MATHAYO 9 - Biblia Ilagho Jiboie Kwa Wandu Wose

Jesu kum'boisa mkelemeri wa kupooza

¹ Niko Jesu ukangia ishuonyi, ukaruwuka ija ndiwa ukacha kwa muzi ghwake ghoni.

² Nao wandu wamu wikamredia mkelemeri wa kupooza walala wulinyi. Jesu uendawona irumirio jawo ukamzera uja mkelemeri, “Kaia na ngolo mwanwapo, kaung'a rako ralekwa.”

³ Walimu wamu wa Sharia wikazoya kuririkanya, “Mundu uhu uamsholia Mlungu!”

⁴ Nao Jesu ukimanya maririkanyo ghawo ukaghamba, “Kwaki mgheshagha mawiwi ngolonyi konyu?

⁵ Iji jiangue kughora ni jiao? Ni kughamba ‘Kwalekwa kaung'a rako’ angu ni kughamba, ‘Wuka kwende?’

⁶ Ela nakunda mmanye angu Mwana wa Mdamu wawadie nguma relekia wandu kaung'a wurumwengunyi.” Niko ukamzera uja mkelemeri, “Wuka kughuduke wuli ghwako kwende nyumbenyi kwako.”

⁷ Nao uja mkelemeri wa kupooza ukawuka ukaghenda nyumbenyi kwake.

⁸ Wandu wose izungunyi iji waghiwona agho, wikaobua na kumkasa Mlungu uo orewinekieghe wadamu iro nguma.

Kuwangwa kwa Mathayo

⁹ Nao Jesu ukafuma aja, hata iji orekoghe ukiida, ukammbona mmbwadi wushuru umu uwangwagha Mathayo, wasea kidombo ofisinyi kwake; ukamzera, “Ninughe.” Nao ukawuka ukamnugha.

¹⁰ Hata iji Jesu orekoghe ukija vindo nyumbenyi, wawadi wushuru wengi na wakaung'a wikacha, wikaseanya kidombo nao andwamweri na wanughi wake.

¹¹ Mafarisayo wiendawona agho wikawizera wanughi wake, “Kwaki Mwalimu onyu ujanyagha na wawadi wushuru na wakaung'a?”

¹² Jesu uendasikira agho ukaghamba, “Awa wiko banana ndewikunde mghanga ungi, ela ni awa wiko wakongo.

¹³ Ghendenyi mkufundishe kutambua kwaro malagho agha: ‘Neekunda wughoma si kizongona kungi.’ Serechieghe kuwiwanga wandu wecha anduangi, ela wandu wa kaung'a.”

Ikoto aighu ya kufunga tumu

¹⁴ Nao wanughi wa Johane wikamghendia Jesu wikamkotia, “Kwaki isi na Mafarisayo difungagha tumu kalazi koni, ela wanughi wako ndewifungagha anduangi?”

¹⁵ Jesu ukawitumbulia, “Welee, awa wiwangwagha arusinyi wadima kukaia na wasi iji bwana arusi ukwanye nawo? Hata! Ela ngelo bwana arusi wainjwa kwawo, ngelo iyo niko wichaafunga.

¹⁶ “Wandu ndewikumbagha kiraka cha nguwo mbishi kwa irasi, angu chija kiraka chicharashua jija irasi, na jija ilanga jichachurikia.

¹⁷ Hata wandu ndewidungiriagha divei mbishi kwa viriba va kala. Wikabonya huwo, viriba vichabarika na divei ichadika na viriba vichanoneka. Ela wandu wadadungiria divei kwa viriba viwishi, na vose vichakaia banana.”

Mwai wa M'baa umu na muka umu kuboiswa

¹⁸ Nao iji Jesu orekoghe ukighora agho, m'baa umu Myahudi ukacha ukimghoghomia ukamzera, “Mwai wapo wameria kufwa idakoni; ela nakulomba kuche kummbikirie mkonu ghwako, nao uchakaia moyo.”

¹⁹ Niko Jesu ukawuka andwamweri na wanughi wake ukamnugha.

²⁰ Nao muka umu, orekoghe ukifumwa ni bagha miaka ikumi na iwi, ukacha nyuma ya Jesu ukaadada kidambi cha nguwo yake;

²¹ ukibonya huwo oreririkanyireghe, “Ngamuadada nguwo yake eni nichaboa.”

²² Nao Jesu ukaghaluka ukammbona ukamzera, “Mwai, kaia na ngolo, irumirio jako jakuboisa.” Nao uja muka ukaboa saa ija cheni.

²³ Jesu uendacha nyumbenyi kwa uja m'baa orewiwonieghe wakabi misherembe na izungu ja wandu wikibonya nganyi,

²⁴ ukawizera, “Injikenyi aha mmbose, mwai uhu ndefue kungi, ela waalala.” Nawo wikamseka.

²⁵ Nyuma ya wandu kufunywa shighadi, Jesu ukangia andenyi ukammbwada mkonu ukammbusira.

²⁶ Malagho agho ghikaereshwa isangenyi kose.

Jesu kuboisa vitungure viwi

²⁷ Hata iji Jesu orekoghe ukifuma aja, ukanughwa ni vitungure viwi wikikema na kughamba, “Kudifue wughoma ee Mwana wa Daudi.”

²⁸ Nao iji Jesu wangia nyumbenyi, vija vitungure viwi wikamghendia, nao moni ukawikotia, “Welee, mwarumiria angu nadima kubonya ilagho ijo?” Wikamtumbulia, “Ee Bwana.”

²⁹ Niko Jesu ukawiadada meso ghawo ukaghamba, “Ndeikaie sa iji koni mwarumiria.”

³⁰ Meso ghawo ghikatambuka. Nao ukawilaghira na ndighi, “Msemghorie mndungi ilagho iji.”

³¹ Ela awo wikafuma na kughieresha malagho ghaja isangenyi kose.

Jesu kum'boisa kituri

³² Nao iji wandu werekoghe wikighenda chia rawo, wamu wikamredia mundu umu orekoghe kituri, angu orekoghe na pepo izamie.

³³ Hata nyuma ya ija pepo kumfuma, uja mundu ukazoya kudeda nicha. Wandu wikashinika wikaghamba, “Jingi ndediwonie ilagho sa iji kwa Israeli anduangi!”

³⁴ Ela Mafarisayo wikaghora, “Wadariwinga pepo kwa ndighi ra m'baa wa pepo.”

Jesu kuwadwa ni wughoma ghwa wandu

³⁵ Nao Jesu ukaghenda mizi yose mibaa na mitini, ukifundisha andenyi ya sunagogi rawo na kujichila Ilagho Jiboie ja wuzuri ghwa Mlungu; ukaboisa makongo na manyonge gha mbari rose.

³⁶ Nao iji wawizighana wandu, ukawiwona wasirimwa na kusaghisika, ukawadwa ni wughoma angu werekoghe sa ng'ondi risewadie mlisha ungi.

³⁷ Ukawizera wanughi wake, “Mvono ni mungi, ela wabonyi kazi ni watini.

³⁸ Mlombenyi Bwana wa mvono uwidume wabonyi kazi kwa mvono ghwake.”