MALAKI 4 - Biblia Ilagho Jiboie Kwa Wandu Wose

Ituku ja kucha kwa BWANA

¹ BWANA Uwadie-Ndighi-Rose waghamba, “Ituku jiacha wandu wikukasire na wawiwi wose wichakorwa sa makanda. Ituku ijo wichakorwa hata mndungi usesigho.

² Ela konyu inyo munisikiragha, ndighi ra kukia kwapo richam'bukia sa iruwa, nenyo mchaboiswa. Mchaghenda mkirama-rama sa ngache rafuma wazenyi.

³ Ituku nichaakatisha agho, mchawifasha-fasha wawiwi aisi ya maghu ghenyu.

⁴ “Kumbukenyi mafundisho gha mdumiki wapo Musa; sharia na memu neremnekieghe aja Mghondi ghwa Sinai kwa wundu ghwa wandu wose wa Israeli wipate kusikira.

⁵ “Olenyi nichamduma mlodi Elija imbiri ijo ituku ibaa ja BWANA jeobosha jisechee.

⁶ Uchawipatanisha weke aba na wana, eri nisecheikaba ndoe na kuitotesha.”