MCHILI 5 - Biblia Ilagho Jiboie Kwa Wandu Wose

Kuleghakaia wa shwa-shwa kubonya malaghiro

¹ Kukakaghenda Hekalunyi kukulindie. Ba kughenda aho kukufundishe, kuchumba kufunya vizongona sa wakelu wisemanyagha mecha na mawiwi.

² Kusakededa kusepimie, hata kusebonye malaghiro kwa Mlungu shwa-shwa. Mlungu wadakaia mlungunyi, na oho kwadakaia ndoenyi; kwa huwo kusedede malagho mengi.

³ Ndodo rizamie radaredwa ni kusumbukia maza nyingi, na madedo mengi ghadareda wukelu.

⁴ Kukabonya ighemi kwa Mlungu, kusemuke kujikatisha, angu ndeboilwagha ni wakelu. Katisha ighemi jako.

⁵ Ni nicha kusebonye ighemi, kuchumba kujibonya na kulemwa ni kujikatisha.

⁶ Kusedede malagho ghekungira kaung'enyi, ima kuchemzera mkohani wa Mlungu wei kodeghosha. Kwaki kum'bonyagha Mlungu ujoko ni machu aighu yako, na kuinona kazi kuibonyere?

⁷ Ndodo nyingi na malagho mengi ndeghina mana. Kwa huwo muobuo Mlungu.

Kusowa fwaida ekaia moyo

⁸ Kukawona wakiwa wikikorongwa isangenyi, na kusowelwa hachi, kuseshinike. M'baa wadazighanwa ni m'baa umu, sena oko m'baa umu aighu yake.

⁹ Wandu wose wadakusaghika na mavalo gha isanga, hata mzuri moni wadaghisuwiria.

¹⁰ Mundu ulakie na pesa, ndekatwagha. Uo ukunde kushama, ndekatwagha wokoni. Iro naro ni maza ra duu.

¹¹ Vilambo vikachurikia, na wandu wevitumia wiachurikia. Fwaida ya mndwaro ni uko kumanya tu uo ni mzuri wa mali.

¹² Dilo ra mpakazi rasingie, ujagha vindo vitini angu vingi; mzuri wa mali ndelalagha kwa kughesha wungi ghwa mali rake.

¹³ Jeko ilagho jimu nijiwonie wurumwengunyi jizamie nandighi: mundu ukuwikiagha mali rekutotesha moni,

¹⁴ naro rikasia kwa bahati izamie, hata ukasowa kindo chingi chewisighia wana wake.

¹⁵ Mdamu odecha wurumwengunyi uko duu na ukakafuma wurumwengunyi uchafuma uko duu wokoni. Ndedwagha kilambo chingi cha ivo uvibonyere kazi.

¹⁶ Ughu nagho ni wuwiwi ghuchumbie: mundu uche duu nao uwuye duu! Da wapata fwaidaki kwa agho ubonyere? Ni sa kuwingisa mbeo.

¹⁷ Matuku ghake ghose ooghitumia akirenyi, ukisumbuka uko na wasi na wukongo.

¹⁸ Neechawona huwu: ilagho jiboie putu ni mundu kuja na kunywa na kuboilwanya na icho uchibonyere kazi ngelo ya irangi jake ivui unekelo ni Mlungu. Iji nijo ifungu ja mdamu.

¹⁹ Mlungu ukamneka mundu mali na vilambo, na kumsigha uboilwanye navo, yamfwane ufunye chawucha ukiboilwa ni ivo uvibonyere kazi. Ijo ni inosi ja Mlungu.

²⁰ Kwa kukaia Mlungu wamrumirie ukaie na kuboilwa, ndechaasumbuka na ndighi wei irangi jeko ivui.