MARKO 2 - Biblia Ilagho Jiboie Kwa Wandu Wose

Jesu kum'boisa mkelemeri wa kupooza

¹ Nyuma ya matuku ghamu, Jesu ukawuya sena Kafarnaumu, wandu wikasikira angu oko nyumbenyi.

² Wandu wengi wikakwanyika, hata wulalo ghungi ghokaia ghukasoweka hata mmnyangonyi koni. Nao iji orekoghe ukiwichilia jija Ilagho Jiboie,

³ wikacha wandu wikimredia mkelemeri wa kupooza, wadukwa ni wandu bana.

⁴ Kwa wundu ghwa wandu kukaia wengi, wikalemwa ni kuvika kwake, wikavuchua nyumba naighu ya andu Jesu orekoghe, hata iji wameria kuturua wulalo ghukate, wikamsera uja mkelemeri walalia ghuja wuli.

⁵ Nao iji Jesu wawona irumirio jawo, ukamzera uja mkelemeri, “Mwanwapo, kaung'a rako ralekwa!”

⁶ Ela walimu wamu wa Sharia werekoghe kidombo ahoeni wikaririkanya ngolonyi kwawo:

⁷ “Kwaki mundu uhu waghora huwu? Wamsholia Mlungu! Nani udimagha kulekia wandu kaung'a ela umweri, nao ni Mlungu moni?”

⁸ Shwa wori Jesu ukamanya maghesho ghawo sa iji wawuyaririkanya, ukawizera, “Kwaki mwaririkanya huwo ngolonyi konyu?

⁹ Iji jiangue ni jiao, ni kughora, ‘Kaung'a rako ralekwa’, angu ni kughamba, ‘Wuka, kughuduke wuli ghwako, kwende?’

¹⁰ Ela nakunde mmanye angu Mwana wa Mdamu oko nandighi andoenyi releka kaung'a.” Ukamzera uja mkelemeri,

¹¹ “Nakuzera, wuka kughuduke wuli ghwako, kughale!”

¹² Nao ahoeni ukawuka, ukaghuduka wuli ghwake, ukafuma imbiri ya wose, hata wikashinika, wikamkasa Mlungu wikighamba, “Na jingi ndediwonie huwu anduangi.”

Kuwangwa kwa Lawi

¹³ Jesu ukafuma sena, ukaghenda mbai-mbai ya ndiwa, na izungu jose jikamchea; nao ukawifundisha.

¹⁴ Nao ukiida, ukammbona Lawi wa Alfayo uko kidombo ofisi efunyira wushuru, ukamzera, “Ninughe!” Nao ukawuka, ukamnugha.

¹⁵ Nao ikakaia iji Jesu orekoghe kidombo ukija vindo nyumbenyi kwa Lawi, wawadi wushuru wengi na wakaung'a wereseanyeghe kidombo na Jesu andwamweri na wanughi wake, angu werekoghe wengi weremnughieghe.

¹⁶ Na walimu wa Sharia wa Kifarisayo iji wammbona Jesu ukijanya na wakaung'a na wawadi wushuru, wikawikotia wanughi wake, “Kwaki ujanyagha chiaimweri na wawadi wushuru na wakaung'a?”

¹⁷ Iji Jesu wasikira, ukawizera, “Awa wiko banana ndewikunde mghanga ungi, ela awa wiko wakongo. Serechieghe kuwanga wahachi anduangi, ela wakaung'a.”

Ikoto aighu ya kufunga tumu

¹⁸ Ngelo imu, wanughi wa Johane na Mafarisayo werekoghe wikifunga tumu. Wandu wamu wikacha, wikamkotia Jesu, “Welee, kwaki wanughi wa Johane na wa Mafarisayo wifungagha tumu, ela wanughi wako ndewifungagha anduangi?”

¹⁹ Jesu ukawizera, “Welee, wandu wiwangilo harusinyi widima wada kufunga iji bwana-arusi ukwanye nawo? Ngelo iyo yose wikwanye na bwana-arusi, ndewidimagha kufunga anduangi.

²⁰ Ela matuku ghichacha, na bwana-arusi uchafunywa kwawo, niko aho wichafunga.

²¹ “Ndekuwadie mndungi udunganyagha kiraka cha nguwo mbishi na irasi, angu ukadunganya, chija kiwishi chikoghe chibwaghe ilanga, chichanona jija irasi, na ilanga jichachurikia.

²² Hata ndekuwadie mndungi udungiriagha divei mbishi andenyi ya viriba va kala, angu ukadungiria, ija divei ichavibara vija viriba, na divei ichadika, na viriba vichanoneka; ela wadadungiria divei mbishi andenyi ya viriba viwishi.”

Ikoto aighu ya Sabato

²³ Ituku jimu ja Sabato, Jesu orekoghe ukiidia mbuwa ya ngano, na wanughi wake wikighenda, wikazoya kudema vanga va ngano.

²⁴ Mafarisayo wikamzera, “Zighana! Kwaki wibonyagha maza ririghidwagha kubonywa ituku ja Sabato?”

²⁵ Jesu ukawitumbulia, “Welee, jingi ndemshomie seji orebonyereghe Daudi iji oresowieghe kindo chingi cheja? Uo, chiaimweri na awo werekwanyeghe, wiendazughwa,

²⁶ orengirieghe andenyi ya nyumba ya Mlungu, ukaja ija mikate erefunyiroghe kwa Mlungu, matuku gha Mkohani M'baa Abiathari; nayo yadarighidwa kujighwa ni mndungi, ela wakohani weni. Uo ukaija, sena ukawineka waja werekwanyeghe nao.”

²⁷ Niko ukawizera, “Sabato erewikiloghe kwa wundu ghwa wadamu, ela si wadamu kwa Sabato anduangi.

²⁸ Niko huwu Mwana wa Mdamu ni Bwana hata wa Sabato wori.”