MATHAYO 14 - Biblia Ilagho Jiboie Kwa Wandu Wose

Kifwa cha Johane M'baputizi

¹ Ngelo iyo mzuri Herode ukasikira malagho gha Jesu.

² Ukawizera wadumiki wake, “Uo ni Johane M'baputizi waruka kufuma kwa wafu; kwa wundu ughu ndighi iri rabonya kazi andenyi kwake.”

³ Angu Herode nuo oremmbwadieghe Johane, ukamfunga, na kumngira kifungonyi kwa wundu ghwa Herodia nao ni mka-mruna Filipo.

⁴ Angu Johane oremzerieghe Herode, “Kwadarighidwa oho kukaia na uo muka.”

⁵ Herode ukakunda kum'bwagha Johane, ela ukawiobua wandu angu weremrumirieghe Johane kukaia mlodi.

⁶ Nao iji ituku ja kuvalwa kwake Herode javika, mwai wa Herodia ukavina imbiri ya wose, ukamrira Herode. Nao ukam'bonyera ilaghiro ja ighemi,

⁷ kumneka icho chose uchaalomba.

⁸ Nao moni ukifundishwa ni mae ukaghamba, “Nineke idakoni aha sahaninyi chongo cha Johane M'baputizi.”

⁹ Nao mzuri ukawawa ni ngolo, ela kwa wundu ghwa ijo ighemi jake, na kwa wundu ghwa waja werekoghe kidombo mezenyi, ukafunya momu uneko.

¹⁰ Niko Herode ukaduma mundu, Johane udumbulo chongo aho kifungonyi.

¹¹ Nao chija chongo chikaredwa na sahani na kunekwa uja mwai, na mwai ukamneka mae.

¹² Wanughi wa Johane wikacha wikaghuwusa mumbi ghwake wikaghurika. Nawo wikaghenda wikamghoria Jesu.

Jesu kuwineka vindo wandu elfu isanu na kuchumba

¹³ Nao iji Jesu wasikira malagho gha Johane, ukafuma aho kwa ishua ukaghenda andu kusewadie wandu. Ela wandu wikamanya wikamnugha kwa maghu kufuma mizinyi.

¹⁴ Hata umeria kuvika pwani, ukawona izungu ibaa ja wandu ukawifuya wughoma, ukawiboisa wakongo wawo.

¹⁵ Luma lwa kenyi luendavika, wanughi wake wikamghendia wikamzera, “Andu aha ni kireti na ndoe yaswa. Idana laghana na wandu wighende wikughuye vindo mizinyi.”

¹⁶ Jesu ukawizera, “Ndeiko haja ya awo kughenda; winekenyi vindo inyo mmbeni.”

¹⁷ Ela awo wikaghamba, “Isi deeka na mikate misanu tu na samaki iwi.”

¹⁸ Jesu ukawizera, “Niredienyi aha.”

¹⁹ Ukafunya momu wandu wisee kidombo anyasinyi; ukaiwusa ija mikate na samaki iwi; ukazighana aighu mlungunyi ukairasimia na kuichukanya, ukawineka wanughi wake, nawo wikaineka ijo izungu.

²⁰ Wikaja wose wikaghuda. Wikatumbanya masighariko gha mikate, wikachura vikapu ikumi na viwi.

²¹ Awo werejieghe werekoghe wandu wa womi elfu isanu kuseko kutala waka na wana.

Jesu kughenda aighu ya machi

²² Ahoeni Jesu ukawilaghira wanughi wake wingie ishuonyi wikirieghe, ingelo Jesu wawuyalaghana na wandu.

²³ Nyuma ya kulaghana nawo, ukajoka mghondinyi uekeri upate kulomba Mlungu. Hata iji luma lwa kenyi lwavika, orekoghe uekeri aho;

²⁴ ngelo iyo jija ishua jerekoghe javika ghadi na ghadi ya ndiwa, jikikumbwa-kumbwa ni mivo-mivo ya machi, angu jerekoghe jikitangalwa ni mbeo.

²⁵ Nao kaavui na ndoe kuelenyi, Jesu ukawichea ukighenda na maghu aighu ya machi.

²⁶ Iji wanughi wake wammbona ukighenda na maghu aighu ya machi, wikaobua wikighamba, “Ni kisuka!” wikakema kwa wowa.

²⁷ Ahoeni Jesu ukadedanya nawo ukighamba, “Kaienyi na ngolo ni ini moni msakeobua.”

²⁸ Petro ukamzera, “Bwana, ngera ni oho kumoni, nizere niche kwako aighu ya machi.”

²⁹ Jesu ukamzera, “Choo!” Nao Petro ukafuma ishuonyi, ukazoya kughenda kwa Jesu aighu ya machi.

³⁰ Ela iji wawona kuja kuweta kwa mbeo mbaa, ukaobua ukazoya kuvululia cha machinyi. Nao ukakema ukighamba, “Nikire Bwana!”

³¹ Nao shwa wori Jesu ukaghughorua mkonu ghwake ukammbwada ukighamba, “Mundu wa irumirio itini oho, kwaki kwabonya kiture?”

³² Nao iji wangia ishuonyi, kiremba chikasia.

³³ Na wose werekoghe ishuonyi wikamtasa wikighamba, “Loli oho ko Mwana wa Mlungu.”

Jesu kuboisa wakongo aja Genesareti

³⁴ Hata iji wameria kuiruwuka ndiwa, wikavika Genesareti.

³⁵ Nao iji wandu wa aja wammanya, wikaeresha malagho andu kose. Niko wikamredia Jesu wakongo wose;

³⁶ wikamlomba wimuadade hata kidambi cha nguwo yake, na wose weremuadadireghe wikaboa.