MARKO 4 - Biblia Ilagho Jiboie Kwa Wandu Wose

Mfwano ghwa muwi mbeu

¹ Nao Jesu ukazoya kufundisha sena mbai na mbai ya ndiwa. Izungu ibaa jikamkwanyikia, nao ukangia ishuonyi, ukakaia ndiwenyi, na jija izungu jose jikakaia mbai-mbai ya ndiwa, andu kuomie.

² Ukawifundisha maza nyingi kwa mifwano, na kwa mafundisho ghake ukawizera,

³ “Sikirienyi: Muwi mbeu orefumieghe kwenda kuwa mbeu,

⁴ na iji orekoghe ukiwa, mbeu rimu rikapotoka chienyi, na nyonyi rikacha rikarija.

⁵ Rimu rikapotoka maghonyi, andu ndoe riserekoghe nyingi; nao ahoeni rikabuka, na kwa kukaia ndoe raro riseremilieghe,

⁶ iji iruwa jajoka, rikakoreka, na angu riserekoghe na miri ingi, rikaoma.

⁷ Rimu rikapotoka midinyi ya minjwa, na ija midi ikazoghua na kuribwagha, risevae kindo chingi anduangi.

⁸ Rimu rikapotoka ndoe iwurue, rikazoghua, rikiva na kuchurikia; rikava imu mirongo idadu, na imu mirongo irandadu, na imu ighana.”

⁹ Niko ukawizera, “Uo uko na madu ghesikira, ndesikire.”

Makusudi gha mifwano

¹⁰ Nao iji Jesu oresighiloghe uekeri, wamu wa awo wandu weremkwanyikieghe, andwamweri na wanughi wake ikumi na wawi, wikamkotia kutambua kwaro mifwano iyo.

¹¹ Nao ukawizera, “Inyo mwanekelo kuimanya ngasu ya Wuzuri ghwa Mlungu, ela awo wiko shighadi yaro, kwawo maza rose radaghorwa kwa mifwano;

¹² eri, ‘Kuzighana, loli wizighane, ela wisakewona anduangi; na kusikira, loli wisikire, ela wisaketambukilwa anduangi. Eri wisecheghaluka, na kulekelwa kaung'a rawo.’”

Jesu kuwitambushira mfwano ghwa muwi mbeu

¹³ Niko Jesu ukawikotia, “Welee, na inyo ndemtambukilwagha ni mfwano ughu? Mchaitambua wada mifwano mizima?

¹⁴ Uja muwi mbeu wadawa jija ilagho.

¹⁵ Awa niwo sa mbeu rerepotokieghe chienyi, andu ilagho jiwalwagha, hata iji wajisikira, ahoeni wacha Shetani na kujifunya jija ilagho jiwalo andenyi kwawo.

¹⁶ Wokoni wamu wafwanana na rija ra maghonyi; awo wijisikiragha ilagho, na nyuma ya kujisikira, ahoeni wajiwadia kwa kuboilwa,

¹⁷ ela ndewina miri ingi andenyi kwawo, wakaia kwa ngelo ndini. Konyuma, kukacha kutirirwa angu kusumbulwa kwa wundu ghwa ilagho ijo, ahoeni wadajisigha.

¹⁸ Na wamu wakaia sa iro riwalo minjonyi. Wajisikira jija ilagho,

¹⁹ ela masumbuko gha wurumwengu, kuboilwanya na bea ra vilambo vizima, kwangia na kujibwagha jija ilagho; najo jalemwa ni kuva matunda.

²⁰ Ela wamu ni sa rija mbeu rerewaloghe ndoe iwurue. Awo wajisikira jija ilagho na kujirumiria; nawo wava umu mirongo idadu, na umu mirongo irandadu, na umu ighana.”

Taa ifinikiro

²¹ Nao Jesu ukawizera sena, “Welee, taa yadaredwa ifinikiro pishi angu kuwikwa wusolowenyi? Nechi yadawikwa kiwanikonyi kwaro.

²² Angu ndekuwadie kindo chingi chiviswagha, chisechaawoneka; hata kindo chingi chifinikiro chisechaamanyika worinyi anduangi.

²³ Mndungi ukakaia na madu ghesikira ndesikire.”

²⁴ Nao ukawizera, “Sikirienyi nicha agha: chija kipimo mpimiagha nacho wambenyu, nicho cheni mchaapimilwa ni Mlungu, sena mchachurilwa.

²⁵ Angu uo uko na kilambo chimu, uchanekwa; ela uo usewadie, uchasokwa hata icho uko nacho.”

Mfwano ghwa mbeu seji ibukagha

²⁶ Jesu ukaghamba, “Wuzuri ghwa Mlungu ni seji mundu uwagha mbeu andoenyi.

²⁷ Nakio wadalala na kuwuka nakesho, na ngelo iyo, mbeu radabuka na kuzoghua, hata usemanyagha seji ibonyekagha anduangi.

²⁸ Ndoe yadazoghora miwalwa cheni, imbiri radabuka mambo na kuzoghua, na kureda changa cha wunyinya, konyuma wunyinya ghwadawuya ndembe.

²⁹ Hata iji viro vaoma, ahoeni vadakuwidwa, angu mvono ghwavika.”

Mfwano ghwa mbeu ya haradali

³⁰ Nao Jesu ukaghamba, “Welee, dighufwananishe naki wuzuri ghwa Mlungu? Angu dighuwonyere kwa mfwano ghuao?

³¹ Ni sa mbeu ya haradali, nayo iji iwalwagha ndoenyi, eko ndini kuchumba mbeu rose riko ndoenyi.

³² Ela iji yabuka, yadazoghua na kuwuya mudi m'baa kuchumba yose, hata nyonyi ra mbeonyi radabonya vijungu mbashunyi rake.”

³³ Kwa mifwano mingi sa iyo, Jesu ukawighoria jija ilagho sa iji weredimieghe kujisikira;

³⁴ hata kuseko na mfwano ndereghorieghe nawo anduangi; ela iji werekoghe wiekeri, ukawitambuya wanughi wake maza rose.

Jesu kunyamirisha kiremba

³⁵ Ituku ijo jeni, iji ndoe yaswa, Jesu ukawizera wanughi wake, “Diruwuke noko kimonu.”

³⁶ Wikajisigha jija izungu, wikamdwa kwa jija ishua orekoghe, na mashua zima rikanughana nao.

³⁷ Nao kiremba kibaa chikazoya kuweta, na mivo-mivo ya machi ikawoka kusukiria jija ishua, hata jikakunda kuchua machi.

³⁸ Ela uo moni orekoghe chia ya nyuma ishuonyi ulale mtonyi; nao wikammbusira wikimzera, “Mwalimu, ndekutalagha iji isi datota?”

³⁹ Jesu ukawuka, ukaikemia mbeo, na kuizera ndiwa, “Nyama, kuhoo”. Nao mbeo ikasia, kukakaia kuhoa kubaa.

⁴⁰ Niko Jesu ukawizera wanughi wake, “Kwaki mwaobua? Mduagha msene irumirio?”

⁴¹ Nao wikaobua loli-loli, wikazerana weni na weni, “Uhu nani sena, hata mbeo na ndiwa radamsikira?”