MATHAYO 23 - Biblia Ilagho Jiboie Kwa Wandu Wose

Jesu kuwionya walimu wa Sharia na Mafarisayo

¹ Niko Jesu ukajizera jija izungu ja wandu na wanughi wake,

² “Walimu wa Sharia na Mafarisayo niwo wabaa wefundisha Sharia ra Musa;

³ kwa huwo agho ghose wimzeragha, ghiwadenyi na kughibonya, ela msakebonya seji wibonyagha; angu awo wadaghora ela ndewibonyagha anduangi.

⁴ Wadafunga misigo ilemere isedukikagha, na kuwidukishira wandu maweghenyi, ela awo weni ndewiiwadagha hata na chala cheni.

⁵ Mabonyo ghawo ghose wadabonya wikikunda kuwonwa ni wandu, angu waghibonya mafindikio ghawo na hemu ra nguwo rawo rikaie mbaa;

⁶ wakunda malalo gha ishima karamunyi, na vifumbi va imbiri sunagoginyi,

⁷ na kurogholwa sokonyi wikiwangwa ni wandu ‘Mwalimu.’

⁸ Ela inyo msakewangwa ‘Mwalimu’ angu Mwalimu onyu ni umweri na inyo mmbose moko wanyinyu.

⁹ Sena msakemmbanga mndungi ‘Aba’ aha ndoenyi, angu Ndeyo onyu ni umweri uko mlungunyi.

¹⁰ Hata msakewangwa ‘Bwana’, angu Bwana onyu ni umweri, nuo Kristo.

¹¹ Uo uko m'baa aghadi konyu uchawuya mdumiki onyu;

¹² na uo ose ukujosagha moni uchaserwa, ela uo ose ukuseragha moni uchajoswa.

Jesu kukemia waji-kuwi

¹³ “Ni bugha konyu inyo walimu wa Sharia na Mafarisayo, waji-kuwi! Angu mwaghurugha mnyango ghwa Wuzuri ghwa mlungunyi; inyo mmbeni ndemngiagha, na awo wikundagha kungia mwawighiria. [

¹⁴ Ni bugha konyu inyo walimu wa Sharia na Mafarisayo, waji-kuwi! Angu mwadaiwia waka wakiwa, sena mkilomba malombi mengi mpate kukaswa. Mchapata kutanywa kubaa.]

¹⁵ “Ni bugha konyu inyo walimu wa Sharia na Mafarisayo, waji-kuwi! Angu mwadamara-mara baharinyi na andu kuomie eri mpate mnughi umweri. Ela iji mwampata, mwam'bonya kukaia mundu oghenda jehanamu mando awi kuchumba inyo mmbeni.

¹⁶ “Ni bugha konyu inyo vilongozi vifue meso! Angu mwadaghamba, ‘Mundu ukaghema kwa Hekalu si ilagho jingi, ela wei ukaghema kwa dhahabu ya Hekalunyi uchawadwa ni ijo ighemi.’

¹⁷ Vitungure vikelie inyo! Kibaa ni chiao? Ija dhahabu angu Hekalu iyo ibonyagha dhahabu kukaia ielie?

¹⁸ Sena mwadaghamba, ‘Mundu ukaghema kwa madhabahu, uchawadwa ni ijo ighemi.’

¹⁹ Wandu mfue meso inyo! Kibaa ni chiao? Ni jija ifunyo angu madhabahu agho ghibonyagha ijo ifunyo kukaia jielie?

²⁰ Kwa huwu, uo ughemagha kwa madhabahu wadaghema kwa iyo, na kwa icho chose chawikwa aighu yake.

²¹ Na uo ughemagha kwa Hekalu wadaghema kwa iyo, na uo ose ukaiagha andenyi yaro.

²² Uo ughemagha kwa mlungunyi wadaghema kwa kifumbi cha nguma cha Mlungu, na kwa uo uchiseriagha wori.

²³ “Ni bugha konyu inyo walimu wa Sharia na Mafarisayo, waji-kuwi! Angu mwafunya ifungu ja ikumi hata kwa mbogha ra malemba ghinukie nicha, na bizari, ela mwasigha agho malagho ghiko gha suti gha Sharia na hachi, na wughoma, na irumirio. Kumangu agha mwaghibonyere, chiaimweri na ghaja mazima wori.

²⁴ Vilongozi mfue meso inyo! Muinjagha rwai na kumila ngamila!

²⁵ “Ni bugha konyu walimu wa Sharia na Mafarisayo, waji-kuwi! Angu mwadaoghosha vikombe na sahani cha shighadi, ela nandenyi vachua ivo vindo muvipatire kwa kusoka na kukenga.

²⁶ Mfarisayo kitungure oho! Imbiri oghosha kikombe nandenyi, niko chichaaela cha shighadinyi wori.

²⁷ “Ni bugha inyo walimu wa Sharia na Mafarisayo, waji-kuwi! Angu mwafwanana na makaburi ghikabilo chokaa, nagho ghawoneka ghighokie cha shighadi, ela kondenyi ghachua maindi gha wafu na kula wuchafu.

²⁸ Ni huwo koni na inyo, cha shighadi mwawoneka kwa wandu kukaia wecha, ela kondenyi, mo waji-kuwi na kuchulwa ni mawiwi.”

Jesu kuwilodera gha ikabo jawo

²⁹ “Ni bugha konyu inyo walimu wa Sharia na Mafarisayo, waji-kuwi! Angu mwaghiagha makaburi gha walodi na kughipamba makaburi gha wandu wa hachi;

³⁰ mkighamba, ‘Ngera isi dedeeka ngelo ra weke wawa wedu, kumangu ndederewadanagha nawo kuwibwagha walodi anduangi!’

³¹ Huwo mwakushuhudia inyo mmbeni kukaia wana wa awo wandu wiwibwaghie walodi!

³² Idana imerienyi iyo kazi isighilo ni weke wawayo!

³³ Inyo choka, kivalwa cha choka ra wusungu! Mchakimbia wada msepato ni uko kutanywa kwa jehanamu?

³⁴ Kwa huwu nichamdumia walodi na wandu wa hikima na walimu, ela wamu wawo mchawibwagha na kuwisulubisha, na wazima mchawikaba na viboko andenyi ya masunagogi ghenyu na kuwitirira muzi kwa muzi.

³⁵ Mpate kuchelwa ni ikabo kwa wundu ghwa bagha ya wandu wa hachi wose erediriloghe ndoenyi. Kufuma bagha ya Abeli mhachi, hata bagha ya Zakaria mwana wa Barakia, uo morembwaghieghe andenyi ya Hekalu madhabahunyi gha wueli.

³⁶ Namghoria loli, kivalwa ichi chichakabwa kwa wundu ghwa maza iro rose.

Lukundo lwa Jesu kwa Jerusalemu

³⁷ “Ee Jerusalemu, Jerusalemu, kubwaghagha walodi na kuwilasa na magho awo widumwagha kwako. Ni kalinga neretimieghe kuwikwanya wana wako, seji nguku ivikwanyagha vana vake aisi ya mawawa ghake, ela kukalegha.

³⁸ Zighana idana kwasighilwa nyumba yako duu.

³⁹ Nani nakuzera, ndekuchaaniwona sena hata ituku jija kuchaaghora, ‘Warasimilwa uo uchagha kwa irina ja Bwana.’”