MARKO 5 - Biblia Ilagho Jiboie Kwa Wandu Wose

Jesu kum'boisa mundu uko na pepo ra makakala

¹ Nao wikabusa chija kimonu cha ndiwa, isanga ja Wagerasi.

² Hata iji Jesu wameria kufuma ishuonyi, ahoeni ukakwana na mndumu wafuma makaburinyi, uko na pepo ya makakala.

³ Wulalo ghwake ghorekoghe makaburinyi, nao ndekorekoghe na mndungi udimagha kumfunga hata na mnyororo ghoni anduangi.

⁴ Kalazi koni orefungiloghe na pingu na minyororo, iyo minyororo ukaidumbua na iro pingu ukairibara putu, hata mndungi nderewadieghe ndighi remmazira anduangi.

⁵ Na matuku ghose, kio na dime, orekoghe makaburinyi na chughongonyi ukikema mchungu na kukudema-dema moni na shangado.

⁶ Iji wammbona Jesu kula koni, ukamghendia na iseghe, ukamtasa;

⁷ ukakema na lwaka lubaa ukighamba, “Nawadieki kwako Jesu Mwana wa Mlungu Uko-Aighu-Nandighi? Nakuvoya kwa irina ja Mlungu, kusakenitirira!”

⁸ (Oreghorieghe huwo angu Jesu oremzerieghe, “Fuma kwa uhu mundu, oho pepo ya makakala.”)

⁹ Nao Jesu ukamkotia, “Irina jako nani?” Ukatumbulia, “Irina japo ni ‘Ijeshi’, angu deko wengi.”

¹⁰ Ukamvoya Jesu nandighi usakeriwinga pepo noko shighadi ya isanga jija.

¹¹ Ajaeni lughongonyi korekoghe na nguwe nyingi rikija.

¹² Rija pepo rikamvoya Jesu, “Kudidume kwa nguwe dipate kuringia.”

¹³ Nao ukarirumiria. Na pepo ra makakala rikafuma na kuringia nguwe; naro rose, sa elfu iwi huwu, rikashorodoka nokoisi, rikangia ndiwenyi na rose rikafwa.

¹⁴ Walisha wikakimbia, na kueresha malagho ghaja mizinyi na mbuwenyi. Wandu wikacha kuwona iro maza rerebonyekieghe.

¹⁵ Wikamghendia Jesu, wikammbona uja mundu orekoghe na ijeshi ja pepo uko kidombo, urwae nguwo, sena uko na akili rake nicha, wikaobua.

¹⁶ Awo werewonieghe wikawija wandu malagho gha iro rerempatireghe uja mundu orekoghe na pepo, na malagho gha nguwe wori.

¹⁷ Niko wikazoya kumvoya Jesu ufume isanga jawo.

¹⁸ Nao iji Jesu orekoghe ukingia ishuonyi, uja mundu orekoghe na pepo ukamlomba wighendanye.

¹⁹ Ela Jesu ukamleghia ukimzera, “Ghenda nyumbenyi kwa wandu wako, kuwighorie malagho gha iro maza mbaa Bwana wakubonyera, na seji orekufuyeghe wughoma.”

²⁰ Na uja mundu ukaghenda, ukazoya kueresha isangenyi jose ja Dekapoli agho malagho mabaa Jesu orem'bonyereghe, na wandu wose wikashinika.

Mnjighe wa Jairo na muka umu kuboiswa

²¹ Nao iji Jesu waruwuka kimonu sena kwa ishua, izungu ibaa jikamkwanyikia, nao moni ukakaia mbai na mbai ya ndiwa.

²² Na m'baa umu wa sunagogi uwangwagha Jairo ukamchea, hata iji wammbona Jesu, ukaghwa maghunyi kwake,

²³ ukimvoya nandighi ukighamba, “Mnjighe wapo oko kaavui na kufwa. Nakulomba kuche, kummbikirie mikonu yako, uboo ukaie moyo.”

²⁴ Niko Jesu ukaghendanya nao, na izungu ibaa jikamnugha, jikimtindiria.

²⁵ Korekoghe na muka umu orekoghe ukija wasi kwa kufumwa ni bagha miaka ikumi na iwi,

²⁶ hata ngera orekoghe ukirighitwa ni waghanga wengi, na kufunya mali rake rose, wukongo ghwake ndeghoreboieghe anduangi, ela ghukachurikia.

²⁷ Uendasikira wuvoro ghwa Jesu, ukacha nyuma yake andenyi izungunyi, ukamuadada nguwo yake.

²⁸ Angu oreghambieghe, “Ngamuadada hata nguwo cheni, nichaboa.”

²⁹ Nao ahoeni ndoria ya bagha yake ikaoma, ukasikira mumbinyi kwake angu waboiswa wukongo ghwake.

³⁰ Na Jesu, ukimanya andenyi kwake angu ndighi ramfuma, ukajighalukia jija izungu, ukaghamba, “Welee, nani waniadada nguwo rapo?”

³¹ Wanughi wake wikamzera, “Welee, kwawona izungu seji jakutindiria, sena kuakotia, ‘Nani waniadada nguwo rapo?’”

³² Ela Jesu ukachuria kuzighana chia rose, ummbone uo orebonyereghe ilagho ijo.

³³ Niko uja muka ukimanya seji orebonyeroghe, ukacha, ukaghwa imbiri kwake ukiobua na kusughusika, ukamghoria loli rose.

³⁴ Jesu ukamzera, “Mwai, irumirio jako jakuboisa. Ghenda na sere, kuboo putu wukongo ghwako.”

³⁵ Hata iji orekoghe ukideda, wikacha wandu wafuma kwa Jairo, uja m'baa wa sunagogi, wikighamba, “Kusakesindamjisha Mwalimu wasi. Mnjighe wako wafwa.”

³⁶ Ela Jesu, ukighimanya ghaja gherekoghe ghikighorwa, ukamzera uja m'baa wa sunagogi, “Kusakeobua, rumiria tu.”

³⁷ Nao ukalegha mndungi usakemnugha ela Petro, Jakobo, na Johane, mruna Jakobo.

³⁸ Hata iji wavika nyumbenyi kwa uja m'baa wa sunagogi, Jesu ukawona wandu wengi wikibonya nganyi, wikikema na kulila.

³⁹ Ukangia andenyi ukawizera, “Welee, kwaki m'bonyagha nganyi na kulila? Mwana ndefue anduangi, ela waalala.”

⁴⁰ Nawo wikamseka loli-loli. Ela uo ukawifunya wose shighadi, ukamdwa ndee na mae mwana, andwamweri na waja wanughi orechanyeghe nawo, ukangia andu mwana orekoghe wararishwa.

⁴¹ Nao ukammbwada mkonu, ukamzera, “Talitha Kum” kutambua kwaro, “Mnjighe, nakuzera wuka.”

⁴² Ahoeni, uja mnjighe ukawuka kimusi, ukazoya kughenda. (Nao orekoghe ni mwana wa miaka ikumi na iwi.) Wandu wikashinika na ndighi.

⁴³ Jesu ukawilaghira nandighi mndungi usakemanya ilagho ijo; ukawizera wimneke mnjighe vindo.