MATHAYO 21 - Biblia Ilagho Jiboie Kwa Wandu Wose

Jesu kungia Jerusalemu ukizumilwa

¹ Hata iji Jesu na wanughi wake werekoghe kaavui na Jerusalemu, wikavika Bethfage kwa Mghondi ghwa Mizeituni; niko Jesu ukawiduma wawi wa wanughi wake,

² ukawizera, “Ghendenyi ghuja muzi ghuko imbiri konyu, nao ahoeni mchawona punda ufungilo na mwanwake. Wifunguonyi muniredie.

³ Mndungi ukamkotia ilagho jingi mumzere, ‘Bwana wawikunda,’ nao uchawilekeria shwa wori.”

⁴ Ilagho iji jerebonyekieghe, eri ghaja ghereghoreloghe ni mlodi ghikatie:

⁵ “Ghughorienyi muzi ghwa Sioni, hoyu mzuri wako wakuchea, wa mboa, wajoka aighu ya punda na punda mtini, mwana wa punda.”

⁶ Nao waja wanughi wikaghenda na kubonya sa iji koni Jesu orewilaghirieghe,

⁷ wikamreda punda na mwana wake, wikaala nguwo rawo aighu yawo, na Jesu ukasea kidombo aighu kwake.

⁸ Na wengi werekoghe izungunyi wikaala nguwo rawo chienyi; na wazima wikadema masawi gha midi wikaghiala chienyi.

⁹ Wandu werekoghe kiimbiri chiaimweri na waja werenughieghe na nyuma wikaghora kwa lwaka lubaa: “Hosana kwa Mwana wa Daudi, Warasimiwa uo uchagha kwa irina ja Bwana; Hosana aighu na ndighi.”

¹⁰ Hata iji orengirieghe Jerusalemu, wandu wa muzi wose wikanyavurika wikighamba, “Nani uhu?”

¹¹ Wandu wiko izungunyi wikatumbulia, “Uhu ni uja mlodi Jesu ufumie Nazareti muzi ghwa Galilaya.”

Jesu kughenda Hekalunyi

¹² Nao Jesu ukangia Hekalunyi, ukawiwinga cha shighadi wandu werekoghe wikiuza na kughua vilambo andenyi ya Hekalu; ukaribingilisha meza ra awo werekoghe wikivunja pesa, na vifumbi va awo werekoghe wikiuza maringo.

¹³ Ukawizera, “Yaandikilo, ‘Nyumba yapo ichawangwa nyumba ya malombi.’ Ela inyo mwaibonya mbanga ya viting'a.”

¹⁴ Niko vitungure na wakelemeri wikamchea Hekalunyi, nao ukawiboisa.

¹⁵ Hata iji wakohani wabaa na walimu wa Sharia waghiwona agho mashiniko oreghibonyereghe Jesu, na wanake werekoghe Hekalunyi wikighora kwa chwaka “Hosana kwa Mwana wa Daudi,” wikajokwa ni machu,

¹⁶ wikamzera Jesu “Kwasikira seji awa wawuyaghora?” Jesu ukawizera, “Hee; wele jingi ndemshomie seji iandikilo: ‘Kwawibonya wanake watini na awo wiongagha, wifunye makaso ghikatie.’”

¹⁷ Nao ukawisigha, ukafuma shighadi ya muzi ukaghenda Bethania ukalala aho.

Jesu kuwasira mtini njowe

¹⁸ Nao nakesho iji Jesu orekoghe ukiwuya mzinyi, ukazughwa ni njala.

¹⁹ Hata iji waghuwona mtini mbai na mbai ya chia ukaghughendia, nao nderepatireghe itunda jingi ela malemba maduu. Ukaghuzera ghuja mudi, “Jingi kuseve itunda sena.” Nao ghuja mtini ghukanyaya shwa wori.

²⁰ Wanughi wiendawona huwo wikashinika wikighamba, “Kwaki ughu mtini ghwanyaya shwa-shwa huwu?”

²¹ Jesu ukawizera, “Namghoria loli, mkakaia na irumirio, msebonyagha kiture chingi, mwadima kubonya si seji yabonyeka kwa ughu mtini tu, ela hata mkaghuzera mghondi ughu, ‘Kuka kukukumbe baharinyi’ jichabonyeka.

²² Na ijo jose mlombagha, ngera mwakaia na irumirio mchajipata.”

Ikoto aighu ya nguma ya Jesu

²³ Nao iji Jesu wangia Hekalunyi, wakohani wabaa na waghosi wa wandu wikamchea ukifundisha wikamkotia, “Kwawuyabonya maza iri kwa nguma iao, nao nani ukunekie nguma ihi?”

