MATHAYO 6 - Biblia Ilagho Jiboie Kwa Wandu Wose

Mafundisho aighu ya mafunyo ghetesia

¹ “Mkulindie msakebonya wudumiki ghonyu mucha imbiri ya wandu mkikunda wimmbone; angu aho ndemchaapata mafungu ghangi kwa Ndeyo onyu uko mlungunyi anduangi.

² Idana iji kwakafunya makuwio ghangi, kusakekuwonyera kumoni seji awo waji-kuwi wibonyagha sunagoginyi rawo, na chienyi; wikikunda kukaswa ni wandu. Namghoria loli, wameria kupata mafungu ghawo.

³ Ela oho iji kwakafunya makuwio ghangi, kulindie hata mghenyi wako wa kaavui usakemanya.

⁴ Mafunyo ghako ghibonyeke kivisonyi, niko na ndeyo uwonagha kivisonyi uchaakulipa.

Mafundisho aighu ya kulomba

⁵ “Idana iji mwakalomba, msakebonya sa awo waji-kuwi; angu awo wadakunda kulomba wikikaia kimusi sunagoginyi, na matanonyi gha chia wipate kuwonwa ni wandu. Namghoria loli, wameria kupata mafungu ghawo.

⁶ Ela oho iji kwakalomba, kungie chumbenyi kwako, kurughe mnyango, kumlombe Ndeyo uko kivisonyi; na Ndeyo uwonagha kivisonyi uchakulipa.

⁷ “Nenyo iji mwakalomba, msakededa madedo mengi ghiseeliagha sa wandu wisemwichi Mlungu, awo wigheshagha wichasikirwa kwa wundu ghwa madedo ghawo mengi.

⁸ Msekaie sa awo, angu Ndeyo onyu wavimanya ivo vilambo muko na bea navo imbiri inyo msevilombie.

⁹ Idana mlombeghe sa huwu: ‘Aba odu kuko mlungunyi, Irina jako jikaso.

¹⁰ Wuzuri ghwako ghuche, Lukundo lwako lubonyeke, ndoenyi sa iji luko mlungunyi.

¹¹ Kudineke idime vindo vedu va linu.

¹² Kudilekie makosa ghedu, sa iji koni isi diwilekie awa widikosere;

¹³ Kusakedikumba matimonyi, Ela kudikire na uja Mmbiwi.’

¹⁴ “Angu mkawilekia wandu makosa ghawo, na Ndeyo onyu uko mlungunyi uchamlekia inyo wori.

¹⁵ Ela iji msewilekie wandu makosa ghawo, na Ndeyo onyu ndechaamlekia makosa ghenyu anduangi.

Mafundisho aighu ya kufunga tumu

¹⁶ “Na inyo iji mwakafunga tumu, msakekaia na mawushu gha wasi sa awo waji-kuwi. Angu awo wadakucha mawushu ghawo kwa wasi wipate kuwonwa ni wandu seji wafunga. Namghoria loli, wameria kupata mafungu ghawo.

¹⁷ Ela oho iji kwafunga tumu, kushinge chongo chako mavuda, kuoghoshe wushu ghwako;

¹⁸ mndungi usakemanya wei kwafungie tumu; kumanyike kwa Ndeyo uko kivisonyi, na Ndeyo uwonagha kivisonyi uchakulipa.

Mali mlungunyi

¹⁹ “Msakekuwikia mali aha ndoenyi, andu soya na ngama rinonagha, na andu vitoi vibaragha na kuiwa;

²⁰ ela mkuwikie inyo mmbeni mali mlungunyi, andu soya na ngama risenonagha, na andu vitoi visebaragha na kuiwa anduangi.

²¹ Angu andu koni mali rako riko, nikokoni na ngolo yako ichaakaia wori.

Mwengere ghwa mumbi

²² “Iriso nijo taa ya mumbi ghwako. Iji iriso jako jiko banana, mumbi ghwako ghose ghuchakaia na mwengere.

²³ Ela iriso jako jikakaia mkongo, mumbi ghwako ghose ghuchachua kira. Idana ugho mwengere ghuko andenyi kwako ghukakaia kiralee, chichakaia kira kibaa saki!

Mlungu na Mali

²⁴ “Mndungi ndedimagha kuwidumikia weke Bwana wawi; kwa kukaia uchazamilwa ni uhu, na kumkunda uja; angu uchakufunya kwa umu, na kummenya uja mzima. Nenyo ndemdimagha kumdumikia Mlungu na mali anduangi.

²⁵ “Kwa huwu namzera, msakesumbukia irangi jenyu mchajaki, angu mchanywaki, angu kwa mumbi ghonyu mcharwaki. Welee, irangi ndajachumba vindo, na mumbi ndaghwachumba marwao anguwada?

²⁶ Rizighanenyi nyonyi ra mbeonyi: nderiwagha, hata nderikuwidagha, hata nderiwadie nganya anduangi. Ela hata huwo saki, Ndeyo onyu uko mlungunyi wadarilisha. Welee, inyo ndemko wa zoghori kuchumba iro nyonyi anguwada?

²⁷ Nani konyu kwa kuja wasi kwake, udimagha kuchuria ituku jimweri kwa irangi jake?

²⁸ Kwaki sena mughisumbukiagha marwao? Rizighanenyi mboi ra mlambenyi seji rizoghuagha; nderibonyagha kazi hata nderilukagha anduangi.

²⁹ Ela namzera, hata Solomoni kwa wuzuri ghwake ghose, ndererushiroghe nicha karakara na imu ya mboi iro anduangi.

³⁰ Ikakaia Mlungu wadarirusha huwo mboi ra mlambenyi riko idime sena kesho riakorwa, ndechaam'bonyera nicha kuchumba inyo wandu wa irumirio itini anguwada?

³¹ “Kwa huwu msakeja wasi mkighamba ‘Dichajaki angu Dichanywaki angu Dicharwaki?’

³² Angu wandu wa mbari zima wadasumbukia maza iro. Ela inyo, Ndeyo onyu wammanya angu moko na bea ya vilambo ivo vose.

³³ Wulalo ghwa agho, lolenyi kande wuzuri ghwa Mlungu na hachi yake, na vilambo vose mchanekwa.

³⁴ Kwa huwu msakeja wasi kwa wundu ghwa kesho, angu kesho ichakaia na wasi ghwake ghukate. Wasi ghwa kula ituku jimweri ghwakata.