MATHAYO 26 - Biblia Ilagho Jiboie Kwa Wandu Wose

Njama em'bwagha Jesu

¹ Nao iji Jesu wameria kughora agho ghose, ukawizera wanughi wake,

² “Mwamanya angu nyuma ya matuku awi kuchakaia na Ndima ya Pasaka, na Mwana wa Mdamu uchafunywa usulubisho.”

³ Ngelo iyo, wakohani wabaa na waghosi wa wandu wikakwana chiaimweri barazenyi kwa Mkohani M'baa Kayafa.

⁴ Wikabonya njama emmbwada Jesu kwa mikalo wimmbwaghe.

⁵ Ela wikaghamba, “Ngelo ya ndima mbai, nganyi ichewuka wandunyi.”

Jesu kushingwa mavuda aja Bethania

⁶ Nao iji Jesu orekoghe Bethania, nyumbenyi kwa Simoni Mkoma,

⁷ muka umu ukacha na chupa ya alabasta iko na marumba gha zoghori mbaa, ukamdiria Jesu chongonyi kwake ukija vindo.

⁸ Ela waja wanughi, iji waghiwona agho wikawawa wikighamba, “Ni hasaraki ihi?

⁹ Agha mavuda ghadima kuuzwa kwa zoghori mbaa, na iro pesa rineko wakiwa.”

¹⁰ Ela Jesu ukimanya agho ukaghamba, “Kwaki mumsumbuagha uhu muka? Uo wanibonyera ilagho icha.

¹¹ Mokwanye na wakiwa matuku ghose, ela ini sichakaianya na inyo matuku ghose anduangi.

¹² Muka uhu wanidiria mavuda agha, kuniwika tayari kwa mariko.

¹³ Nani namghoria loli, andu kose wurumwengunyi jichaachilwa ijo Ilagho Jiboie, na iji najo wajibonya muka uhu, jichaghorwa kwa kumkumbuka.”

Juda kurumiria kumfunya Jesu

¹⁴ Niko Juda Iskarioti, umu wa waja ikumi na wawi, ukawighendia wakohani wabaa ukawizera,

¹⁵ “Ngamfunya konyu muninekaki?” Nao wikamlipa vibelele mirongo idadu va feza.

¹⁶ Na kufuma ngelo iyo Juda ukakaia ukilola ngelo ifwane emfunya.

Jesu kubonya Ndima ya Pasaka na wanughi wake

¹⁷ Nao ituku ja imbiri ja Mikate Isewadie Chachu, wanughi wikamghendia Jesu wikamkotia, “Ni hao kukunde dikuboisire andu kojia Pasaka?”

¹⁸ Ukawitumbulia, “Ghedenyi mzinyi, nyumbenyi kwa mndumu mumzere, ‘Mwalimu waghamba, ngelo yapo yavika; nichaija Pasaka na wanughi wapo nyumbenyi kwako.’”

¹⁹ Wanughi wikabonya wokoni sa iji Jesu orewizerieghe, wikaiboisa Pasaka.

²⁰ Nao iji luma lwa kenyi lwavika, Jesu ukasea kidombo mezenyi andwamweri na wanughi wake ikumi na wawi.

²¹ Hata iji werekoghe wikija, Jesu ukaghamba, “Namghoria loli, umu onyu uchanifunya.”

²² Wanughi wikawawa ni ngolo nandighi wikazoya kumkotia umu umu, “Wele Bwana, ni ini ngera?”

²³ Jesu ukatumbulia, “Uo ushingiagha mkate ghwake bakuli imweri nani, nuo uchaanifunya.

²⁴ Mwana wa Mdamu uaghenda sa iji koni Maandiko ghiandikilo aighu yake, ela ni bugha kwake uja mundu umfunyagha Mwana wa Mdamu; erekaiagha nicha ngera uo mundu nderevaloghe jingi.”

²⁵ Niko na Juda wori, uo oremfunyireghe ukaghamba, “Mwalimu, ni ini?” Jesu ukamzera, “Oho kwaghamba.”

Ndima ya Bwana

²⁶ Nao iji werekoghe wikija vindo, Jesu ukawusa mkate, ukafunya chawucha ukaghuchikanya ukawineka wanughi wake ukighamba, “Koonyi muje, ughu nigho mumbi ghwapo.”

