MATHAYO 25 - Biblia Ilagho Jiboie Kwa Wandu Wose

Mfwano ghwa wai ikumi

¹ “Niko wuzuri ghwa Mlungu ghuchaafwanana na wai ikumi, werewusireghe taa rawo, wikafuma kwendammara bwana arusi.

² Wai wasanu werekoghe wakelu, na wasanu werekoghe na akili.

³ Angu awo wakelu iji wereridwaeghe taa rawo, ndeweredwaeghe mavuda anduangi;

⁴ ela waja wa akili weredwaeghe mavuda vombonyi kwawo andwamweri na taa rawo.

⁵ Nao iji bwana arusi wamuka, wose wikadungumia, wikalala.

⁶ Kio ghadi wandu wikawusira chwaka rawo na kughamba, ‘Okenyi bwana arusi wacha! Fumenyi mummare!’

⁷ Niko waja wai wose wikawuka na kuboisa taa rawo.

⁸ Waja wakelu wikawizera waja wa akili, ‘Dinekenyi mavuda ghamu, angu taa redu raawuyarima.’

⁹ Ela waja wa akili wikawitumbulia, ‘Ngera ndeghidikatagha diwose, ni nicha mwende mkughuye mmbeni kwa awo wiuzagha.’

¹⁰ Ela iji werefumieghe kwendaghua, uja bwana arusi ukacha, na waja werekoghe tayari wikangianya nao cha karamunyi ya arusi, mnyango ghukarughwa.

¹¹ Konyuma waja wai wamu wikacha wikighamba, ‘Bwana, bwana dirughuye.’

¹² Ela ukawitumbulia, ‘Namghoria loli simwichi inyo anduangi.’

¹³ Kwa huwu chereshenyi, angu ndemjimanyire ituku hata saa anduangi.

Mfwano ghwa wadumiki wadadu

¹⁴ “Angu ichakaia karakara na mundu umu orekundieghe kudamba, ukawiwanga wadumiki wake ukawineka mali rake;

¹⁵ kula umu kunughana na wudumiki ghwake; umu ukamneka pesa riwangwagha talanto isanu, umu ukamneka iwi na mzima ukamneka imweri. Ukafuma ukadamba charo chake.

¹⁶ Nao uja mdumiki orewusireghe talanto isanu ukafuma shwa wori ukashama naro, ukapata talanto zima isanu.

¹⁷ Na uja orewusireghe iwi, ukafuma wokoni ukashama talanto zima iwi.

¹⁸ Ela uja orewusireghe imweri, ukafuma ukakota andoenyi, ukarivisa pesa ra bwana wake.

¹⁹ Nao nyuma ya matuku malazi kuida, bwana wa waja wadumiki ukacha kubonya mtalo nawo.

²⁰ Uja orewusireghe talanto isanu ukacha na talanto zima isanu ukighamba, ‘Bwana, koreninekieghe talanto isanu, ola nashamie ngapata zima talanto isanu.’

²¹ Bwana wake ukamzera, ‘Mdumiki mucha oho, sena wa loli; korekoghe mloli kwa iro riko ndini, nichakuwika aighu ya iro riko mbaa. Ngia kuboilo andwamweri na bwana wako.’

²² Nao ukacha uja orenekeloghe talanto iwi, ukareda talanto zima iwi ukighamba, ‘Ola bwana rija talanto iwi koreninekieghe nashamie ngapata talanto zima iwi.’

²³ Bwana wake ukamzera, ‘Mdumiki mucha oho, sena wa loli; korekoghe mloli kwa iro riko ndini, nichakuwika aighu ya iro riko mbaa. Ngia kuboilo andwamweri na bwana wako.’

²⁴ Ela uja orenekeloghe imweri ukacha ukighamba, ‘Bwana, nerekumanyireghe angu oho koko mundu ukurie, kwadakuwida andu kuserekuwaeghe, kwadakwanya andu kuseredirieghe mbeu.

