MAKATANISHO 5 - Biblia Ilagho Jiboie Kwa Wandu Wose

Maonyo aighu ya wulaki

¹ Mwana wapo sikiria hikima yapo; degha kudu kwako kusikire malagho gha kumanya kwapo.

² Kupate kumanya kusawua agho ghiboie, na malagho ghako ghichawonyera angu koko na kumanya.

³ Madedo gha muka mseli ni sa wuki ghutonyaatonya, na madedo ghake ghadendere kuchumba mavuda;

⁴ ela kutua kwaro kwabirie nandighi sa nyongo; kwakalie sa lufu lukalie chia rose.

⁵ Uo wadaghenda cha kifonyi, na chia rake radalongoza cha Andu kwa Wafu.

⁶ Nderirikanyagha maza ra irangi; wadamara-mara usemanyagha ilagho jingi.

⁷ Na idana wana wapo nisikirienyi; hata mseleghe malagho ghapo.

⁸ Kuidirie kula na uo muka, hata kusakeghenda kaavui na mnyango ghwa nyumba yake;

⁹ kuchesokwa ishima jako ni wandu wazima, na kufwa mikonunyi kwa wandu wisene wughoma,

¹⁰ eri mali rako rose risechewuswa ni waghenyi, na malipo gha wudumiki ghwako ghisechewuswa ni wandu wazima.

¹¹ Kutua kwa irangi jako, kuchawuya mundu oruma-ruma, iji ndighi rako ra mumbinyi rasia.

¹² Kuchaghamba, “Kwaki nereleghagha kusikira! Kwaki neremenyagha kukanilwa!

¹³ Nerelemeloghe ni kusikira walimu wapo, ngalemwa ni kudegha kudu kwa wandu wapo werekoghe wikinighoria.

¹⁴ Nadaamba ninoneke putu imbiri ya wandu.”

¹⁵ Kaia mloli kwa muka wako moni; kumkunde uo moni uekeri.

¹⁶ Ndeifwane kuva wana kisha-kisha na waka wazima; ndewichaakufwana kindo chingi.

¹⁷ Wana wako ndewikaie wako weni wikutesie oho; kusewaghane na waghenyi.

¹⁸ Muka wako nderasimilo; kuboilwanye na muka kumlowue kufuma uko mwai.

¹⁹ Wafwano! Ooka sa shaa na sarigha ya waka. Kukato ni lukundo lwake ngelo rose kwa kuboilwa; kari kose kubwagho meso ni lukundo lwake.

²⁰ Kwaki kunekagha muka mzima lukundo lwako mwanwapo? Kwaki kusaghuagha kubonyerwa lukundo ni muka wa mndumu?

²¹ BWANA waichi maza rose mundu uribonyagha, nao wadaizighana mighendo yake yose.

²² Mundu mmbiwi wadawadwa ni makosa ghake moni, na kumazirwa ni nyavu ya kaung'a rake reni.

²³ Wadafwa kwa kulegha mawonyero, na kulaghaya kwa wundu ghwa wukelu ghwake m'baa.