²⁴ Jesu ukawitumbulia, “Na ini nichamkotia ikoto, mkajitumbulia nichamghoria ni kwa nguma iao niribonyagha maza iri.

²⁵ Welee, nguma ya Johane ebaputiza erefumieghe hao? Edefuma mlungunyi angu kwa wadamu?” Nao wikatumbuliana weni na weni, “Dikaghamba, ‘Kufuma mlungunyi’, uchadizera ‘Kwaki sena mseremrumirieghe?’

²⁶ Sena dikaghamba, ‘Kufuma kwa wadamu’, diaobua wandu angu weremrumirieghe Johane kukaia mlodi.”

²⁷ Nao wikamtumbulia Jesu “Ndedimanyire.” Nao moni ukawizera, “Na ini simghoriagha ngera nabonyagha maza iri kwa nguma yani.”

Mfwano ghwa wana wawi

²⁸ “Mmbona wada: Mndumu orekoghe na wana wawi, ukamghendia uja wa imbiri ukamzera, ‘Mwanwapo, idime ghenda mbuwenyi ya mizabibu.’

²⁹ Nao ukatumbulia, ‘Sikude!’ Ela konyuma ukahea ukaghenda.

³⁰ Nao ukamghendia uja wa kawi ukamzera ghaja malagho gheni. Nao ukatumbulia, ‘Niaghenda mghosi.’ Ela ndereghendieghe anduangi.

³¹ Welee, kwa waja wana wawi ni uao ubonyere lukundo lwa ndee?” Wikatumbulia, “Ni uja wa imbiri.” Jesu ukawizera, “Namghoria loli, wawadi wushuru na malaya wamkiria kungia kwa wuzuri ghwa Mlungu.

³² Angu Johane orechieghe ukimmbonyera chia ya hachi enugha, nenyo ndemoremrumirieghe anduangi, ela wawadi wushuru na malaya weremrumirieghe. Hata mduawona huwo saki, ndemoreherieghe na kumrumiria anduangi.”

Mfwano ghwa mbuwa ya mizabibu na walimi wepangisha

³³ Nao Jesu ukawizera, “Sikirenyi mfwano ghumu. Mundu wa nyumba umu orelimieghe mbuwa ya mizabibu, ukaibonyera wurigha, ukakota kina chekamia zabibu, ukaagha mnara na kuipangisha walimi; nao ukadamba cha isanga izima.

³⁴ Hata iji kimu cha makuwido chavika, ukawiduma wadumiki wake kwa walimi upate ifungu jake ja makuwido.

³⁵ Nao walimi wikawada wadumiki wake, umu wikamkaba, na umu wikam'bwagha, na mzima wikamlasa na magho.

³⁶ Ukaduma wadumiki wamu sena wengi kuchumba waja wa imbiri. Nawo weni wikawibonyera wokoni.

³⁷ Konyuma ukamduma mwana wake kwawo ukighamba, ‘Wicham'bonyera ishima mwana wapo.’

³⁸ Ela iji awo walimi wammbona uja mwana, wikaghamba weni na weni, ‘Uhu ni mundu wa ifwa. Nndokonyi dim'bwaghe ifwa jipate kuwuya jedu.’

³⁹ Nao wikammbwada wikamkumba shidhadi ya mbuwa, wikam'bwagha.”

⁴⁰ Jesu ukawikotia, “Welee, iji bwana wa mbuwa ya mizabibu wacha, uchawibonya wada waja walimi?”

⁴¹ Wikamtumbulia, “Uchawitirira na kuwibwagha; na mbuwa ya mizabibu uchaipangisha wazima, awo wichaadima kumpatira makuwido gha zabibu kwa kimu charo.”

⁴² Aho Jesu ukawizera, “Welee, jingi ndemshomie sa iji iandikilo: ‘Igho jerelegheloghe ni waaghi, nijo jeni jiwurie ibaa ja mbembenyi. Na iji ni ibonyo ja Bwana moni, najo jakaia ja mashiniko mesonyi kodu.’

⁴³ “Niko huwu namzera, Wuzuri ghwa Mlungu ghuchainjwa konyu ghuneko mbari zima ivagha matunda gharo.” [

⁴⁴ Uo ose uchaaghwa aighu ya igho ijo uchachika vipande vipande, na uo jimghuyagha jichamsaghisa.]

⁴⁵ Nao iji wakohani wabaa na Mafarisayo wasikira mfwano ugho, wikamanya angu ghwaaghorwa kwa wundu ghwawo.

⁴⁶ Nawo iji werekundieghe kummbwada, wikawiobua wandu angu weremrumirieghe Jesu kukaia mlodi.