²⁵ Niko ngaobua ngaghenda na kuivisa talanto yako andoenyi. Ola hei iwade ni icheni yako.’

²⁶ Bwana wake ukamtumbulia, ‘Mdumiki mmbiwi oho, sena mghadi! Kwaniichi angu nadakuwida iro nisereriwaeghe, na kukwanya andu niseredirieghe mbeu.

²⁷ Kumangu korewikieghe pesa rapo bengi eri rive fwaida, nani niendacha nadariwusanya chiaimweri na fwaida yaro.

²⁸ Idana msokenyi iyo talanto, mumneke uo uko na ikumi.

²⁹ Angu uo uko nacho uchanekwa kuchumba, nao uchakaia na vingi; ela uo usewadie, uchasokwa hata icho uko nacho.

³⁰ Na idana uhu mdumiki usene fwaida, mkumbenyi kwa kira chiko shighadi. Aho kuchakaia na kulila na kuja maghegho.’

Kutanywa kwa kutua

³¹ “Ngelo Mwana wa Mdamu uchagha na wubaa ghwake, na weke malaika wose wiko andwamweri nao, uchasea kidombo aighu ya kifumbi chake cha nguma.

³² Na imbiri kwake wichakwanyika wandu wa mbari rose, nao uchawitanya awa na awa seji mlisha utanyagha ng'ondi rifume kwa mburi;

³³ uchawika ng'ondi kwa mkonu ghwake ghwa kiwomi, na mburi kwa mkonu ghwake ghwa kiwaka.

³⁴ Niko mzuri uchawizera waja wiko kwa mkonu ghwake ghwa kiwomi, ‘Choonyi inyo mrasimilwagha ni Aba, mmbuse ifwa ja wuzuri moreboisiroghe kufuma wurumwengu ghwazoya kuumbwa.

³⁵ Angu nerekoghe na njala mkanineka vindo, nereomieghe mkaninyosha machi, nerekoghe mghenyi mkanikaribisha;

³⁶ nerekoghe duu mkanirusha nguwo, nerekoghe mkongo mkacha kunizighana, nerekoghe kifungonyi mkanichea.’

³⁷ Niko wahachi wichamtumbulia, ‘Bwana, ni lii derekuwonieghe kuko na njala dikakuneka vindo, angu kuomie dikakunyosha machi?

³⁸ Ni lii derekuwonieghe kuko mghenyi dikakukaribisha, angu kuko duu dikakurusha nguwo?

³⁹ Ni lii derekuwonieghe mkongo angu kifungonyi dikacha kukuzighana?’

⁴⁰ Aho mzuri uchawitumbulia, ‘Namghoria loli, iji morewibonyereghe awo wanidu watini, modenibonyera ini moni.’

⁴¹ “Niko aho uchawizera waja wiko kwa mkonu ghwake ghwa kiwaka, ‘Fumenyi kwapo inyo mmbwasiro njowe, mwende kwa modo ghwa kala na kala ghoreboisiroghe uo Ibilisi na weke malaika wake;

⁴² angu nerekoghe na njala mkaniima vindo, nereomieghe mkaniima machi.

⁴³ Nerekoghe mghenyi nenyo ndemorenikaribishireghe, nerekoghe duu mkalegha kunirusha nguwo, nerekoghe mkongo na kifungonyi, nenyo ndemorenizighanireghe anduangi.’

⁴⁴ Nawo wichamtumbulia, ‘Ni lii dikuwonie na njala angu na kau, kuko mghenyi angu kuko duu, kuko mkongo angu kifungonyi, dikalegha kukutesia?’

⁴⁵ Nao moni uchawitumbulia, ‘Namghoria loli, iji moreleghieghe kum'bonyera nicha umu wa awa watini, huwo ni ini moni mserenibonyereghe.’

⁴⁶ Awo wichaghenda kwa makabo gha kala na kala, ela wahachi wichaghenda kwa irangi ja kala na kala.”