MAKATANISHO 6 - Biblia Ilagho Jiboie Kwa Wandu Wose

Mawonyero ghamu sena aighu ya wukelu

¹ Mwana wapo, ikakaia kuwurie mdhamini wa sile ya mmbenyu, kukam'bonyera mghenyi ighemi jako,

² ikakaia kungirie mdeghonyi ghochumbwa ni momu, na kukufunga kumoni na malagho ghako,

³ bonya huwu mwana wapo kukukire kumoni kwa kukaia kwamerie kukufunga kumoni kukakaia aisi yake: Ghenda shwa-shwa kukusere kwake; kumvoye ukulekerie.

⁴ Kuselale, hata kudungumia.

⁵ Kukire sa shaa imkimbiagha mdiwi; sa nyonyi yawadwa ni mdiwi.

⁶ Ghenda kwa sungusungu ee mghadi; kuwone seji ribonyagha, kukufundishe hikima.

⁷ Nderiwadie kilongozi hata m'baa, angu m'bonyi nguma.

⁸ Ela radawika vindo vawo na sumesu, rikivitumbanya ngelo ekuwida.

⁹ Kulala hata lii ee mghadi? Kuwukali kufuma dilonyi?

¹⁰ Nao uaghamba, “Niadungumia katini, nikuche mikonu yapo nilale katinieri nihore.”

¹¹ Ela ngelo uchaakaia ulale, uchawadwa ni wukiwa sa kiting'a chirwae maswagha.

¹² Mundu wa kisha-kisha, wadaghenda ukideda madedo gha kisha.

¹³ Wadakunyiria wandu meso, na kuwikabia tiri; wadaloda wandu na chala chake,

¹⁴ na kubonya njama izamie kwa ngolo mbiwi; ukibonya sheshe tuli tuli.

¹⁵ Kwa wundu ugho, uchachelwa ni ndengwa shwa wori, nao uchashoghonoka isedimikagha uboo.

¹⁶ Gheko malagho mfungade huwu ghimzamiagha BWANA nandighi:

¹⁷ kuzighana kwa lukaso, kughora tee, kubwagha mundu usewadie ikosa;

¹⁸ ngolo ebonya njama mbiwi, shashira ekunda kubonya mawiwi,

¹⁹ kufunya wushuhuda ghwa tee, na mundu wa ndasanya.

Maonyo aighu ya wulaki

²⁰ Mwana wapo, wadia malaghiro gha ndeyo, hata kusesighe mafundisho gha mayo.

²¹ Kughiwike ngolonyi kwako ngelo rose; kughifunge singonyi kwako.

²² Kukakaghenda, ghichakulongoza; kukalala, ghichakulindia; iji kwawuka, ghichaghora na oho.

²³ Agho malaghiro ni taa, na mafundisho ni mwengere; kuja kukanilwa, ni chia ra irangi.

²⁴ Ghichakulindia na mmbiwi, na madedo ghisingie gha muka mseli.

²⁵ Kusekunde kuja kughoka kwake, hata kusewado ni kuzighana kwake.

²⁶ Kwadima kumpata malaya kwa zoghori ya kipande cha mkate, ela muka mseli wadabonya mundu ulaghashe vose uko navo.

²⁷ Welee, mundu wadima kudwa modo laghenyi kwake nguwo rake rikaie risehirie?

²⁸ Angu mundu wadima kuwadia maka gha modo chwau rake risehie?

²⁹ Ni huwo koni na mundu ulalagha na muka wa mmbao; ndekuwadie mndungi ubonyagha huwo usowe ikabo.

³⁰ Wandu ndewimenyagha kitoi chiiwagha chazughwa;

³¹ ela chikawadwa, chichalipa mando mfungade. Uchafunya vilambo vose va nyumbenyi kwake.

³² Mundu ubonyagha wulaki ndena akili putu; uo ubonyagha huwo wadakunona moni.

³³ Uchashoghonolwa na kunonelwa ishima, nao uchakaia na waya ghwa matuku ghose.

³⁴ Iriso jichawusira lubio lwa mumi na ndighi; ukakalipia kisasi, ndena wughoma.

³⁵ Ndechaarumiria malipo ghangi; hata uneko zawadi ring'ane wada, nderumiriagha.