MATHAYO 15 - Biblia Ilagho Jiboie Kwa Wandu Wose

Mafundisho gha weke wawa

¹ Nao Mafarisayo na walimu wa Sharia wikacha kufuma Jerusalemu, wikamghendia Jesu wikamkotia,

² “Kwaki wanughi wako wisenughagha mizango diipatire kwa weke wawa? Ndewioghoshagha mikonu yawo seji ifwanagha ngelo eja vindo.”

³ Jesu ukawitumbulia, “Kwaki inyo mmbwadagha mizango enyu cheni msenughagha Sharia ya Mlungu?

⁴ Angu Mlungu waghorie, ‘Kuwineke ishima ndeyo na mayo,’ na ‘Uo umdediagha kiwiwi ndee angu mae yafwana loli ufo.’

⁵ Ela inyo mwadafundisha wei, mundu ukakaia na kilambo chingi chetesia ndee angu mae, nao ukole waghora, ‘Ichi kilambo chaafunywa kwa Mlungu;’

⁶ nao huwo kedi ndena haja eneka ndee ishima! Na kwa chia iyo mwaghumenya momu ghwa Mlungu mpate kuwada mizango enyu cheni.

⁷ Waji-kuwi inyo, Isaya nderelodieghe loli aighu enyu iji waghamba,

⁸ ‘Wandu awa wanibonyere ishima kwa momu ghoni, waghamba Mlungu; ela ngolo rawo reko kula nani.

⁹ Kunitasa kwawo ni kwa duu angu wadafundisha memu yawo cheni, seji ni memu ya Mlungu.’”

Vilambo vimghalusagha mundu kulua

¹⁰ Nao Jesu ukajiwanga jija izungu ja wandu ukawizera, “Sikirienyi mtambukilo,

¹¹ icho chimngiagha mundu momunyi kwake, sicho chingi chimlushagha anduangi; ela icho chimfumagha momunyi kwake, nicho cheni chimlushagha mundu.”

¹² Nao ahoeni wanughi wake wikamghendia wikamzera, “Keni kwamanya angu Mafarisayo wazamilwa wiendasikira agho malagho kwaghora?”

¹³ Jesu ukawitumbulia, “Kula muwalwa ghusewalo ni Aba uko mlungunyi ghuchakulwa.

¹⁴ Wisighenyi noko! Awo ni vilongozi vifue meso. Kitungure ukamghenja kitungure mmbao, wose wawi wichachunukia kinenyi.”

¹⁵ Petro ukamzera, “Ditambushire ugho mfwano.”

¹⁶ Jesu ukaghamba, “Nenyo wori mwaduagha msetambukilwagha?

¹⁷ Ndemtambuagha angu icho chose chingiagha momunyi chadangia kifunyi na konyuma chafuma noko?

¹⁸ Ela agho ghifumagha momunyi ghadafuma ngolonyi, nagho nigho ghimlushagha mundu.

¹⁹ Angu ngolonyi ghadafuma maririkanyo ghizamie ghiredagha kubwagha, wusharati, wulaki, wutoi, kuzighiria kwa tee, na madukano.

²⁰ Agho nigho ghimlushagha mundu. Ela kuja vindo na vala viseoghoshero ndekulushagha mndungi anduangi.”

Irumirio ja muka umu

²¹ Nao Jesu ukafuma aho ukaghenda isanga ja Tiro na Sidoni.

²² Ukacha muka umu Mkanaani wa isanga ijo, ukamzera kwa lwaka lubaa, “Ee Bwana, Mwana wa Daudi, kunifue wughoma; munjighe wapo wajishwa wasi nandighi ni pepo.”

²³ Ela Jesu nderemtumbulieghe ilagho jingi. Wanughi wake wikacha wikamzera, “Mzere ughende, waawuyadinugha ukididoghodera.”

²⁴ Jesu ukamtumbulia, “Ini nededumwa tu kwa wandu wa Israeli wilagharie sa ng'ondi.”

²⁵ Niko uja muka ukacha ukamdungia ngokoro ukighamba, “Bwana, kunitesie.”

²⁶ Jesu ukamtumbulia, “Si nicha kuwusa vindo va wana na kuvikumbia koshi.”

²⁷ Uja muka ukaghamba, “Ni loli Bwana, ela hata koshi rajagha misusure ipotokagha kufuma mezenyi kwa weke Bwana wawo.”

²⁸ Ahoeni Jesu ukamzera, “Ee muka, irumirio jako ni ibaa, ndeikaie kwako sa iji koni kwakunda.” Uja mnjighe wake ukaboa saa ija cheni.

Jesu kuboisa wandu wengi

²⁹ Niko Jesu ukafuma aho ukaghenda ukiidia mbai-mbai ya ndiwa ya Galilaya ukajoka mghondinyi ukasea kidombo.

³⁰ Izungu ibaa ja wandu wikamchea wikimredia wakelemeri, vitungure, watighini, vituri na wazima wengi werekoghe wakongo wikawiwika maghunyi kwa Jesu, nao ukawiboisa.

³¹ Wandu wose wikashinika iji wammbona uja kituri ukideda, watighini wikighenda, na wakelemeri waboiswa; wikamkasa Mlungu wa Israeli.

Jesu kulisha wandu elfu inya

³² Nao Jesu ukawiwanga wanughi wake ukawizera, “Nawadwa ni wughoma ghwa wandu awa, angu wakaianya nani matuku adadu wisewadie vindo. Nani ngawilekeria wighale njala, wadima kudumbukia chienyi.”

³³ Wanughi wake wikamzera, “Aha ni kireti, dipata hao vindo vewikata wandu wengi huwu?”

³⁴ Jesu ukawikotia, “Moko na mikate ilinga?” Wikamtumbulia, “Mfungade na dusamaki dutinieri.”

³⁵ Jesu ukafunya momu jija izungu jisee kidombo andoenyi.

³⁶ Ukaiwada ija mikate mfungade na duja dusamaki, ukamfunyira Mlungu chawucha, ukaichikanya ukaineka wanughi, nao wikawiwaghia wandu.

³⁷ Wikaja wose wikaghuda. Wikatumbanya masighariko wikachura vikapu vibaa mfungade.

³⁸ Na awo werejieghe werekoghe wandu wa womi elfu inya kuseko kutala waka na wana.

³⁹ Nao Jesu ukalaghana na wandu, ukajoka ishuonyi ukaghenda isanga ja Magadani.