MAKATANISHO 30 - Biblia Ilagho Jiboie Kwa Wandu Wose

Madedo gha Aguri

¹ Agha ni malagho gha hikima gha Aguri mwana wa Jake: “Mlungu ndeko chiaimweri nani, Mlungu ndeko chiaimweri nani, nani siwadie wutesia.

² Loli ini ne mkelu hata siwonekagha sa mdamu. Siwadie kumanya kwa kidamu.

³ Sifundishiro hikima hata simwichi Uo Mweli.

⁴ Nani ujokie mlungunyi ukawuya ukasea? Nani ukuchirie mbeo na ngonde rake? Nani ufungie machi na nguwo? Nani umangishire ndoenyi kose? Irina jake nani na irina ja mdawana wake nani? Loli kwaichi?

⁵ “Mlungu wadakatisha kula ilaghiro jake. Uo ni ngao kwa wose wikusaghikagha kwake.

⁶ Kusakechuria malagho ghake, uchekukemia na oho kuwoneke kukaia mtee.”

Makatanisho ghamu ghichurilo

⁷ Nakulomba malagho awi BWANA; kunineke imbiri nisefue:

⁸ Kuniinjire putu kughora tee; na kusenibonye mkiwa hata kusenifughishe; kunineke vindo vinikatagha,

⁹ nisecheghuda nandighi na kukukana oho ngighamba “Nani uwangwagha BWANA?” hata nisekaie mkiwa nicheiwa na kujilusha irina ja Mlungu wapo.

¹⁰ Kusakemmenya mdumiki kwa bwana wake usechekuewia, na oho kuwoneke mkosa.

¹¹ Weko wandu wiewiagha weke ndee, hata ndewiwifunyiragha chawucha weke mae.

¹² Weko wandu wikuwonagha weni kukaia waeli, sena wiseoghoshero wuchafu ghwawo.

¹³ Weko wandu wikuwonagha weni kukaia ighu! Sena ni kukujosa kubaa uko!

¹⁴ Weko wandu wikundagha kuwipata fwaida wakiwa na wandu wisowagha kwa kinyanya; na iyo niyo cheni witumiagha kughenjesha marangi ghawo.

¹⁵ Mng'ori ghoko na wai wawi wiwangwagha “Nineke!” Veko vilambo vina visekatwagha:

¹⁶ Andu kwa Wafu, muka uko kolowi, ndoenyi kuomie kukundagha vua, na modo ghuhiagha ngelo rose.

¹⁷ U mundu umsekagha ndee, na kummenya mae, iriso jake jichakulwa ni ngorusa ra vololonyi, na kujighwa ni nderi.

¹⁸ Gheko malagho ana ghawuyanishinua, niseghitambuagha:

¹⁹ seji indu iburukagha mawingunyi, seji choka ighendagha a maghonyi, seji meli ighendagha aghadi ya baharinyi, na seji mdawana na mwai wikundanagha.

²⁰ Muka useko mloli kwa mumi, wadabonya huwu: wadabonya wulaki na kukuoghosha ima ughambe, “Sibonyere ilagho jingi.”

²¹ Gheko malagho ana ghisughusagha wurumwengu:

²² mzumba kuwuya mzuri, mkelu kughuda vindo,

²³ muka usekundo kulowolwa, na mwai wa kazi kuwusa wulalo ghwa muka wa nyumba.

²⁴ Veko vilambo vina viko vitini wurumwengunyi viko na hikima mbaa:

²⁵ Sungusungu: Nderina ndighi, ela sena radakuwikia vindo vawo ngelo ya sumesu.

²⁶ Njiwu: Nderiwadie kudima, ela sena radabonya mizi yawo a maghonyi.

²⁷ Zighe: nderina mzuri, ela sena rose radaburuka chiaimweri.

²⁸ Mwalukandua: Kwadima kummbwadia na vala, ela sena wakaiagha ngomenyi kwa wazuri.

²⁹ Veko vilambo vina kukavizighana vighendagha na mwendo ghughokie:

³⁰ shimba, iko na kudima kose aghadi ya nyamandu, nayo ndeiobuagha mmbao ungi.

³¹ Njogholo ighendagha kwa makogo; fwandi, na mzuri ughendagha imbiri ya wandu wake.

³² Ikakaia kodeeka mkelu okujosa kumoni, na kubonya mpango ghwa wuwiwi, dunga maghu kugheshe nicha.

³³ Kukasuka mariwa, kuapata mavuda; kukakaba mundu mbua, uafunya bagha; kukawusira machu, kuchangia wasinyi.