MALAKI 2 - Biblia Ilagho Jiboie Kwa Wandu Wose

¹ BWANA-Uwadie-Ndighi-Rose wawizera wakohani, “Momu ughu ni kwa wundu ghonyu:

² Ni suti munineke ishima kwa agho m'bonyagha. Mkalemwa ni kunisikira seji nighoragha, nichamredia njowe. Mapato ghenyu nichaghiwasira njowe. Kukakoni namerie kuviwasira njowe, kwa kukaia ndemmbadiagha sharia rapo kwa wulemeri.

³ Nichawikaba wana wenyu na kumshinga mavi gha vizongona venyu mawushunyi konyu, nenyo mchafunywa noko cha kitungasinyi cha mavi.

⁴ Aho niko mchaamanya kukaia ni ini nimnekie momu ughu, eri ilaghano japo na Walawi jisepate kuchikanywa.

⁵ “Andenyi ya ilaghano japo, nerewilaghirieghe irangi na kuwona nicha, Nerewinekieghe ijo ilaghano, eri wipate kunineka ishima; nawo wikaniobua na kunineka ishima.

⁶ Wikafundisha mafundisho gha loli, hata si agho ghiseko gha loli. Wikakaia wecha kwapo, na kutesia wandu kusigha mawiwi.

⁷ Ni kazi ya mkohani kufundisha malagho gha loli gha Mlungu. Yawifwana wandu wighendeghe kwa mkohani, wipate kufundishwa sharia rapo angu uo ni mdumwa wa BWANA Uwadie-Ndighi-Rose.

⁸ “Ela idana inyo wakohani mwaghalukie na mbai na kuisigha chia; mwawikuwishire wandu wengi kwa mafundisho ghenyu; mwamerie kujinona ilaghano nibonyere nenyo.

⁹ Kwa wundu ugho, nicham'bonya mmenyeke kwa wandu wa Israeli, angu msesikiragha malaghiro ghapo, nenyo mwaawuyafundisha kwa kutala wandu.”

Wandu kusowa wuloli kwa Mlungu

¹⁰ Welee, isi diwose ndedeeka na aba umweri? Ndedeeumbwa ni Mlungu umweri? Kwaki sena dasowiana wuloli diweni na diweni, na kwaki dijimenyagha ilaghano jibonyero ni Mlungu kwa weke wawa?

¹¹ Wandu wa Juda wachikanyire ilaghiro jawo kwa Mlungu, na kubonya ilagho jizamie Jerusalemu na isangenyi kose. Juda wailushire Hekalu ya BWANA uikunde; wandu wake wikalowua waka wa kighenyi witasagha milimu.

¹² BWANA ndewiinje awo wibonyere huwo wifume wungara ghwa Israeli, hata wisekaie na wungara sena ghwa ivo vizongona viredwagha kwa BWANA-Uwadie-Ndighi-Rose.

¹³ Mwawuyabonya ilagho jimu sena. Mwawuyachura madhabahu ya BWANA mbori renyu. Mwaawuyalila mkidikwa ni mbori angu walegha kughirumiria mafunyo mwareda.

¹⁴ Mwamkotia kwaki wawuyalegha kughirumiria. Ni kwa kukaia BWANA wawuyamanya angu kwachikanyire malaghiro korebonyereghe na muka kumlowue ngelo ya wudawana ghwako. Orekoghe mngara wako, ela kwachikanyire ilaghiro jako kwake hata ngera kodelaghira imbiri ya Mlungu kukaia kuchakaia mloli kwake.

¹⁵ Welee, Mlungu nderemfungieghe mkakaia kindo chimweri roho na mumbi? Makusudi ghake gherekoghe kii? Odekunda mpate wana wichaawuya wandu wa Mlungu kwa loli. Kwa huwo mlindie ungi onyu usechikanye malaghiro ghake, sena ukaie mloli kwa mkake.

¹⁶ BWANA Mlungu wa Israeli waghamba, “Ini nadazamilwa ni kutana. Nadazamilwa ni mundu ubonyagha kinyanya kwa mkake. Kwa huwo mkulindie, msekose kukaia waloli kwa waka wenyu.”

Kulighisa kwa ituku ja kutanywa

¹⁷ Mwamsirishire BWANA na malagho ghenyu. Ela inyo mwaawuyakotia, “Damsirishire wada?” Mwamsirishire kwa kughamba, “BWANA Uwadie-Ndighi-Rose wadaghesha wabonyi kiwiwi wose waboie; kwa loli wawikunde.” Na sena kwa kukotia, “Oko hao Mlungu wa hachi?”