²⁷ Niko ukachiwada kikombe, hata iji wameria kufunya chawucha ukawineka ukighamba, “Kwa ichi nyonyi mmbose,

²⁸ angu ihi niyo bagha yapo ya ilaghano idikagha kwa wundu ghwa wengi kulekwa kaung'a.

²⁹ Namghoria angu sichaanywa divei sena hata ituku jija nichaainywa mbishi andwamweri nenyo kwa wuzuri ghwa Aba.”

³⁰ Nao wiendabora lumbo, wikafuma wikaghenda cha Mghondi ghwa Mizeituni.

Jesu kughora kiimbiri angu Petro uchamkana

³¹ Nao Jesu ukawizera, “Kio ichi cheni inyo mmbose mchakimbia munisighe niekeri, angu yaandikilo; ‘Nichamkaba mlisha, na ng'ondi richasaghisika.’

³² Ela nyuma ya kuruka kwapo nichamkiria cha Galilaya.”

³³ Petro ukamzera Jesu, “Hata ngera wose wichakusigha, ela ini sichaakusigha anduangi.”

³⁴ Jesu ukamzera “Nakughoria loli, kio ichi cheni, imbiri njogholo isededie, kuchanikana kadadu.”

³⁵ Petro ukamzera, “Hata ngera ichakaia suti difwanye, ini sichaakukana anduangi.” Na waja wanughi wazima wikaghora wokoni.

Jesu kulomba aja Gethsemane

³⁶ Niko Jesu ukaghenda chiaimweri nawo hata andu kuwangwagha Gethsemane ukawizera wanughi wake, “Kaienyi aha, nani nighende aja kulomba.”

³⁷ Nao ukawidwa Petro na waja wana wawi wa Zebedayo, ukazoya kuja wasi na kusumbuka.

³⁸ Niko aho ukawizera, “Nakaia na kuwawa kubaa ngolonyi kwapo kuvikia kufwa. Kaienyi aha mchereshe andwamweri nani.”

³⁹ Nao ukaghenda imbiri katini, ukaghwa kiwushu-wushu ukalomba, “Aba ngera kudimika kikombe ichi cha wasi ndechiniide; ela isekaie seji nikundagha ini, ela ikaie seji kukundagha oho.”

⁴⁰ Ukawichea waja wanughi ukawikua walala, ukamzera Petro, “Huwo ndemdimagha kucheresha andwamweri nani hata saa imweri?

⁴¹ Chereshenyi mlombe msengie mtimonyi, ija roho loli yakunde, ela mumbi ghwakaia mnyonge.”

⁴² Nao ukaghenda sena indo ja kawi ukalomba, “Aba ikakaia ndeidimikagha ichi kikombe chiniide, lukundo lwako lubonyeke.”

⁴³ Ukawichea sena ukawikua walala, angu meso ghawo gherekoghe ghalemerwa ni dilo.

⁴⁴ Ukawisigha sena ukaghenda kulomba indo ja kadadu ukighora madedo ghaja gheni.

⁴⁵ Niko ukawichea waja wanughi ukawizera, “Mduagha mkilala na kukuhoresha? Olenyi ngelo yameria kuvika, na Mwana wa Mdamu uafunywa kwa wandu wa kaung'a.

⁴⁶ Wukenyi dighende, olenyi uo unifunyagha waawuyacha.”

Kuwadwa kwake Jesu

⁴⁷ Hata iji orekoghe ukighora, Juda umu wa waja ikumi na wawi ukabusa, ukwanye na izungu ibaa ja wandu widwae chufu na rungu, wafuma kwa wakohani wabaa na waghosi wa wandu.

⁴⁸ Idana uo oremfunyireghe orewinekieghe alama ihi, “Uo mundu nichaamsusugha, nuo moni, mmbwadenyi.”

⁴⁹ Niko Juda ukamchea Jesu shwa wori ukamzera, “Sere ndeikaie kwako Mwalimu.” Nao ukamsusugha.

⁵⁰ Jesu ukamzera, “Mghenyi wapo, bonya ijo kwajichea.” Nao wikacha wikammbwada wikammazira Jesu.

⁵¹ Niko umu wa waja werekwanyeghe na Jesu ukaghorua mkonu ghwake, ukalukua lufu lwake ukamdumbua kudu mzumba wa mkohani m'baa.

⁵² Nao Jesu ukamzera, “Wunja lufu lwako kiwonyi kwaro, angu uo ose ulutumiagha lufu uchatota kwa lufu.

