunyi.

¹⁴ Korekoghe na muzi ghumu mtini, ghuseko na wandu wengi. Mzuri umu uwadie ndighi ukaghungiria. Ukaghurughaia na kukuboisa uvuchuo wurigha ghwaro.

¹⁵ Ela korekoghe na mkiwa umu uko na hikima; ukaghukira ugho muzi kwa hikima yake. Elaima mndungi ndecheemkumbuka uo mkiwa anduangi.

¹⁶ Hata ngera hikima ya mkiwa yamenyero, na malagho ghake kuleghasikirwa, ini niaghora wudimi ghwachumbwa ni hikima.

¹⁷ Kusikiria malagho gha mundu wa hikima kima kwaboie kuchumba kuboka kwa m'bonyi nguma aghadi ya wakelu.

¹⁸ Hikima yachumba maswagha gha wuda, ela mkaung'a umweri wadanona maza ndicha nyingi.