MATHAYO 17 - Biblia Ilagho Jiboie Kwa Wandu Wose

Jesu kughaluka fwana

¹ Nao nyuma ya matuku arandadu, Jesu ukawidwa Petro, Jakobo, na Johane mruna; ukawidwa weni wiekeri aighu ya Mghondi m'baa.

² Nawo wikimzighana, ukaghaluka fwana yake; wushu ghwake ghukang'ala-ng'ala sa iruwa, na marwao ghake ghikawuya gha chokwa sa mwengere.

³ Waja wanughi wikawiwona Musa na Elija wikidedanya na Jesu.

⁴ Niko Petro ukamzera Jesu, “Bwana, yaboie saki angu isi diko aha? Kukakunda, nichaagha viwanda vidadu; chimu chikaie chako, chimu cha Musa, na chimu cha Elija.”

⁵ Nao iji orekoghe ukighora agho, iwingu ja chokwa jikawifinikira, na lwaka lukasikirika andenyi ya ijo iwingu, “Uhu ni Mwana wapo mkundwa, uniboiagha loli-loli, msikirenyi.”

⁶ Nao iji wanughi wasikira agho, wikaghwa kiwushu-wushu wikiobua na ndighi.

⁷ Jesu ukawighendia ukawiadada ukighamba, “Wukenyi, msakeobua.”

⁸ Hata iji wawuka na kuzighana, ndewerewonieghe mndungi ela Jesu uekeri.

⁹ Nao iji werekoghe wikisea kufuma mghondinyi, Jesu ukawilaghira, “Msakemghoria mndungi maza ra mawono agha hata Mwana wa Mdamu wameria kuruka kufuma kwa wafu.”

¹⁰ Wanughi wake wikamkotia, “Keni kwaki walimu wa Sharia wighambagha wei suti Elija uche kande?”

¹¹ Jesu ukawitumbulia, “Loli Elija uacha, nao uchawika maza rose nicha.

¹² Ela namghoria angu Elija wamerie kucha, na wandu ndeweremmanyireghe anduangi, wikam'bonya sa iji koni werekundieghe. Ni huwo koni wichamtirira Mwana wa Mdamu.”

¹³ Niko aho wanughi wikatambua angu orekoghe ukiwighoria malagho gha Johane M'baputizi.

Jesu kum'boisa mwana uko na pepo

¹⁴ Hata iji wajiwuria sena jija izungu ja wandu, mndumu ukamghendia Jesu ukamdungia ngokoro,

¹⁵ ukaghamba, “Bwana, mmbonie wughoma mwana wapo, angu wadadumbuka na kuja wasi na ndighi; ngelo nyingi wadaghuya modonyi angu machinyi.

¹⁶ Ngamreda kwa wanughi wako, ela ndeweredimieghe kum'boisa.”

¹⁷ Jesu ukatumbulia, “Inyo kivalwa chisewadie irumirio, chilagharie; nichakaianya nenyo hata lii? Nicharumaghianya nenyo hata lii? Mredenyi uo mwana kwapo.”

¹⁸ Nao Jesu ukaikemia ija pepo, nayo ikamfuma na uja mwana ukaboa saa ija cheni.

¹⁹ Niko wanughi wikamghendia Jesu kivisonyi wikamkotia, “Kwaki isi diseredimieghe kuiwinga ija pepo?”

²⁰ Jesu ukawitumbulia, “Ni kwa wundu ghwa wutini ghwa irumirio jenyu. Kwa loli ngera modeeka na irumirio jing'ane sa ndembe ya haradali, kumangu mwaghuzera mghondi ughu, ‘Injika aha kughende aja,’ nagho ghuchamsikira. Hata kumangu ndekuwadie kilambo chingi chisedimikagha konyu anduangi. [

²¹ Ela mbari ihi yadafunywa ni malombi na kufunga tumu.”]

Jesu kughora sena aighu ya kifwa chake

²² Hata iji werekwaneghe chiaimweri aja Galilaya, Jesu ukawizera, “Mwana wa Mdamu uchafunywa kwa wandu.

²³ Wicham'bwagha, ela ituku ja kadadu ucharuka.” Wanughi wake wikangilwa ni wasi loli-loli.

Kulipa mchango ghwa Hekalu

²⁴ Hata iji wavika Kafarnaumu, waja wandu wilombagha mchango ghwa Hekalu wikamkotia Petro, “Welee, Mwalimu onyu walipagha mchango ghwa Hekalu?”

²⁵ Petro ukawitumbulia, “Ee walipagha.” Nao iji wangia nyumbenyi, Jesu ukazoya kumkotia, “Wele Simoni, keni wazuri wa ndoenyi wadalomba wushuru angu kodi kwa wana wawo angu kwa wandu wazima?”

²⁶ Nao iji waghora, “Kwa wandu wazima,” Jesu ukamzera, “Ikakaia ni huwo, basi wana weko huru.

²⁷ Ela disakewikuwisha; ghenda ndiwenyi, kukumbe kiloo; iji kwawada samaki ya imbiri, na kuitambarua momu ghwake, kuchapata pesa shekeli imweri; nao kuwineke kwa wundu ghwapo na ghwako.”