⁵³ Kwani ndemwichi angu nadima kumlomba Aba wutesia, nao uniredie shwa wori majeshi ikumi na awi gha malaika?

⁵⁴ Ela ikakaia huwo Maandiko ghikatishwa wada agho ghighorie angu suti maza iri rikaie?”

⁵⁵ Ngelo ija cheni Jesu ukajizera jija izungu ja wandu, “Welee, mwaanichea na chufu na rungu kuniwada seji neeka kiting'a? Ituku ituku nerekoghe kidombo Hekalunyi ngifundisha, nenyo ndemoreniwadieghe anduangi.

⁵⁶ Ela agha ghakaia eri Maandiko gha walodi ghikatie.” Niko wanughi wose wikamsigha wikakimbia.

Jesu imbiri ya mwandu

⁵⁷ Niko awo weremmbwadieghe Jesu wikamdwa hata nyumbenyi kwa Mkohani M'baa Kayafa, na aho werekwanyikieghe chiaimweri walimu wa Sharia na waghosi.

⁵⁸ Ela Petro orekoghe ukimnugha kwa kula hata wazenyi kwa Mkohani M'baa, ukangia andenyi chiaimweri na walindiri upate kuwona kutua kwake ni wada.

⁵⁹ Nao wakohani wabaa na mwandu ghose wikalola wushahidi ghwa tee aighu ya Jesu, wipate kum'bwagha;

⁶⁰ ela ndewereghupatireghe wushahidi ghungi hata ngera korekoghe na washahidi wengi wa tee. Kutua wikacha wandu wamu wawi

⁶¹ wikighamba, “Mundu uhu oreghorieghe wei, ‘Nadima kuinona Hekalu ya Mlungu sena niiaghe kwa matuku adadu.’”

⁶² Niko aho Mkohani M'baa ukawuka kimusi ukamzera Jesu, “Ndekutumbuliagha ilagho jingi ado? Ni malaghoki agha wandu awa wighishuhudiagha aighu yako?”

⁶³ Ela Jesu ukanyama kima. Mkohani M'baa ukamzera, “Nakughemesha kwa irina ja Mlungu uko moyo, kudighorie ngera oho nuo Kristo Mwana wa Mlungu.”

⁶⁴ Jesu ukamzera, “Oho kwaghamba. Nani namghoria angu kufuma idana mchammbona Mwana wa Mdamu wasea kidombo chia ya mkonu ghwa kiwomi ghwa Uo Uwadie Ndighi, sena ukicha aighu ya mawingu gha mlungunyi.”

⁶⁵ Nao Mkohani M'baa ukarashua nguwo rake ukaghamba, “Wamsholia Mlungu! Dilola washahidi wa indoki na inyo mmbeni mwaghisikira masholio ghake.

⁶⁶ Mmbona wada?” Wikamtumbulia, “Yamfwana kufwa.”

⁶⁷ Niko wikamchuya mada wushunyi na kumkaba, na wamu wikamkaba na chui

⁶⁸ wikighamba, “Oke Kristo dilodere nani wakukaba?”

Petro kumkana Bwana

⁶⁹ Idana Petro orekoghe kidombo cha shighadi wazenyi. Muka umu ukamchea ukamzera, “Na oho wori korekwanyeghe na Jesu Mgalilaya.”

⁷⁰ Ela ukakana imbiri ya wose ukighamba, “Siwuelelwa ni agho kughoragha anduangi.”

⁷¹ Hata iji orekoghe ukifuma mnyangonyi, mwai umu wa kazi ukammbona ukawizera waja werekoghe aho, “Mundu uhu orekwanyeghe na Jesu Mnazareti.”

⁷² Nao Petro ukaana sena kwa kughema, “Simwichi mundu uo anduangi.”

⁷³ Kapindi katini wandu werekoghe aho wikamchea Petro wikamzera, “Kwa loli oho ko mumzawo, hata kiteto chako cheni chiawonyera worinyi.”

⁷⁴ Niko aho Petro ukazoya kukughemesha na kughema, “Simwichi mundu uo!” Nao ahoeni njogholo ikadeda.

⁷⁵ Petro ukakumbuka malagho oreghoreloghe ni Jesu, “Imbiri ya kudeda njogholo, kuchanikana kadadu.” Nao ukafuma shighadi ukalila na ndighi.